LATEST NEWS
New section No17
Gishali : Abaturage batangaza ko itariki ya Referendum ibatindiye ngo bitorere itegeko nshinga
Publish Date: mardi 15 décembre 2015
VISITS :195
By Admin

Abaturage batuye mu murenge wa Gishali ho mu karere ka Rwamagana baratangaza ko itariki ya Referendum ibatindiye kugira ngo bitorere itegeko nshinga. Ibi bakaba babitangarije abagize inteko ishinga amategeko umutwe w’abadepite bari babasuye mu rwego rwo kugira ngo babaganirize ku mpinduka zakozwe mu ivugururwa ry’itegeko nshinga rya Repubulika y’u Rwanda.

Guhera tariki ya 11 ukuboza 2015 kugeza tariki 16 Ukuboza 2015, abagize inteko ishinga amategeko imitwe yombi uwa sena ndetse n’uw’abadepite barimo kugenda bazenguruka mu mirenge yose igize igihugu cyacu, mu rwego rwo kugirango basobanurire abaturage iby’ingenzi mu bikubiye mu itegeko nshinga rya Repubulika y’u Rwanda ryo 03 Kamena 2003 ryavuguruwe muri uyu mwaka wa 2015.

Asobanura impamvu yatumye abagize inteko ishinga amategeko imitwe yombi biyemeza kumanuka mu mirenge gusobanurira abaturage ibikubiye mu itegeko nshinga, Hon. Depite Mwiza Esperance yabwiye abaturage bo mu murenge wa Gishali ko ibyo barimo gukora bishingiye ku itegeko nshinga rya Repubulika y’u Rwanda.

Hon. Depite Mwiza Esperance yagize ati “itegeko nshinga rya Repubulika y’u Rwanda ryo kuwa 04 Kamena 2003 nk’uko ryavuguruwe kugeza ubu mu ngingo yaryo ya 2 igika cya mbere (1) ivuga ko ‘ubutegetsi bwose bukomoka ku mbaga y’abanyarwanda’.

Byongeye kandi, mu gika cya gatatu (3) cy’iyo ngingo kivuga ko ‘ubutegetsi bw’igihugu ari ubw’imbaga y’Abanyarwanda, bakoresha ubwabo binyuze muri Referendumu cyangwa binyuze mu babahagarariye.

Ikiyongera kuri ibi, Abanyarwanda bagera kuri miliyono eshatu n’ibihumbi Magana arindwi na mirongo inani na bine na Magana atanu na mirongo inani na batandatu (3,784,586) bo mu byiciro bitandukanye, bandikiye inteko ishinga amategeko bayisaba ko ingingo y’101 y’itegeko nshinga yahindurwa.

Tumaze kumva, kwakira no gusesengura ubusabe bwanyu, twasanze bufite ishingiro. Ubu tukaba tuje kubereka uko twashyize mu bikorwa ibyifuzo mwatugejejeho.”

Ku bijyanye na zimwe mu mpinduka zakozwe, Hon. Depite Nyinawase Jeanne d’arc, yahereye ku kijyanye na manda z’umukuru w’igihugu, maze abaturage babyakiza amashyi y’urufaya.

Hon. Depite Nyinawase Jeanne d’arc yagize ati “inteko ishinga amategeko imaze gusesengura ibyifuzo by’abaturage byose, inashingiye nanone ku igenamigambi ry’iterambere, yahisemo guha agaciro ibyifuzo by’abaturage byose maze ibikemurira mu ngingo y’101 n’iy’172.

Iy’101 yahamijemo ihame rya manda zifunze ariko z’imyaka 5, iya 172 ishyiraho ihame ry’uko ibivugwa mu ngingo y’101 bizatangira gukurikizwa nyuma y’imyaka 7 ibarwa guhera 2017, kugira ngo gahunda z’iterambere igihugu cyihaye zibanze zigire umusingi ukomeye mbere yo gutangira manda y’imyaka 5”

N’amatsiko menshi, Abaturage babajije niba Nyakubahwa perezida wa Repubulika Paul Kagame azagira uburenganzira kuri izo manda z’imyaka 5. Hon. Depite Nyinawase Jeanne d’arc yabasobanuriye ko ibiteganywa mu ngingo y’172 bivuze ko perezida wa Repubulika Paul Kagame, abyemeye yakwiyamamariza manda y’imyaka irindwi izakurikira.

Iyo manda ikaba yemerewe n’undi wese watorwa n’abaturage, kandi ko uzaba yatorewe iyo manda izarangira muri 2024, azaba ashobora kwiyamamariza manda izakurikira y’imyaka 5 ishobora kongera inshuro imwe binyuze mu matora.

