LATEST NEWS
Amakuru
Minisitiri w’intebe Murekezi na Rucagu, abagabo batarya iminwa mu kuvuga amateka yabo mbere no mugihe cya Jenoside .
Publish Date: vendredi 22 avril 2016
VISITS :8104
By Admin

Amateka y’u Rwanda yerekana ko kuva Abakoloni bagera mu Rwanda , abanyarwanda batangiye kubaho mu rwangano rushingiye k’umoko nyuma y’aho abakoloni bazaniye sisiteme y’imiyoborere ya mbatanye mbategeke(Divide and Rule),aho abo mubwoko bw’abahutu bigishijwe ko umwanzi wabo ukomeye ari umututsi.

Na nyuma y’aho u Rwanda ruboneye ubwigenge,ironda koko ryakomeje,abatutsi barameneshwa bikomeye ndetse bigeraho aho bakorerwa Jenoside mu 1994.

Kuri Leta y’u Rwanda isaba abanyarwanda byumwihariko abayobozi nubwo amateka y’u Rwanda ari mabi agomba kuvugwa uko ari birinda kuyagoreka .

Kugeza ubu hari bamwe mubanyarwanda ndetse banabaye muri Leta yateguye ikanakora Jenoside ,bafatwa nk’intangarugero mu kuvuga amateka y’u Rwanda uko ari ndetse n’ayabaranze ubwabo mbere no mugihe cya Jenoside nta kuyagoreka.

Abaza ku isonga ni Minisitiri w’intebe Anastaze Murekezi ndetse na Rucagu Boniface, Chairman w’itorero ry’igihugu.

Ubusanzwe Minisitiri w’intebe Murekezi avuga ko uvuka mu Karere ka Nyaruguru, mu buhamya bwe avuga ko yakuze abwirwa ko igisekuru cye gikomoka mu Mutara w’ I Ndorwa .

Minisitiri w’Intebe Anastase Murekezi

Mu buhamya aherutse gutanga imbere y’abandi bayobozi bakuru b’igihugu mu biganiro ku kwibuka ku nshuro ya 22 Jenoside yakorewe abatutsi ,Minisitiri w’intebe yavuze ko yakuze abwirwa ko se wa Sekuru yaje kugirwa umuhutu nyamara yari umututsi kubera ko nyina yigeze guhakwa mu bahutu ahita ahabwa ubwoko bw’abahutu, bituma igisekuru cyose gikura kitwa abahutu.

Ati :”Ubundi sogokuru atarapfa ndetse na Data ajya abimbwira, ngo ubundi dukomoka mu Mutara w’i Ndorwa, noneho nyina wa se wa Sogokuru Nyiramasugi yaje gutana n’umugabo we bashwanye aza kuva ahitwa i Gihindamuyaga, mu Karere ka Huye bari batuye ajya i Nyaruguru ahakwa k’umutware w’umuhutu wari uhari ariko akaba yari ahetse umwana w’umuhungu w’uruhinja witwaga Habiyambere ari we se wa Sogokuru, uwo mwana akurira aho n’ubwoko bwe buhita buhinduka ubuhutu gutyo kuko nyina yari yahatswe muri abo bahutu.”

Minisitiri w’intebe avuga ko guhera ubwo ari bwo bahise baba abahutu ndetse byandikwa mu ibuku ndetse n’aho amarangamuntu aziye bakajya bandikamo Hutu ari na byo byamukijije mu gihe cya Jenoside.

Mu myaka ya za 1991, ni bwo Murekezi yafashe icyemezo cyo kujya muri politike y’amashyaka, ari bwo yajyaga mu ishyaka PSD, aho avuga ko bafatanyije n’andi mashyaka nka PL na MDR batangiye gutegura umugambi wo kurwanya ubutegetsi bw’igitugu bwa Habyarimana no guhirika uwari Minisitiri w’intebe Nsanzimana.

