LATEST NEWS
MU RWANDA
Inzira ndende Gen. Rwarakabije yanyuze atahuka mu Rwanda
Publish Date: jeudi 5 novembre 2015
VISITS :1506
By Admin

General Rwarakabije Paul, Komiseri Mukuru w’Urwego rw’Igihugu rw’Amagereza (RCS), yavutse taliki 15 Mata 1953, mu murenge wa Kintobo mu karere ka Nyabihu, hahoze ari muri perefegitura ya Ruhengeri, ubu ni mu Ntara y’Uburengerazuba.

Yize amashuri abanza i Busogo, kuva mu 1961 kugeza mu 1967, amashuri yisumbuye yayakomereje muri Koleji Inyemeramihigo, ubu ni mu karere ka Rubavu, aho yize icyiciro rusange imyaka 3, akomereza muri Koleji St Andre i Nyamirambo mu Mujyi wa Kigali, asoza amashuri yisumbuye mu 1973.

Nyuma y’amashuri yisumbuye Gen. Rwarakabije yinjiye mu ishuri rikuru rya Gisirikare (Ecole Superieur Militaire), aho yize imyaka 4 asoza mu 1977, asohoka abonye ipeti rya Sous-Lieutenant kandi asohokana n’impamyabumenyi yo ku rwego rwa Licence mu bya gisirikare no mu bijyanye n’imbonezamubano (Social sciences).

Imwe mu mirimo Gen. Rwarakabije yakoze

Nyuma yo kurangiza amashuri ya gisirikare, Gen. Rwarakabije yoherejwe mu gihugu cy’u Bufaransa kwiga ibijyanye n’itumanaho rya gisirikare, agaruka akorera muri Jandarumori y’igihugu, ahakora nk’ushinzwe icungamutungo .

Nnyuma y’umwaka umwe yimuriwe muri Minisiteri y’Ingabo nabwo akomeza kuba umucungamutungo aza kuhavana ipeti rya Lieutenant mu 1979.

Ati “ Muri Minisiteri y’Ingabo sinahatinze, nahamaze amezi atatu, nsubira kwiga ibijyanye n’icungamutungo mu gihugu cy’u Bubiligi, mpamara umwaka kugeza mu 1980.”


Komiseri Mukuru w’Urwego rw’Igihugu rw’Amagereza Gen Paul Rwarakabije.

Muri 1982 yahawe ipeti rya Kapiteni, yavuye muri Etat Major ya Jandarumori ashingwa umutwe w’ubwubatsi.

Ati “ Ubwo nahise mba umwubatsi n’ubwo ntari injeniyeri.”

Yakomeje gukora muri iyo serivisi kugeza mu 1989, aho yaje kuva mu by’ubwubatsi ajya muri serivisi ya jandarumori yitwa Groupe Mobile, akaba ari unite ingana n’ibatayo ku rwego rw’ingabo z’igihugu.

Yaje guhabwa ipeti rya komanda, ariko yahise yoherezwa mu ishuri rikuru rya Gisirikari i Kigali, asoza amasomo ajya mu rugendoshuri mu Bubiligi, agaruka muri 1990, ari na bwo yahawe ipeti rya Majoro.

Yarwanye urugamba n’ingabo zahoze ari iz’Inkotanyi

Rwarakabije avuga ko urugamba yarugiyeho ku munsi wa kabiri w’intambara, ubwo ingabo z’u Rwanda icyo gihe zarwanaga n’iz’Inkotanyi.

Yarumazeho iminsi ine, agaruka i Kigali, ashingwa guherekeza amakamyo ajya kuzana ibicuruzwa mu Buganda agiye i Mombasa andi anyura ku Rusumo ajya Dar-es-salaam, mu kwezi kwa 11 yasubiye ku rugamba, aho barwaniraga muri Pariki y’Akagera, bagerageza gusubizayo icyo gitero cyari kije.

Ati “ Urugamba twarwanye n’ Inkotanyi ntirwari rworoshye, kuko uko inkotanyi zateye si ko zakomeje kurwana, kuko nyuma zatangiye gutera mu buryo bw’udutero duto duto (guerrira) tutari tumenyerewe kandi dukwiye mu gihugu hose.”

Byabaye ngombwa rero ko hinjizwa mu gisirikare abandi benshi, imibare iba myinshi, ku buryo gukurikirana imyitwarire y’abari binjiye bitari byoroshye kongeraho politiki y’amashyaka menshi kandi atavuga rumwe, biza kurangira batsinzwe urugamba.

