LATEST NEWS
MU RWANDA
Ibibazo by’Uburezi mu Rwanda
Publish Date: lundi 14 novembre 2016
VISITS :467
By Admin

Kuva RPF inkotanyi iyobora mu Rwanda ifatanije n’andi mashyaka cyangwa imitwe ya politiki nka MDR, PSD, PL n’ayandi, minisiteri zitandukanye zagiye zihindurirwa abayobozi harimo n’izo abantu bakunze kwita minisiteri zikomeye nka minisiteri y’ingabo, minisiteri y’imari, minisiteri y’ububanyi n’amahanga.

Muri izi minisiteri n’izindi zizwi, nubwo zagiye zihindura amazina, izi ntabwo zihindura ahubwo hongerwaho ijambo ariko umusingi cyangwa igishyitsi ntigihinduka.

Ni ingabo, imari, ububanyi n’amahanga. nibyo rero iyo ufite ingabo, ukagira imari, ukabana n’abantu ibindi bigenda neza kuko uba ufite umutekano, uba ufite ubukire cyangwa umutungo kandi ubana neza, wirinda kandi ukamenya ibyo hanze cyangwa nyuma y’urugo mu baturanyi, abagenzi n’abanyamahanga kuko no mu Kinyarwanda abanyamuhana n’ibimanuka iyo utabarebye neza niho hava ingasire mbi n’imbeba y’uruhuga ndetse n’abatera iwawe.

Ibindi byubaka urugo, umuryango, agasozi n’igihugu byubakira kuribyo. Ibi kandi nicyo kimwe na minisiteri kuko gishingira ku miyoborere, ubutunzi n’icyerekezo cyabatuye igihugu cyangwa abaturarwanda n’abanyarwanda.

Minisiteri y’uburezi ishinzwe kurera no kwigisha abanyarwanda. Mugusesengura ibibazo by’uburezi mu Rwanda, nahereye ku nama y’abayobozi b’uburezi mu gihugu. Naganiriye nabo kuya 10 ugushyingo 2016 aho nahuye na bamwe bavuye mu nana kuri hoteli chez Lando iri mu mujyi wa Kigali. Iyi nama yarimo abayobozi batandukanye barimo abo muri minisiteri harimo n’umunyamabanga uhoraho wayo, abayobozi baza kaminuza, harimo n’izigenga nk’iyitwaga INATEK ubu yitwa UNIK n’izindi.

Minisitiri w’Uburezi, Dr Musafiri Papias Malimba

Harimo kandi abayobozi bakuru ba Rwanda Education Board (REB) ikigo cy’igihugu gishinzwe uburezi n’imyigire n’imyigishirize mu Rwanda ndetse n’abaterankunga n’abafatanyabikorwa mu burezi.

Ikibazo : kuki ibibazo mu burezi bidakemuka ? Kuki iyi minisiteri iyoborwa n’abahanga ariko ibibazo ntibikemuke ?

Nawe se reba abaminisitiri bamaze kuyiyobora mu myaka makumyabiri gusa, nabo ni nka makumyabiri.
Mr. BIZIMANA J.P.
Mr. NGIRABANZI
Mr. MUDIDI
Mr. MUREKERAHO
Mr. RWAMUKWAYA
Mr. NSENGIYUMVA Albert
Mr. Pierre Cel. RWIGEMA
Mr. MUTSINDASHYAKA
Dr. HABUMUREMYI P. D.
Dr. HAREBAMUNGU
Dr. NTAWUKURIRYAYO
Dr. GAHAKWA
Dr. MURIGANDE
Dr NSENGIMANA
Dr KAREMERA
Dr Jeanne d’Arc MUJAWAMARIYA
Dr MUSAFIRI
Prof MURENZI
Prof. RWAKABAMBA

Aba baminisitiri ni abantu bazwiho kuba ari abahanga mubyo kwigisha, ubushakashatsi ndetse n’umuco n’ubujyanama. Ikigo cya Rwanda Education Board (REB) gishinzwe gutegura no kumenya inyigisho, gishinzwe gutegura no gutanga ubumenyi, gishinzwe kandi no gukurikirana imiyoborere myiza mu mashuli n’imyigire n’ibindi birebana n’uburezi, nubwo ari gishya nacyo kiyobowe n’abantu bamenyerewe mu burezi ndetse hari n’abayoboye ibigo by’abihaye cyangwa abavugabutumwa n’amadini y’abagaturika, abadivantisiti, abaporoso n’abandi.