“Si ukubeshya iyi Primature mubona ifite amateka Atari meza, niho hari ibiro by’ishyaka rya MRND, hari hatinyitse na Habyarimana yari ahafite ibiro, tujya kuhatinyuka, amashyaka ataravugaga rumwe na MRND twakoze urugendo rwo kuza gukuraho Minisitiri w’intebe Nsanzimana kugira ngo ibintu bihinduke. Ni bwo bwa mbere nari mbonye ikintu numvaga kidashoboka mu Rwanda, ariko kubera igitutu cy’amashyaka menshi no kuba FPR yari yatangiye urugamba rwo kubohora igihugu twaratinyutse ariko twari tuzi ko dushobora no gushira.”

Mu kwezi kwa 11 umwaka wa 2013,ubwo mu gihugu hari hamaze igihe gito hatangijwe gahunda ya “Ndi Umunyarwanda”, Minisitiri Murekezi Anastase yafashe akanya ko gusaba imbabazi.

Minisitiri w’intebe Murekezi Anastase,icyo gihe wari Minisitiri w’abakozi ba Leta n’umurimo yasabye imbabazi ashingiye ku kuba nk’umunyarwanda uzi aho igihugu cyavuye n’aho cyerekeza, ashingiye kandi ku mateka mabi yabaye mu Rwanda no ku ibaruwa yandikiye Leta y’u Rwanda mu 1973, afatanyije n’abanyeshuri biganaga basaba ko umubare w’Abatutsi wagabanuka mu mashuri, Minisitiri w’abakozi ba Leta n’umurimo Murekezi Anastase yisunze umutimanama we asaba imbabazi Abanyarwanda.

Mu ijambo rye ryafashe akanya mu gusaba imbabazi Abanyarwanda ku byo yaba yarakoze mbere ya Jenoside yakorwe Abatutsi mu 1994, dore ko yagaragaje nka kimwe mu byo ashingiraho nk’aho mu mwaka wa 1973, nk’abanyeshuri b’Abanyarwanda bakomoka mu bwoko bw’Abahutu icyo gihe bigiraga mu gihugu cy’u Bubiligi, bihuje bandikira Leta y’u Rwanda ibaruwa isaba kugabanya umubare w’Abatutsi mu mashuri no mu bucuruzi, kubera ko babonaga urimo kwiyongera.

Nk’umunyarwanda wiyumvamo ubunyarwanda yagize ati “Ndasaba Abanyarwanda imbabazi, kuko ibyo nanditse nabyanditse ndi umuntu mukuru uzi ubwenge kuko nari mfite imyaka 21 y’amavuko.”

Uku gusaba imbabazi kwa Minisitiri w’intebe Murekezi kwamugaragaje nk’umuntu w’inyangamugayo ubabajwe n’amateka mabi u Rwanda rwanyuzemo kandi wifuza ejo hazaza heza h’iki gihugu.

Ubusanzwe Murekezi Anastase ni Minisitiri w’Intebe w’u Rwanda kuva mu mwaka wa 2014, uyu akaba ari umwe mu myanya itanu y’ikirenga mu gihugu.

Mbere yo kugirwa Umuyobozi wa Guverinoma, akaba yaragiye ashingwa imirimo itandukanye irimo Minisiteri y’abakozi ba Leta n’indi.

Minisitiri w’Intebe Murekezi avuga ko kubera Imana igira imbabazi no kubera ubushishozi bwa Nyakubahwa Perezida wa Repuburika y’u Rwanda Paul Kagame yamugiriye icyizere amuha imirimo ikomeye yo gufatanya n’abandi mu kuyobora abanyarwanda mu nzira y’ubumwe n’ubwiyunge.

Undi muntu ufatwa nk’inyangamugayo yiyemeje kuvuga amateka y’u Rwanda uko ari nta kuyagoreka ,ni Rucagu Boniface ,umuyobozi mukuru w’itorero ry’igihugu kuri iyi Leta y’ubumwe,ariko akaba yaranakoze imirimo itandukanye kandi ikomeye muri Leta yateguye ikanashyira mu bikorwa Jenoside yakorewe abatutsi.

