LATEST NEWS
Amakuru
Kigali : Polisi y’u Rwanda yakanguriye abamotari kwirinda no kugira uruhare mu kurwanya ibyaha
Publish Date: mardi 24 novembre 2015
VISITS :303
By Admin

Umuyobozi wa Polisi y’u Rwanda mu mujyi wa Kigali, Assistant Commissioner of Police (ACP) Elias Mwesigye, ku wa 23 Ugushyingo 2015, yakanguriye abamotari bo mujyi wa Kigali bibumbiye mu Mpuzamashyirahamwe yabo yitwa FERWACOTAMO igizwe n’abanyamuryango 11 500, kwirinda no kugira uruhare mu kurwanya ibyaha birimo ibijyanye n’umwuga wabo nk’ubujura bwa moto, ndetse n’ibindi aho biva bikagera.

Ubu butumwa yabubahereye ku kibuga cy’umupira w’amaguru cya Kicukiro, aho we n’abandi bayobozi mu nzego zitandukanye, barimo Umuyobozi w’aka karere, Paul Jules Ndamage, na bamwe mu bofisiye bakuru ba Polisi y’u Rwanda, bagiraniye inama n’abo bamotari.

ACP Mwisigye yasobanuriye abo bamotari ko guhura na Polisi y’u Rwanda ndetse n’izo nzego zindi, ko ari ingenzi, kuko ari bumwe mu buryo bwo guhura nabo, bagasuzuma uko imikorere n’imikoranire hagati yabo na Polisi y’u Rwanda, kandi bagafatira hamwe ingamba z’uko byarushaho kunozwa kugira ngo ibyaha birimo ibijyanye n’umwuga wabo ndetse n’ibindi muri rusange birusheho kurwanywa no gukumirwa, kandi ababikoze cyangwa abategura kubikora bafatwe.

Ibyaha ACP Mwesigye yabwiye abo bamotari kwirinda no kugira uruhare mu kurwanya harimo ubujura bwa moto, aha akaba yarababwiye ati :" Bene ubwo bujura si bwinshi . Guhura kwanyu na Polisi y’u Rwanda ni ingenzi kuko bituma dufatira hamwe ingamba zo gukumira ko hagira na moto n’imwe yibwa."
Hagati aho, yabamenyesheje ko umutekano mu mujyi wa Kigali usesuye, kandi ko nta muntu ushobora kuwuhungabanya ndetse yongeraho ko n’uzagerageza gukora ibikorwa bishobora kuwuhungabanya azafatwa.

Yaboneyeho kubashimira uruhare rwabo mu kurwanya no gukumira ibyaha, ibyo bikaba byarajyanye no kubereka abantu umunani bakurikiranyweho uruhare rutandukanye mu bujura bwa moto bakoze mu bihe bishize.

Abo bajura barimo uwitwa Paff Daddy Eliezer wo mu karere ka Bugesera wari ushinzwe kwambutsa mu Burundi moto zibwe mu Rwanda. Barimo kandi uwashyiraga ibinini bisinziriza mu binyobwa byabaga biri kunyobwa n’abamotari, maze bamara gusinzira, akabiba moto zabo, ndetse n’uwakoreshaga urufunguzo rw’urucurano agafungura moto aho ba nyirazo bazishyize maze akaziba.

ACP Mwesigye yababwiye ati :"Umwuga wanyu ubateza imbere ndetse n’igihugu muri rusange. Mukwiye kwirinda bene biriya byaha kandi mugaha Polisi y’u Rwanda amakuru ku gihe yatuma birwanywa kandi yatuma ababikoze bafatwa."

Yabamenyesheje kandi ko Polisi y’u Rwanda yafashe abandi bantu babiri bacyekwaho kwica umwe mu bamotari babiri bishwe kandi bakibwa moto zabo mu kwezi gushize mu mujyi wa Kigali.

Na none yabibukije kubahiriza amategeko yo gutwara moto mu muhanda no kujya bagira amakenga y’abantu batwaye kugira ngo badatwara abagiye gukora ibikorwa bishobora guhungabanya umutekano cyangwa batwaye ibintu binyuranyije n’amategeko, kandi mu gihe bamenye ko aribyo bagiyemo, bagahita babimenyesha Polisi y’u Rwanda.

Umuvugizi wa Polisi y’u Rwanda,Chief Superintendent of Police (CSP) Celestin Twahirwa, yabwiye abo bamotari ati :" Mukore akazi kanyu mu mutuzo no mu bwisanzure kuko igihugu kirarinzwe kandi kiratekanye. Gusa, mukwiye kugira uruhare mu gukumira ikintu cyose kinyuranyije n’amategeko gishobora kuwuhungabanya.Turahari,murahari, dufatanyije, nta kizatunanira."