Abagerageza kuganira no gusesengura uko ikibazo giteye no kumenya impamvu, bavuga ibintu bitatu. Icyambere bati ni system : bisobanura umuyoboro bakoreramo, nanjye nti reka da ! Sibyo.

System y’u Rwanda n’inkotanyi imeze neza rwose nta kibazo ifite ahubwo abatayizi batanasesengura nibo bicwa no kutayimenya bakavuga ibyo. Kuko mu ngabo ikora neza,mu mari ikora neza no mububanyi ikora neza !

Abandi bati ni ubuswa no kutabaza !

Nanjye nti yego ! Nkongera nti oya ! Ubwo rero ni byombi.

Harimo ubuswa bwa bamwe no kutabaza kw’abandi. Abaswa ni nkabo umuntu agana akabereka ibitagenda ndetse akanabagira n’inama ntibashake kumva cyangwa ngo bashishoze barebe icyo inama ubagira iganishaho, ahubwo bagatsimbarara ku kwitwa abayobozi cyangwa ba Diregiteri.

Ati jyewe nshinzwe imfashanyigisho cyangwa iki n’iki ibyo umbwiye ntibindeba. Undi ati jyewe nshinzwe ibizami ntabwo imyigire indeba. Ndetse hari n’abagera muri iyo myanya bakabona ko ba minisitiri babayobora ntacyo babarusha ibyo bababwiye bakabyumva ariko ntibabikurikize bati natwe twayobora. Bakaba bigize ba kaganga, uburezi bukahazaharira.

Ikibazo rero nyacyo ntigishingiye kubuswa ahubwo gishingiye k’umugani w’ikinyarwanda ugira uti : “intabaza irira ku miziro.” Abayobozi b’uburezi aho bava bakagera nibite ku bintu bitatu bikurikira cyane cyane abo mu rwego rwa minisiteri n’aba REB :

Mwarimu cyangwa umwigisha

Umunyeshuri cyangwa uwiga

Icyigwa cyangwa inyigisho n’imfashanyigisho naho yigira !

Ntabwo umuyobozi w’uburezi ugendera mu modoka imeze cyangwa ijya kumera nk’indege, bazanira icyayi n’umugati usize buri nyuma y’amasaha abiri azibuka aho yigiye cyangwa ahasa naho cyereka nacisha bugufi akaganira no kumva ibitekerezo byabarugana.

Kugirango uburezi bugende neza nuko nawe yabazwa igihe aherukira gusura amashuri asa nayo yizemo, akamenya ibibazo bihari byibura akibonera hamwe na hamwe uko imibereho ya Mwarimu n’umunyeshuri imeze !

Abayobozi ba REB n’abayobozi bandi ba minisiteri n’ibigo bikuru by’amashuri nibashake “uruvugiro” n’uburyo babona cyangwa bumva ababyeyi, abarimu n’abanyarwanda muri rusange, icyo bavuga ku nyigisho zitangwa, ibitabo bikoreshwa aho kwita ku masoko cyane, rimwe na rimwe akurura irari ry’amafaranga na ruswa yambaye igishura cyangwa isinde cyangwa ingofero !

Abayobozi b’uburezi guhera kubo hejuru muri minisiteri na REB byaba byiza bagerageje gushyiraho urubuga rw’ibitekerezo no gusesengura ibyo abafatanyabikorwa nu burezi bavuga kandi bagashyiraho itsinda ry’ubushakashatsi mu burezi “Education system research & Evaluation” ibi byashoboka kandi abitwa “Board” y’uburezi iteye intambwe ikajya iterana no gushyiraho ingamba zifatika kuko hari ibidindira byinshi kubera ko bamwe mu babishinzwe bategereje ko ngo board iterana, kuko aho mfite gihamya, umuyobozi wagejejweho ibintu ngo abyigeho, nyuma y’amezi umunani agasubiza ko ategereje ko board iterana ngo atange igisubizo !