Rucagu Boniface yabonye izuba kuwa 1 Ukuboza 1946 mu cyahoze ari sheferi (chefferie) ya Kibare, nyuma haje kuba muri Komini ya Nyamugali, ubu ni mu Karere ka Burera.

Boniface Rucagu

Amashuri abanza yayigiye mu giturage yavukiyemo, ayisumbuye ayatangirira i Musanze, ayasoreza muri Institut Marie Beatrice i Byumba. Ayo mashuri yombi ni ay’abafurere. Uyu Mutahira mukuru w’Intore nta mashuri ya Kaminuza yize.

Rucagu Boniface wakoze imirimo itandukanye ya Leta k’ubutegetsi bwa Kayibanda na Habyalimana ahakana yivuye inyuma ko yagize uruhare mu bwicanyi ubwo ari bwo bwose bwabaye mu Rwanda, burimo na Jenoside yakorewe Abatutsi mu 1994.

Ubwo Ingabo za RPA zatangizaga urugamba rwo kubohora u Rwanda, Rucagu na Leta ya Habyarimana ngo bakubiswe inshuro bakwirwa imishwaro, nk’uko akomeza abisobanura.

“…tariki 4 Nyakanga 1994 turatsindwa, nsindwana na leta narimo, mpirimana na yo, dutsindwa kubera kutagira indangagaciro. Ngira ikibazo nti ‘ese uzabona Rucagu wo muri MRND ntazampitana ?’ Nti ‘ese aba bafashe igihugu ntibazanshishamo cartouche (isasu) ?’

Bene wacu na bo ntibyari byoroshye guhungana na bo, cyane ko bari barigeze kunyandikaho ibihimbano ngo ‘Rucagu ashaka kugarura Abanyiginya (Abatutsi).”

Muri uko gukwirwa imishwaro Rucagu yahungiye i Cyangugu “ngezeyo nandikira Leta y’ubumwe yari imaze kujyaho nti ‘Rucagu wo muri MRND ntabwo nahunze igihugu, ndi i Cyangugu, bazakurikirane nibasanga narakoze jenoside bazankurikirane, nibasanga ntarayikoze mbe mu gihugu mfatanye n’abandi kucyubaka.”

Rucagu ahakana yivuye inyuma ko yagize uruhare mu bwicanyi ubwo ari bwo bwose bwabaye mu Rwanda, burimo na Jenoside yakorewe Abatutsi. Mu kunyomoza abo yita ‘abanzi’ bamuvugaho kwijandika mu bwicanyi, ashimangira ko yahanawe igihembo cy’umurinzi w’igihango nyuma yo kwemezwa n’abaturage nk’umuntu w’indakemwa mu mico no mu myifatire wagize uruhare rukomeye mu kunga Abanyarwanda.

Nyuma yo kwandikira Inkotanyi azibwira ko nta ruhare yagize muri Jenoside, ibi ni byo byakurikiyeho, nk’uko abyivugira : “Zaraje ziransingira, ziramfata, zimfata mu cyubahiro, nzi ngo ziranyica, mbona burakeye, bwacya nti ‘baranyica bugorobye’ ariko buracya, burongera buracya, n’ejo buracya.”

Rucagu Boniface ashimira imana ku kuba ataragize uruhare muri Jenoside kandi arashimira Leta y’ubumwe bw’Abanyarwanda byumwihariko RPF Inkotanyi,kukuba barashishoje ntibamushyireho ibyaha bya Jenoside.

Buri gihe iyo u Rwanda rwibuka Jenoside yakorewe abatutsi,Rucagu Boniface akunze kumvikana mu itangazamakuru avuga ko buri gihe aterwa ipfunwe no kuba Leta yarafitemo umwanya w’ubuyobozi yarakoze amahano ya Jenoside ikica abo yarishinzwe kurinda.