Politiki itarajyanaga n’igisirikare, ni imwe mu mpamvu yo gutsindwa

Asanga icyatumye batsindwa byaratewe n’uko igisirikare cyari ukwacyo na politiki ikaba ukwayo, bidahuje kandi abantu bacikamo ibice, haba mu gisirikare n’abaturage ubwabo.

Ati “ Abari batuyoboye icyo gihe ntibigeze batwarira hamwe intambara ya Politiki n’igisirikare mu gihe abo barwana byari ikinyuranyo.”

Avuga ko muri RPA politiki n’igisirikare byari ikintu kimwe ku buryo ari na cyo Inkotanyi zatsindishije iyo ntambara.

Ati “ Burya iyo politiki igenda nabi bituma n’igisirikare kitagenda neza.”

Rwarakabije agaruka ku cyiciro cy’urugamba, ubwo Inkotanyi zateye ziturutse mu Ruhengeri, zigera kuri Base, Rulindo, Shyorongi, hari mu 1993, hafi y’i Kigali.

Ati “ Icyo gitero cyanabaye ikintu kitwereka ko gusubira inyuma kw’Inkotanyi bitoroshye ndetse bitanashoboka kuko rwose bari bageze i Kigali, byatanze icyerekezo cy’uko intambara ibabeyere nziza.”

Inzira y’ishyamba kuri Gen. Rwarakabije

Rwarakabije avuga ko bamaze gutsindwa urugamba, we n’abandi bahungiye mu gihugu cya Kongo cyitwaga Zaire icyo gihe, hari mu 1994 aba mu nkambi kugeza 1996.

Avuga ko bakomeje imyitozo mu nkambi harimo n’abasirikare benshi, kuko izari ingabo zose za FAR zari zihari ari nyinshi kandi zitoza.

Ati “ Ingabo zabanje gushyirwa mu makambi, ari naho twakomereje imyitozo yo gutera igihugu.”

Akomeza avuga ko ubwo biteguraga gutera igihugu, ari bwo ingabo z’u Rwanda icyo gihe zaje zisenya inkambi zose, abantu baratatana zikomereza i Kinshasa gufasha uwitwaga Laurent Desiré Kabila.

Nyuma yo gutatanywa n’Ingabo z’u Rwanda, bamwe batashye mu gihugu nk’abandi baturage, abandi bakomeza bajya mu bindi bihugu birimo Zambiya, Santrafurika, Congo Brazzavile, Angola no mu bindi bice bya Kongo nka Kisangani na Kinshasa, ariko Gen. Rwarakabije we yagumye i Masisi na Rutshuru.

Gen. Rwarakabije avuga ko bongeye kwisuganya uko bari basigaye bahabwa imbaraga n’uko babonaga ko Ingabo z’u Rwanda zigiye i Kinshasa, batekereza kuzica mu rihumye bagatera u Rwanda .

Ati “ Ingabo z’u Rwanda twamenye ko zikomeje i Kinshasa gufasha Laurent Desiré Kabila natwe twigira inama yo kuzica mu ryahumye tugatera.”

Akomeza avuga ko ubwo baje gutera, ariko ntibagere ku ntego kuko ingabo z’u Rwanda zaje kubasubiza inyuma.

Avuga ko baje kugira amahirwe, Kongo ikaza guhinduka u Rwanda muri gahunda bari bafatanyije y’intambara na Laurent Desiré Kabila, biba ngombwa ko u Rwanda ruva muri Kongo rugataha, ibyo ngo byabongereye imbaraga .

Ubwo baje kugirana ubucuti na Kinshasa ibasaba kubafasha urugamba rwo kurwanya u Rwanda.

Ati “ Icyo gihe byaratworoheye kugirana umubano na Leta ya Kongo.”

Intambara y’abacengezi ntiyabahiriye

Gen. Rwarakabije avuga ko baje gutegura gutera u Rwanda ari nayo ntambara yiswe iy’abacengezi. Hari mu mwaka wa 2003 ubwo bongeye kwisuganya bifatanya n’abari mu burengerazuba bwa Kongo.

Gusa Gen. Rwarakabije avuga ko bateye baturutse mu bice bya Gisenyi na Ruhengeri, ariko na bwo bagasubizwa inyuma n’ingabo z’u Rwanda.

Ati “ Twarateye ariko ntitwabashije kugira aho tugera, kuko twasanze ingabo z’u Rwanda zaratwiteguye, nuko turarwana ariko zidusubiza inyuma.

Ati “ Twanasanze zarahinduye uburyo bwo kurwana kuko zitigeze zica abantu , ahubwo zarafataga zikabajyana mu ngando muri za Mudende na Nkumba.”

Icyo gihe bari bateye ari ibihumbi nka 3, babatwaramo abagera nko ku gihumbi magana inani, bamwe babajyana mu gisirikare abandi babohereza mu miryango yabo. Ibyo na byo ni bimwe mu byabaciye intege.