Harageze ko Uburezi mu Rwanda bagisha inama zisesuye, bagakora kandi bagakoresha ubushakashatsi n’ubushishozi no kungurana ibitekerezo nkuko umwanditsi w’iyi nkuru yabiganiriye n’umwe wari muri iyo nama yo kuwa 10 Ugushyingo 2016.

Umwanditsi w’iyi nkuru amaze imyaka 30 yigisha kandi akaba n’umushakashatsi.
Prof. Pacifique MALONGA

IBITEKEREZO
Eric

Nyuma yuko mbonye abana bo mu mwaka wa mbere w'amashuri abanza batsindwa ururimi kavukire"ikinyarwanda" nk'umwalimu, nanditse igitabo nagishyikiriza he ngo nanjye ntange umusanzu wanjye ?

PETER

Mwarimu buri munsi asabwa gushaka icyakunganira umushahara kugira ngo ashobore kubaho, bityo iyo ari kwirwanaho ntabona umwanya uhagije wo kwita kumwuga we. Gufatanya kwigisha no gushaka icyamuteza imbere bigira ingaruka kubyo ageza kubana iyi ni imwe mu mpamvu dukunze guca iruhande kand ikomeye.

JOHN

Iyo ibibazo bigeze muburezi birakwama. Tekereza igihe gishyize cabinet yemeje umushinga w'itegeko rishyiraho sitati yihariye y'abarimu. Habuze iki ngo isohoke mugazeti ya leta ?

PETER

REB ishobora kuba itekinika. Muri Kanama 2015 yavugaga ko ibitabo bishya bijyanye na competence based curriculum bizaba Bihari muri Mutarama 2016 mumyaka itangira icyiciro. Ikibabaje ni uko umwaka urangiye amasomo menshyi mwarimu yigisha ibyo yishakiye. Ingero muri S1 nta gitabo cya Literature in English, nta English, Entrepreneurship, History, ....Uko bigaragara aba bana baziga muri S2, banarangize S3 abarimu birwanaho kuko n'amasomo ibitabo byashoboye kuboneka byaje mugihembwe cya kabiri bityo ntibyakoreshejwe neza.

Ngunda

Njye ikibazo nkibona mu gutesha agaciro Mwarimu. Kuva navuka kugeza ubu (mfite imyaka 40) nagiye mbona abantu bajya kwigisha ngo kuko babuze akandi kazi. Nukubera iki ? ubwo se akazi uzajya gukora kuko wabuze akandi ubwo uzagakorana umurava !!!!! Abantu bose barangiza muri KIE bajya mu burezi nyuma y'imyaka nibura 2 baba bamaze birirwa bashakisha akazi katari muburezi bakabura bakabona kujya kwigisha. Mwarimu nahabwa agaciro byose bizashoboka

Umuhinzi-Mworozi.

Urakoze cyane Teacher we ! Nibyo koko ikibazo gihari ni icy'imyigishirize, ntabwo ari ikibazo cy'imyigire. Ntabwo bishobora kumvikana ukuntu umunyeshuli yakwitabira adasiba ishuli yicara imbere ya mwalumu ngo abure kwumva ibyo yigishwa ! Nibyo ko ko ubivuze ukuri rwose ko abana bazarushaho gutsinda cyane nibarya bagahaga, ariko ibyo bisa nk'aho biri kugenda bijya mu buryo. U Rwanda ni kimwe mu bihugu bifite ibiyaga bigari ndetse n'imigezi myinshi, niyo mpamvu iby'ubuhinzi n'ubworozi nkwijeje ntashidikanya ko bigomba kubonerwa umuti . Nitwinjira mu bihe by'izuba ryinshi, tuzayobya imwe mu migezi dufite ariko twuhire. Umuriro w'amashanyarazi nawo mbona uri gukwirakwira mu Rwanda rwose, mbona no mu byare by'inyoni uzanyuramo rwose. UBUREZI INKINGI Y'ITERAMBERE RIRAMBYE.