Nshimiyimana Felicien, Ni umuturage utuye mu murenge wa Gishali ho mu karere ka Rwamagana, akaba yarashimiye abadepite ko babatumikiye kandi abizeza ko bazatora itegeko nshinga nk’uko bikwiye. N’amarangamutima menshi, Nshimiyimana Felicien, yagize ati “jye nta kindi navuga uretse gushimira. Burya iyo ushaka ikintu kandi kiri aho utagera, ugatuma, burya usigara ufite impungenge utekereza ko wenda abo watumye batakugereza ubutumwa bwawe aho wabwohereje ndetse no kuwo wabugeneye.

Ariko ikintu kinshimishije kandi kinteye no gushimira aba badepite ni uko twabatumye bakadutumikira, natwe rero ku itariki 18, inkoko niyo ngoma tukajya kwitorera itegeko nshinga. Ahubwo umunsi uratinze ! Iyaba ari nk’ejo !”

Umuyobozi w’Akarere ka Rwamagana Bwana Uwizeyimana Abdoul Karim akaba yarasabye abaturage batuye uyu murenge wa Gishali ndetse n’abandi baturage bo mu karere ka Rwamagana gukomeza kwitegura amatora ya Referendum neza ndetse no kuzayitabira bose, dore ko impamvu zayo zishingiye ku byifuzo byabo bagejeje ku nteko ishinga amategeko.

Biteganyijwe ko kamarampaka ariyo matora y’itegeko nshinga azwi ku izina rya Referendumu azatangira kuwa kane tariki 17 Ukuboza 2015 hatora Abanyarwanda baba mu mahanga naho kuwa gatanu tariki 18 Ukuboza 2015, hakazatora abanyarwanda bose baba mu gihugu bagejeje igihe cyo gutora.

IBITEKEREZO

TANGA IGITEKEREZO

Kwamamaza
Kwamamaza
Also in this section
EAPCCO na Polisi y’u Butaliyani basinye amasezerano y’ubufatanye

EAPCCO na Polisi y’u Butaliyani basinye amasezerano y’ubufatanye

Polisi y’u Rwanda na Uganda zakoranye inama yo gukomeza ubufatanye hagati yazo

Polisi y’u Rwanda na Uganda zakoranye inama yo gukomeza ubufatanye hagati...

Abayobozi bakuru berekeje i Gabiro mu mwiherero [ AMAFOTO ]

Abayobozi bakuru berekeje i Gabiro mu mwiherero [ AMAFOTO ]

Tito Rutaremara Yatangaje ko kwambara Bikini kubakobwa atabibonamo ikibazo

Tito Rutaremara Yatangaje ko kwambara Bikini kubakobwa atabibonamo...

NEW POSTS
Abava muri FDLR bose bagaragaza gucikamo ibice gukomeye

29-04-2017

Abava muri FDLR bose bagaragaza gucikamo ibice gukomeye

Perezida Kagame yasabye ko kubwira abakobwa bagiye gushyingirwa ko bazahura n’ibibazo bikwiye gucika

23-04-2017

Perezida Kagame yasabye ko kubwira abakobwa bagiye gushyingirwa ko bazahura...

Perezida wa Guinea, Alpha Condé yasabye bagenzi be kwitandukanya n’u Bufaransa

21-04-2017

Perezida wa Guinea, Alpha Condé yasabye bagenzi be kwitandukanya n’u...

Ijambo Perezida Kagame yavuze atangiza #Kwibuka23 uko ryakabaye n’Ubutumwa burikubiyemo

18-04-2017

Ijambo Perezida Kagame yavuze atangiza #Kwibuka23 uko ryakabaye n’Ubutumwa...

U Rwanda ku mwanya wa cyenda ku Isi mu bihugu bifite umutekano usesuye

17-04-2017

U Rwanda ku mwanya wa cyenda ku Isi mu bihugu bifite umutekano...

New- RNC na RNC Ishaje : Mu bikorwa bipfobya bikanahakana Jenoside yakorewe Abatutsi

16-04-2017

New- RNC na RNC Ishaje : Mu bikorwa bipfobya bikanahakana Jenoside...

Ubuhamya bw’Umusilikare wa Habyarimana wahungishije Abatutsi 18 akabageza i Burundi

14-04-2017

Ubuhamya bw’Umusilikare wa Habyarimana wahungishije Abatutsi 18 akabageza i...

Umufasha wa Gen Castal arahamya ko yamenye ko abatutsi bagiye kwicwa ndetse na Perezida Habyarimana

13-04-2017

Umufasha wa Gen Castal arahamya ko yamenye ko abatutsi bagiye kwicwa ndetse...