Rucagu Boniface avuga ko iyo ari kuvuga ijambo agera hagati akumva agize ipfunwe cyane nk’iyo ngo yibutse ko hari abantu bavuga ko Leta yarifitemo umwanya w’ubuyobozi ariyo yakoze Jenoside.

Mu kiganiro cyo ku tariki ya 8 Mata 2016,yagiranye na Radio Amazing Grace,Bwana Rucagu Boniface yumvikanye avuga ko kenshi ko aterwa ifunwe no kuba Leta yarimo nk’umuyobozi yakoze Jenoside.

Rucagu yagize ati “Nabivuze kenshi na n’ubu ndacyabivuga,numva mfite ipfunwe,numva mfite ipfunwe,kubona Leta narimo yarakoze amahano ya Jenoside ,ikica abana bayo ,ikica abo yakagombye kurengera,kuko Leta niyo irengera abaturage,ufite uburenganzira n’ububasha bwo gukiza abawe,akaba ariwe ubica,numva bintera ipfunwe, niyo mvuze ijambo ,ndarivuga ariko nagera hagati nkumva ipfunwe,nkumva abantu bari bumbaze bati iyo si Leta wakoragamo,nkumva mfite ipfunwe rwose”.

Rucagu avuga ko agira irindi pfunwe ry’uko abahutu avukamo bamwe muribo aribo bakoze amahano ya Jenoside. Ati “ Nkagira irindi pfunwe ry’uko abahutu navutsemo bamwe aribo bakoze ibara,bakoreshejwe bakora amahano ya Jenoside.Nabyo iyo bavuze ngo abahutu bakoze Jenoside bica abatutsi barabarimbura(…) bakambwira ngo nanjye mvuka mu bahutu,nabyo ngira ipfunwe nagirango mbwire abanyarwanda bose ko ngira ipfunwe ahubwo bambwire umuti wavura ipfunwe”.

Mu kunyomoza abo yita ‘abanzi’ bamuvugaho kwijandika mu bwicanyi, Rucagu ashimangira ko yahanawe igihembo cy’umurinzi w’igihango nyuma yo kwemezwa n’abaturage nk’umuntu w’indakemwa mu mico no mu myifatire wagize uruhare rukomeye mu kunga Abanyarwanda.

Kuri ubu u Rwanda rumaze gutera intambwe nini mu kubaka iterambere n’ubumwe bw’Abanyarwanda, ariko abayobozi bavuga ko ngo amateka rwanyuzemo yateye abantu ibikomere ndetse n’ubu bikaba bigihari.

Gahunda ya “Ndi umunyarwanda” ngo yaje igamije kuganira kuri ayo mateka no kumva ko Abanyarwanda basangiye igihugu bakaba bagomba gufatanya kucyubaka nyuma yo kwakira amateka yacyo.

Source : Kalisimbi.rw

IBITEKEREZO
kiwa

HAHAAAH nanjye ndabona ibyababa nyakuhwa birasekeje cyane ese waba muri MRND ukitandukanyaga gute n,ubwicanyi naho icyibazo s,ubwoko ese ? kajuga ahingutse yavuga ko kuba umututsi bivanaho ko yabaye umukuru w,interahamwe naho aba n,ibisambogusa gendaHE uri imfura.

uwipau

Yemwe, inda nini yishe ukuze kweli !! Iyi ni souci yo kwikanga ko babura imyanya ituma barocangwa ari abayobozi !!!? Nyakubahwa PM yegure, naho Rucagu azabwire Abanyarwanda ibikorwa bye BYOSE hagati ya Oct 1990 na July 1994. KUki yiha ibyo kuragira Abanyarw ababwira amateka ye, agasimbuka iyo period ??!! Inda weee !!!

saba ramos

Abayobozi barangiza ngo nta bwoko buriho ngo abantu bose ni abanyarwanda, none PM ati burya ndi umututsi !! Gahunda ya Ndi Umunyarwanda biragaragara ko nta gaciro igifite ubwo n'abayobozi batangiye kujya bavuga amoko yabo, twemere ko ariho ahubwo duharanire kubana neza twese !! Yewe yewe ngo nyina wa se wa sekuru ! Iyi sano se ....