Gen. Rwarakabije ni we wagiriye abandi inama yo gutaha

Gen. Rwarakabije avuga ko nyuma yo gucika intege no kubona ko bitoroshye gutsinda urugamba barwanaga n’ingabo z’u Rwanda yaje kugira inama abasirikare bari bafatanyije urugamba.

Ati “ Mureke tureke uru rugamba kuko badutsinze dufite byose, ubu si bwo tuzarushobora.”

Yaberetse inzira zishoboka ati “ Ko barimo guhamagarira abantu gutaha mwaretse tukarekera aho tugataha.”

Abandi bati “ Oya reka tugerageze, wenda habeho imishyikirano.”

Rwarakabije abasubiza ati “ Iby’imishyikirano byo mubyibagirwe kuko bidashoboka, mbere byashobotse kuko ingufu zasaga n’izingana, ubu se murabona imishyikirano yashingira ku ki ?”

Inzira yo gutaha mu Rwanda

Nyuma yo kutumvikana ku gutera u Rwanda n’abo bari bari kumwe, Gen. Rwarakabije yaje kwigira inama yo gutaha, cyane ko hari n’abandi yari yabonye ko babishaka.

Avuga ko icyo gihe yari yaratangiye kuvugana na bamwe mu basirikare b’u Rwanda, cyane Gen. Kabarebe wari Umugaba Mukuru w’Ingabo z’u Rwanda icyo gihe.

Ati “ Twagiye tuvugana kenshi na Gen. Kabarebe ariko mu ibanga.”

Rwarakabije avuga ko batangira kuvugana bitaboroheye, kuko buri wese yavugaga yizigama ngo atavuga byose, ariko nyuma baje kwirekura.

Ati “ Gen. Kabarebe yambwiye ko nkwiye kuzana ingabo mfite zikazivanga n’izo afite mu gihugu tugakora igisirikare gikomeye, aho guhora turwana kandi twese turi Abanyarwanda.”

Yageze naho ambwira ngo ohereza ingabo nke zize zirebere.

Gen. Rwarakabije avuga ko abo yagerageje kubwira bose ngo bajye mu Rwanda kureba uko bimeze bamutsembeye, baranga.

Amaze kwemeranya na Gen. Kabarebe ku bijyanye no gutaha, Gen. Rwarakabije avuga ko yigiriye inama yo kubeshya abasirikare be ko bagiye kujya kuganira n’ingabo z’u Rwanda kandi ko bazahurira i Bukavu.

Yafashe bamwe mu basirikare bari kumwe akurikije uko abazi neza batari bumuhindukirizeho imbunda ngo bamurase.

Yafashemo abagera ku 110, baragenda, bageze ku kiraro cya Rusizi babaye nk’abikanga, umwe muri bo ashaka kurasa, ariko ntiyarashe kuko yabonaga ko nta cyo yakora.

Rwarakabije avuga bageze mu Rwanda mu gihe cya saa saba z’ijoro, bakirwa na Gen. Gumisiriza, icyo gihe yari akiri Col., bahamaze iminsi mike ni bwo bamwurije indege we na bamwe mu basirikare ba ba Ofisiye bamujyana i Kigali.

Isomo yavanye mu ntambara yarwanye

Gen. Rwarakabije avuga ko intambara yarwanye mu mashyamba ya Kongo yamusigiye isomo rikomeye, cyane ko muri icyo gihugu yahatakarije umugore n’abana be 3, undi umwe we akaba ari kumwe nawe ndetse ko yanamushyingiye.

Agaruka kuri Jenoside yakorewe Abatutsi mu Rwanda mu 1994, ababazwa n’Abatutsi bayitikitiyemo. Isomo rikomeye nakuyemo ni uko iyo abantu batatanye, ibintu biba bibi, ariko iyo bafatanye mu nda byose bigerwaho.

Icyo Rwarakabije yishimira nyuma yo kugaruka mu Rwanda

Rwarakabije avuga ko yishimiye gutaha mu Rwanda n’ubwo atari yarigeze atekereza ko yarugarukamo.

Bimwe mu byo yashimye cyane ni uko yabonye Abanyarwanda babanye neza, bafatanya kuri byose, mu mashuri abana biga kandi nta kurobanura.

Avuga ko nanone yishimiye cyane uburyo yakiriwe mu Rwanda neza kandi akanagirirwa n’icyizere, aho yabanje guhabwa kuyobora Komisiyo y’igihugu yo gusubiza mu buzima busanzwe ingabo zavuye ku rugerero, aho yamaze imyaka 6, nyuma aza kongera kugirirwa icyizere na Nyakubahwa Perezida Paul Kagame anashimira cyane akamugira Komiseri Mukuru w’Urwego rw’igihugu rw’amagereza (RCS).