Teacher

Ikibazo kiri mu burezi, si ikibazo cy'imyigire, ahubwo ni ikibazo cy'imyigishirize. Imfashanyigisho zitegurwa na REB/MINEDUC ni nziza rwose kuburyo uburezi bwagateye imbere ndetse cyane. Ariko imyigishirize niyo iteje ikibazo gikomeye. Ni ngombwa ko abarezi bashyira imbere ubunyamwuga bwabo, bakabubyaza umusaruro. Njyewe njya kwiga uburezi sinigeze nibaza ngo ese nzahembwa angahe, nzayamaza iki ; oya. Ahubwo nabwize(uburezi) nshaka gushyira imbere uburezi, ku buryo u Rwanda mu myaka iri imbere ruzaba rufite abanyabwenge nk'uko natwe tubufite. Ikindi gikomeye kandi mukubangamira uburezi, u Rwanda ruracyari mu nzira y'amajyambere ; nihaboneka ingufu z'umuriro ku bigo by'amashuli byose hanyuma na ministeri y'ubuhinzi n'ubworozi ikarimbura ikibazo cyo kujya ku ishuli k'umwana ashonje tuzaba twasubijwe !


TANGA IGITEKEREZO

Kwamamaza
Kwamamaza
Also in this section
Richard Muhumuza yavanwe ku mwanya w’Ubushijacyaha Bukuru, akazasimburwa na Mutangana J.B

Richard Muhumuza yavanwe ku mwanya w’Ubushijacyaha Bukuru, akazasimburwa na...

Polisi y’u Rwanda na TIGO basinyanye amasezerano ku gutahura ibyaha

Polisi y’u Rwanda na TIGO basinyanye amasezerano ku gutahura...

Muhanga : Umushoferi afunzwe akurikiranyweho guha umupolisi ruswa

Muhanga : Umushoferi afunzwe akurikiranyweho guha umupolisi...

Muri ULK : Abanyeshuri 2986 bahawe impamyabumenyi

Muri ULK : Abanyeshuri 2986 bahawe impamyabumenyi

NEW POSTS
Umudiho uva mu itako

10-12-2016

Umudiho uva mu itako

Seyoboka ushinjwa Urupfu rw’Abanyapolitiki Kameya ( PL) na Dr. Gafaranga ( PSD) yakatiwe gufungwa by’agateganyo

8-12-2016

Seyoboka ushinjwa Urupfu rw’Abanyapolitiki Kameya ( PL) na Dr. Gafaranga (...

Abikorera bagaragarije Umukuru w’Igihugu Paul Kagame ikibazo cy’inyubako ziri kuzamurwa zidafite abazikoreramo

8-12-2016

Abikorera bagaragarije Umukuru w’Igihugu Paul Kagame ikibazo cy’inyubako...

( VIDEO ) y’Ivanjiri ya Padiri Nahimana Thomas ushaka kuba Perezida w’u Rwanda

8-12-2016

( VIDEO ) y’Ivanjiri ya Padiri Nahimana Thomas ushaka kuba Perezida w’u...

Perezida Kagame yahawe igihembo n’Umuryango w’Abibumbye kubwo kurengera ibidukikije

7-12-2016

Perezida Kagame yahawe igihembo n’Umuryango w’Abibumbye kubwo kurengera...

Muri RNC : Umwotsi uracyacumbeka hagati ya Kayumba na Rudasingwa

5-12-2016

Muri RNC : Umwotsi uracyacumbeka hagati ya Kayumba na Rudasingwa

Burundi : Ubufaransa inyuma y’ inyeshyamba izwiho no kuvangura amoko, nk’ ikiraro cyo kujegeza Leta y’Urwanda

5-12-2016

Burundi : Ubufaransa inyuma y’ inyeshyamba izwiho no kuvangura amoko, nk’...