saba ramos

Abayobozi barangiza ngo nta bwoko buriho ngo abantu bose ni abanyarwanda, none PM ati burya ndi umututsi !! Gahunda ya Ndi Umunyarwanda biragaragara ko nta gaciro igifite ubwo n'abayobozi batangiye kujya bavuga amoko yabo, twemere ko ariho ahubwo duharanire kubana neza twese !! Yewe yewe ngo nyina wa se wa sekuru ! Iyi sano se ....

Emmanuel

Ariko ko mwabihaye ikosa bakoze n'irihe !?,ahubwo se aho kubagaya ibyiza suko mwaba intwari namwe mukavuga ibyanyu(aho mwari muri Jenocide icyo mwakoze n'icyi mutakoze)

Aline shema

Murekezi Anastase niyegurekumwanya wubuyobozi H.E yamushyizeho.iriya mvugo ninyandiko yandikiye mububiligi birahagije .ni ikirumirahabiri.ninyamujyiyobigiye.ntamusimamo wa politiki afite.

karisa

niba aribyo nange ndi umututsi mama yashatse mu bahutu bukeye arahukana agaruka antwite .

Kanyarwanda

Bwana Murekezi uragaciye. Gusa mukinyarwanda baca umugani ngo amafuti y'umugabo nibwo buryo bwe. Nibura twe tungana n'abana bawe udusigiye umugani tuzajya tukwibukiraho nabawe.

Habumuremyi

Bigiye kuba impamo ko buri PM mu Rwanda azajya asiga umugani imusozi. Umwe ati "Nyakubahwa twese twakoze nabi uretse mwe" undi ati " Maman yagiye guhakwa mubahutu nuko mba umuhutu gutyo ariko ubusanzwe ndi umututsi. Ubwenge buza ubujiji buhise. Uyumwanya wa PM sinzi niba hari umututsi wari wawujyamo kuva u Rwanda rwabaho. Kubwanjye ndabona wisinyiye urupapuro rwo kuvaho. Ubusanzwe abanyarwanda benshi bagiye bahindura ubwoko kugirango bagire amahirwe yo kugera mumwanya runaka ariko aho Nyakubahwa Murekezi atandukaniye n'abandi nuko we ahinduye ubwoko bwe ari mumwanya ukomeye atitaye ko uwo mwanya ashobora nokuba yarawugezemo kubera icyo aricyo.

Milindii

Leta iratwigisha gahunda nziza ya Ndumunyarwanda uyu nawe akatuvangira azanamo Burya ndumututsi, kdi ari we wagafashe iya mbere yigisha ndumunyarwanda. Jyenda his excellence urihangana.

Nelson

Murekezi niba yihannye niyegure kandi atubwire n'abo basinyanye iriya baruwa muri Belgique...Aba nibo batuzaniye akaga.Ku ngoma ya Habyarimana ko atabivuze...?

John

Abanyarwanda turacyafite ikibazo gikomeye cyo gushaka guhindura ubwoko uko ingoma zije. Ndebera Nyakubahwa Murekezi wigize " Umushambo"(Nubwo atabyatuye !) ukomoka mu Ndorwa !!!! Uyu munsi arashaka ubututsi, ejo yemezaga yemye ko ari umuhutu rwimbyi ! None se niba utari proud yaho ukomoka,ariko ntugire uwo ubyicisha cyangwa ngo ubigire icyitwazo cya politique cyangwa se cyo gukandamiza abandi, ubundi kuba iki cyangwa iki bitwaye iki, igihe cyose icyo ushyira imbere ari Ndi Umunyarwanda kandi ukemeza ko uruvukamo wese arufitemo uburenganzira bungana nubw'undi. Bene iyi nvugo cyangwa ubuhamya, cyane cyane iyo butanzwe n'umuntu nka PM biteye ikibazo, birerekana mu by'ukuri ko dufite abanyepolitique bacye, abenshi ni ba Nsumirinda gusa, kuko ntacyo bemera cyangwa baharanira Atari inda gusa, yo ibatera guhindura n'imimerere yabo uko ingoma itashye. Biteye isoni.