Ati “ N’ubu njya nibaza ukuntu abantu bamfashe neza narashwanye nabo, bakamfata nk’uko abandi batigeze bamfata bikantera ishema n’ibyishimo, ibyo ni ibitangaza kuri jye.”

Gusoma no kumva radiyo ni byo by’ibanze kuri we

Uyu muyobozi avuga ko icy’ibanze kuri we ari ugukurikira amakuru, mu binyamakuru no kuri radiyo.

Yongeraho ko mu mikino akunda kureba umupira w’amaguru kuri televiziyo, naho mu mafunguro akunda ibiryo bya kinyarwanda.

Rwarakabije akomeza kugira inama abakiri mu mashyanba ya Kongo kuvayo kuko mu gihugu ari amahoro kuko asanga nta cyo bazageraho.

Ati “ Ndabasaba kureba kure no kugira ubwenge bakava mu byo barimo bagataha mu mahoro kuko gutaha ku mbaraga ntacyo bizabagezaho, cyane ko badateze gutera u Rwanda ngo batsinde iyo ntambara.”

IMVAHO NSHYA

IBITEKEREZO
faustin

wowe umubaza abo yazanye nabo warabashatse ntiwababona ibyo nibihuha bikomeza kubagila ingwate uwomusaza yabaye intwali kandi ulabonako yamenye ukuli imbalagaze nubwengebwe bilimo kubaka igihugu

Pundit

@nzuri......yababona rwose !! kuko natwe twese turababona !! uragirango nguhe nka list y'abantu 50 twiriranwa ? bari mu kazi kabo bisanzwe ?....gusa ntago ari inshingano zanjye.....icyo nzi ni uko abantu mudakunda kwemera ,n'iyo nabakubwira wavuga ko ndimo kubeshya.

nzuri

Ubu uwamubaza aho abo yatahanye bari yababona.!


TANGA IGITEKEREZO

Kwamamaza
Kwamamaza
Also in this section
Richard Muhumuza yavanwe ku mwanya w’Ubushijacyaha Bukuru, akazasimburwa na Mutangana J.B

Richard Muhumuza yavanwe ku mwanya w’Ubushijacyaha Bukuru, akazasimburwa na...

Polisi y’u Rwanda na TIGO basinyanye amasezerano ku gutahura ibyaha

Polisi y’u Rwanda na TIGO basinyanye amasezerano ku gutahura...

Muhanga : Umushoferi afunzwe akurikiranyweho guha umupolisi ruswa

Muhanga : Umushoferi afunzwe akurikiranyweho guha umupolisi...

Muri ULK : Abanyeshuri 2986 bahawe impamyabumenyi

Muri ULK : Abanyeshuri 2986 bahawe impamyabumenyi

NEW POSTS
Umudiho uva mu itako

10-12-2016

Umudiho uva mu itako

Seyoboka ushinjwa Urupfu rw’Abanyapolitiki Kameya ( PL) na Dr. Gafaranga ( PSD) yakatiwe gufungwa by’agateganyo

8-12-2016

Seyoboka ushinjwa Urupfu rw’Abanyapolitiki Kameya ( PL) na Dr. Gafaranga (...

Abikorera bagaragarije Umukuru w’Igihugu Paul Kagame ikibazo cy’inyubako ziri kuzamurwa zidafite abazikoreramo

8-12-2016

Abikorera bagaragarije Umukuru w’Igihugu Paul Kagame ikibazo cy’inyubako...

( VIDEO ) y’Ivanjiri ya Padiri Nahimana Thomas ushaka kuba Perezida w’u Rwanda

8-12-2016

( VIDEO ) y’Ivanjiri ya Padiri Nahimana Thomas ushaka kuba Perezida w’u...

Perezida Kagame yahawe igihembo n’Umuryango w’Abibumbye kubwo kurengera ibidukikije

7-12-2016

Perezida Kagame yahawe igihembo n’Umuryango w’Abibumbye kubwo kurengera...

Muri RNC : Umwotsi uracyacumbeka hagati ya Kayumba na Rudasingwa

5-12-2016

Muri RNC : Umwotsi uracyacumbeka hagati ya Kayumba na Rudasingwa

Burundi : Ubufaransa inyuma y’ inyeshyamba izwiho no kuvangura amoko, nk’ ikiraro cyo kujegeza Leta y’Urwanda

5-12-2016

Burundi : Ubufaransa inyuma y’ inyeshyamba izwiho no kuvangura amoko, nk’...