Asoza iyo nama,umuyobozi w’akarere ka Kicukiro Paul Jules Ndamage yababwiye ati :" Iyo Polisi y’u Rwanda iri mu muhanda, ntiba igamije kubahana, ahubwo iba igamije kugira ngo mutware moto mukurikije amategeko kugira ngo abakoresha umuhanda bose batekane."

Umuyobozi wa FERWACOTAMO ,Ntaganzwa Celestin yavuze ko mu mezi abiri ashize ko hibwe moto 10 ariko ko esheshatu murizo zafashwe zikaba zaranashubijwe ba nyirazo.

Yasabye abanyamuryango ba FERWACOTAMO gukurikiza inama bagiriwe no gushyira mu bikorwa ibyo basezeranye na Polisi y’u Rwanda.

Umwe muri abo bamotari witwa Mukeshimana Vestine yagize ati :"Dushoboye kurwanya ubujura bwa moto. Uretse nabwo,nta n’ikindi cyatunanira."

Yasabye bagenzi be kurangwa n’imikorere n’imigirire myiza birinda ubujura bwa moto ndetse n’ibindi byaha muri rusange.

RNP

IBITEKEREZO
Mike

Polisi y'u Rwanda yarakoze kwerekana ibyo bisambo. Ibindi ndetse n'abandi banyabyaha muri rusange bararye bari menge kuko iminsi yabo irabaze.Twirinde ibyaha kandi duhe Polisi y'u Rwanda amakuru y'ababikora.

rucogza

umutekano w'abantu n'ibintu n'ishingano ya buri wese, bityo turashimira Police y'igihugu cyacu kuba idahwema kudukangurira kwicungira umutekano aho turi hirwa no hino ndetse no gutanga amakuru kandi ku gihe aho biri ngombwa hose.


TANGA IGITEKEREZO

Kwamamaza
Kwamamaza
Also in this section
Ibuka yanenze ibihano bihabwa abagaragaza ingengabitekerezo ya Jenoside

Ibuka yanenze ibihano bihabwa abagaragaza ingengabitekerezo ya...

Minisiteri y’Uburezi yahagaritse amashami atatu ya Kaminuza ya Gitwe, abanyeshuri basabwa gutaha

Minisiteri y’Uburezi yahagaritse amashami atatu ya Kaminuza ya Gitwe,...

Iradukunda Elsa ni we wambitswe ikamba rya Miss Rwanda 2017

Iradukunda Elsa ni we wambitswe ikamba rya Miss Rwanda 2017

Umujenosideri Julienne SEBAGABO yafatiwe mu Rwanda agerageza gusubira muri Norvege

Umujenosideri Julienne SEBAGABO yafatiwe mu Rwanda agerageza gusubira muri...

Umugogo w’Umwami Kigeli V Ndahindurwa wasesekaye i Kigali ( Yavuguruwe )

Umugogo w’Umwami Kigeli V Ndahindurwa wasesekaye i Kigali ( Yavuguruwe...

NEW POSTS
Perezida Kagame yasabye ko kubwira abakobwa bagiye gushyingirwa ko bazahura n’ibibazo bikwiye gucika

23-04-2017

Perezida Kagame yasabye ko kubwira abakobwa bagiye gushyingirwa ko bazahura...

Perezida wa Guinea, Alpha Condé yasabye bagenzi be kwitandukanya n’u Bufaransa

21-04-2017

Perezida wa Guinea, Alpha Condé yasabye bagenzi be kwitandukanya n’u...

Ijambo Perezida Kagame yavuze atangiza #Kwibuka23 uko ryakabaye n’Ubutumwa burikubiyemo

18-04-2017

Ijambo Perezida Kagame yavuze atangiza #Kwibuka23 uko ryakabaye n’Ubutumwa...

U Rwanda ku mwanya wa cyenda ku Isi mu bihugu bifite umutekano usesuye

17-04-2017

U Rwanda ku mwanya wa cyenda ku Isi mu bihugu bifite umutekano...

New- RNC na RNC Ishaje : Mu bikorwa bipfobya bikanahakana Jenoside yakorewe Abatutsi

16-04-2017

New- RNC na RNC Ishaje : Mu bikorwa bipfobya bikanahakana Jenoside...

Ubuhamya bw’Umusilikare wa Habyarimana wahungishije Abatutsi 18 akabageza i Burundi

14-04-2017

Ubuhamya bw’Umusilikare wa Habyarimana wahungishije Abatutsi 18 akabageza i...

Umufasha wa Gen Castal arahamya ko yamenye ko abatutsi bagiye kwicwa ndetse na Perezida Habyarimana

13-04-2017

Umufasha wa Gen Castal arahamya ko yamenye ko abatutsi bagiye kwicwa ndetse...

Kwamagana ubugizi bwanabi uwitwa Chikuru Josefu akomeje gukorera abanyarawandakazi batuye mu Bubiligi

10-04-2017

Kwamagana ubugizi bwanabi uwitwa Chikuru Josefu akomeje gukorera...