kamana

Abayobozi bakwiye kurata ubunyarwanda, no kurengera inyungu za Rubanda zose. PM na Rucagu ninde wababwiye ko njyewe umuturage nkeneye amoko yanyu ? Dore ibintu nkeneye naho ibindi nanabyishakira. 1. Nkeneye ubuhinzi buteye imnere inzara igacila 2. Nkeneye amazu nimihanda byiza kuburyo nzakoresha ikoranabuhanga Kaymu ikanzanira ibintu itabanje kuyoba 3. Nibindi biteye imbere ariko cyane ibiporezo. Naho ibyamoko ubu muri guhalwa bundi bushya kuko murashaje. Ese mwazahanze Imirimo ?wari wumva abakire birirwa bahinduranya amoko. Kuba uwo uri we it doesnot help us. Icyo dukeneye niterambere.

jvpl

Abanyarwanda rwose turansetsa cyane ! Hhhhhhhh reka nisekere nta lundi nabona ngira kuko akabi gasekwa nkakeza Murekezi murasekera iki nk'umuntu nta kintangaje mà » byo yavuze nirengagije gato KO ari PM kuko siwe wenyine abanyarwanda batari bake birirwa batembera mumoko gusaaa uyu munsi ati ndi uluhutu ejo ati ndumututsi bitewe niguhari. Abenshi muri mwe turemeranyako mbere y'a 94 hari abatutsi batari bake bari bariyandikishije ho ubuhutu mà » ndangamuntu nuko mà » ibarurisha mibare rya l'ETA bakitwa abahutu ariko mubyukuli ataribo. Ibi byanatumye iyo urebye umubare wabazize génocide yakorewe abatutsi ukareba nabayirokotse ukareba numubare l'ETA yatangaga mbere y'a 94 w'abatutsi bidahura kubera iki ? Kubera KO hari ababarugwaga mà » nyandiko nk'abahutu ataribo kandi bishwe. Abo bantu rero harimo bake bagize amahirwe yo kurokoka nkuko no batutsi hari abagize amahirwe yo kyrokoka. Aha usanga abihinduza ubwoko bakoresha imbaraga zose ngo bemerwe nubwobwoko bishyizemo maze nyuma y'a 94 bamwe barongera bakoresha ingufu zose ngo bongere bitwe abatutsi kabone niyo yaba yaragendaga yerekana indangamuntu irimo hutu akagira Imana agahita . Ingero ni nyibshi cyane hano mà » Rwanda so ntagitangaza KO Murekezi yaba muri abo banyarwanda birirwa batembera mumoko bitewe nigihari. Ku bavuga KO ntawe yarokoye bibuke KO muri 94 hari ibice 2 mumashyaka : igice bitaga hutu power nicyo bitaga modéré bari kuruhande RDA Twagiramungu. Ndibwirako abitwaga modéré batari kubasha kurokora abandi kuko nabo ntibari borohewe nikimenyimenyi mà » banyapolitiki bashyinguye i Nyanza harimo n'abahutu. So abahutu Bose siko bari bafite ubushobozi bwo kurokora abantu. Ngarutse kuri Murekezi nka PM we kugiti cye yumva ubuhamya nkubu butwunguriki haba mà » gihe cyo kwibuka cyane cyane cyangwa igusanzwe . Ça nous apporte quoi franchement KO witwaga umuhutu mais au fond uri umututsi qu' est- ce que ça peut nous faire ? Ukeneye étiquette yubwoko ubwo aribwo bwose kugirango ukoriki koko ? Bitumariyiki bitUnguyiki icyo uricyo cyose ? Umuntu usanzwe atandukanye numuyobizi surtout iyo aruwo murwego rwo hejuru kuko aba areberera abanyarwanda Bose toutes classes , religions, ethnies etc confondues uba ugomba kuvuga ibintu byubaka bose ukamagana ikibi ukilakaza ukiza utitacaye ku face kamwe na kamwe. Oui uba ugomba kugira capacité yo kubirenga sinon ukegura kuri uwo mwanya . Inshingano zabayobozi eiba zikomeye ntago bemerewe kwitwara cg kuvuga ibyo bashaka ibiri personnel bakabivuga en privé en non en public Ntago umunyarwanda akeneye kwambara umwambaro w'ubwoko Ubu nubu kugirango agire umwanya mwiza uganisha aheza igihugu. Ariko natwe ntanubwo dufite uburenganzura bwo kumwemeza KO afiye ubwoko Ubu nubu kuko sitwe twamubyaye twese twahera hé tubihakana.

Aferky

Iyo avuga ko ntawe yatabaye kandi yari abifitiye ubushobozi. Ndashimira abantu bose, biganjemwo abaturage batajijutse bahishe abantu muri genocide yakorewe abatutsi. Ashime imbabazi yahawe, ariko ntaho agaragaza ko gahunda ya leta atarayishyigikiye. Wari kuba umuntu ufite indangagaciro iyo haba nibura nagahinja warokoye, ubu kakaba kavuga gati ndiho kubwa rucagu.

Eric

Abose bavuze iki ? Mukanya nkako guhumbya turabakurikiza Rwarakabije ubuse arihe ?maze ingengabitekerezo ishirire rimwe.

Mahoro

Ariko se kubiba confusion mubo uyobora bikumariye iki ?????? Ubwoko ko tuzi ko ntaho abantu bakiburisha kuririmba ko uri umututsi bikumariye iki nka PM koko ! Ubu koko kugusimbuza Damien Mzee ntiyari hire ubusa !! Ariko abahutu babana ipfunwe ariryo rizabakiza umugayo ! Nonese ko muririmba double genocide na batutsi ni bafata uzi yitangira iki

Mitima

Nyamara Rucagu Bonidace ni umututsi niyo mpamvu aterwa ipfunwe no kuba yitwa umuhutu. Senateri Mugesera Antoine yarabicukumbuye. Murebe ku ipaji 430, Rucagu Boniface ni nomero 50 ku rutonde Senateri Mugesera Antoine yise "Lisiti y'abarimu n'abanyeshuri bitwaga ko ari abatutsi bari mu mashuri amwe n'amwe muri 1972-73" . Iyo liste ni iy'abigaga muri Seminaire St Pie X Nyundo. Ni mu gitabo "imibereho y'abatutsi kuri Repubulika ya mbere n'iya kabiri (1959-1990) cya Mugesera Antoine. Niba ari Umutahira Rucagu Boniface tumenyereye nawe azatubwire ukuntu ubu azwi nk'umuhutu wumva biteye isoni yari umututsi ku ngoma ya Kayibanda. Kereka niba iwabo barihutuje akaba umututsi none akaba yarabaye umuhutu. PM Murekezi we ngo harya yavutse mu batutsi arererwa mu bahutu none igihe cyo guhakwa cye kirageze asubiranye ubututsi bwe. None se ko uburere buruta ubuvuke ubuhutu bwe arabugungirahe ko ari nabwo bwatumye acira urwa Pilato abatutsi akiri i Burayi.Egwewe Rubanda.....ino si inda ni agahomamunwa. Nabe umugabo yegure ibyo gusaba imbabazi Abatutsi abiveho yibakina ku mubyimba by'agashinyaguro

kayihura alexis

RUSHYASHYA THANK YOU , KOMEREZA AHA, IYI NI INTAMBWE NZIZA MU GUHA ABANTU AMAKURU UBUSANZWE BAVUGIRA MU MATATAMA

Kalisa

Wowe Murekezi wibuke ko muri 1973 igihe abanyeshuri biga mu Bubiligi bandika iriya nyandiko irimo ubuswa bwinshi bwererekanaga ko mutari intellectuals abanyeshuri biga mu Bindi Bihugu barabamaganye, ariko wibuke ko kwiga mu Bubiligi bitabonaga buri wese kuko bourse yaho yari hejuru mu gihe nko mu bihugu bindi byari urusenda. Kuba Murekezi yarasinye kuri iriya baruwa kwari gusigasira imbehe ye nkuko abikora ubu. Kuri Gouvernement ya Habyarimana Murekezi yari mu myanya myiza gusa.Niba yemeza ko ari umututsi ni kuvuga ko perezida ari umututsi, Minisitiri w'intebe akaba umututsi, Perezida wa Sena akaba umututsi (50%), abayobora ingabo bakaba abatutsi.... noneho nibemeze ko ari TUTSILAND.

1 | 2

TANGA IGITEKEREZO

Kwamamaza
Kwamamaza
Also in this section
Perezida Kagame yakiriye indahiro za Depite Bitunguremye, Kalinijabo na Mukamana bose bakomoka muri RPF- Inkotanyi.

Perezida Kagame yakiriye indahiro za Depite Bitunguremye, Kalinijabo na...

Komisiyo y’Igihugu y’amatora yasimbuje abadepite batatu barimo Depite Nyandwi Désiré witabye Imana

Komisiyo y’Igihugu y’amatora yasimbuje abadepite batatu barimo Depite Nyandwi...

’Imana y’ I Rwanda mu Buhinde’-Prof. MALONGA Pacifique

’Imana y’ I Rwanda mu Buhinde’-Prof. MALONGA Pacifique

Kigali : Umugabo yafatanwe inoti z’impimbano

Kigali : Umugabo yafatanwe inoti z’impimbano

Perezida Kagame yagaragaje ko ntawe ugomba kunyurwa n’iterambere ricagase

Perezida Kagame yagaragaje ko ntawe ugomba kunyurwa n’iterambere...

NEW POSTS
Ubushinjacyaha bw’u Rwanda bwatangiye iperereza ku ruhare rw’Abafaransa 20 muri Jenoside

3-12-2016

Ubushinjacyaha bw’u Rwanda bwatangiye iperereza ku ruhare rw’Abafaransa 20...

Umuhango wo kwibuka Mucyo Jean de Dieu mu Bubiligi ( AMAFOTO )

2-12-2016

Umuhango wo kwibuka Mucyo Jean de Dieu mu Bubiligi ( AMAFOTO...

Iryavuzwe riratashye : Nahimana yasohoye inyandiko ihakana Jenoside n’abayikoze

30-11-2016

Iryavuzwe riratashye : Nahimana yasohoye inyandiko ihakana Jenoside...

UK : Abanyarwanda barokotse Jenoside babangamiwe n’abayikoze bacyidegembya

30-11-2016

UK : Abanyarwanda barokotse Jenoside babangamiwe n’abayikoze...

Padiri Nahimana arategura imyigaragambyo itemewe kuri Ambasade y’u Rwanda i Buruseli

29-11-2016

Padiri Nahimana arategura imyigaragambyo itemewe kuri Ambasade y’u Rwanda...

Urukiko Ruzemeza Aho Umugogo w’Umwami Kigeli V Uzatabarizwa

28-11-2016

Urukiko Ruzemeza Aho Umugogo w’Umwami Kigeli V Uzatabarizwa

Alice Cyusa yirukanwe k’Ubuyobozi bwa Diaspora Nyarwanda

25-11-2016

Alice Cyusa yirukanwe k’Ubuyobozi bwa Diaspora Nyarwanda

Breaking news - Nairobi : Padiri Nahimana yabujijwe kwinjira mu ndege Nairobi- Kigali

25-11-2016

Breaking news - Nairobi : Padiri Nahimana yabujijwe kwinjira mu ndege...