LATEST NEWS
MU RWANDA
Kureba kure, imyifatire myiza no gukora kinyamwunga muri Politiki : Amahirwe bitanga kubabyubahiriza n’ akaga bikururira ababyirengagiza.
Publish Date: dimanche 6 décembre 2015
VISITS :1412
By Admin

Buri gihugu cyose kw’isi kiyoborwa na Leta, nayo ikaba igizwe n’inzego zitandukanye. Izo nzego nazo ziyoborwa n’abantu bafite uko barutana bitewe n’akazi buri muntu akora. Muri Leta, baba abakozi bato cyangwa abakuru hari amategeko, amabwiriza abagenga bikaba byaragagaye ko abayubahiriza uko bikwiye hari uburyo bibafasha.

Ariko hejuru y’ibyo hari imyitwarire myiza umukozi wa Leta cyangwa umuturage w’igihugu agomba kugira kugirango ubuzima bwe bugende neza cyangwa akazi ke akarambeho, agakundirwe ndetse kagirire n’umumaro ugakora ndetse n’igihugu muri rusange.

Muri politiki, kutareba kureba, imyifatire mibi no kudakora akazi kinyamwuga hari abantu bigiraho ingaruka zikomeye cyane ndetse bikanabakururira akaga. Sindagira amahirwe yo kugira umwanya wisumbuye muri politiki ariko nagiye mbona (observation) muri politiki y’u Rwanda uko abantu bagiye bajya mu myaka yo hejuru, uko bagiye bakora akazi, uko bagiye bahinduka nyuma yo kugera muri iyo myanya ikomeye, bamwe bakananirwa kureba kure, bakirengagiza inshingano, bakanga kubaha inzego z’ikirenga ziyoboye u Rwanda cyangwa bakishora nkana mu bikorwa bibangamiye inyungu z’Igihugu, maze bikabagiraho ingaruka, bikabakururira n’akaga gakomeye, ndetse bamwe bikanabaviramo gutakaza imitungo babaga baragezeho mu gihe bari abayobozi, bigasubiza inyuma imiryango yabo, ndetse hakaba n’abo biviramo gutakaza ubuzima.

Muri iyi nyandiko ndibanda ku ngero z’abantu bagiye bananirwa kureba kure, ntibashishoje bikabaviramo ko ubuzima bwabo buhura n’akaga gakomeye, bagatakaza icyubahiro n’agaciro kubera amakosa yashoboraga kwihanganirwa yagiye abaranga mu kazi muri Politiki y’ U Rwanda, ariko kugirango byumvikane neza ndagerageza kugereranya ibyagiye biba kuri abo banyarwanda n’ibyagiye biba mu zindi politiki z’ibindi bihugu kw’isi.

Mu rwego Mpuzamahanga

Mu kinyamakuru Rolling Stone cyo kuwa 8–22 Nyakanga 2010 itangazamakuru ryose ryo kw’Isi ryasohoye inkuru ikomeye kandi itangaje : Perezida Barrack Obama yirukanye mu gisirikare cy’Amerika, Umujenerali w’inkingi ya mwamba mu gisirikare cy’ Amerika. Uwo ni Jenerali Stanley A. McChrystal, isi yose yemera kuba ari uwa mbere mu kurwanya iterabwoba kurusha abandi bajenerali Leta zunze ubumwe z’Amerika zagize mu kinyejana cya 20 ndetse no mu ntangiriro z’ikinyejana cya makumyabiri na rimwe.

Uyu mujenerali Perezida Obama amwirukana mu gisirikare yamujijije amagambo yaba yaravuze hamwe n’abari bamwungirije yanengaga imyifatire ya Perezida Barrack Obama, Joe Bidden Visi Perezida w’Amerika n’abandi bayobozi ba gisivile ku birebana n’urugamba rwo kurwanya Al Qaeuida muri Afganistan.

Nkuko baca umugani mu Kinyarwanda ngo “Nyiri ururimi rubi yatanze umurozi gupfa”, Jenerali Stanley A. McChrystal yakoze ikosa ryo gusebya no kunenga Umukuru w’Igihugu akaba n’umugaba w’ingabo z’Amerika, ndetse bikanatangazwa mu binyamakuru. Nk’umukozi wa Leta mu ngabo z’igihugu, iri ryari ikosa rikomeye ryamuviriyemo kwirukanwa mu ngabo atakaza amahirwe ahabwa abandi bajenerali iyo barangije umwunga wo kurwanira no guharanira ubusugire n’ubuhangange bw’Amerika bagiye mu zabukuru.

Ku rundi ruhanda, vuba aha umunyamakuru Stéphane Hugues yatangaje inyandiko yitwa “French government assassinates six of its own citizens in bombing raid in Syria” yemeza ko Leta y’Ubufaransa yafashe icyemezo cyo kwica Abanyagihugu bacyo (abafaransa) muri Syria n’ubwo itegeko nshinga ry’ubufaransa ribuza Leta y’icyo gihugu kwica umuturage w’ubufaransa uko ikibazo arimo cyaba giteye uko ari ko kose.

Ibi byatewe ni uko nyuma y’ibitero by’iterabwoba byabaye vuba aha mu mujyi wa Paris, Perezida Hollande yasabye ko hakorwa urutonde rw’abanzi bagomba kwicwa (kill list), igisirikare cy’ubufaransa kigaragaza ko hari abenegihugu b’ubufaransa bagiye muri ISIS muri Syria, Perezida Hollande abigiriwemo inama n’igisirikare n’inzego z’iperereza bemeza ko abo bafaransa bagomba kwicwa nta mbabazi kubera ko Leta y’Ubufarana ibahuza bya hafi n’umutwe w’iterabwoba uherutse kugaba ibitero I Paris, kimwe mu byo byari bigamije bikaba harimo kwica umukuru w’igihugu, Perezida Hollande, kuko ibitero biba yari kuri Stade areba umupira wahuzaga Ubudage n’Ubufaransa.

Mu Rwanda

Mu mateka ya vuba aha twagiye tubona abayobozi muri politiki ndetse no mu abofisiye bavanywe mu kazi cyangwa bakaba bafunze kubera amakosa yo kutareba kure cyagwa kudakora kinyamwuga cyane cyane igihe bari bari mu myanya ya Leta.

Urugero : Hari abofisiye bakuru tumaze iminsi tubona mu nkiko bashinjwa icyaha cyo gukwiza ibihuha, gusebya Leta, kugomesha rubanda n’ibindi. N’ubwo mu mategeko hari ihame rivuga ko “umunyacyaha ari umwere kugeza igihe habonekeye ibimenyetso simusiga bimugaragazaho icyaha”, bigaragarako hari ikintu kitagenze neza mu myitwarire yabo ya kinyamwuga.

Uti ni ikihe ? Kubwanjye ikosa rikomeye ryakozwe nabo ni ikosa ry’imyifatire no guteshuka ku murongo mugari ujyanye n’urwego bakorera. Ntibyumvikana na gato ukuntu umuntu wo mu rwego rw’abofisye bakuru, wagize uruhare mu ntambara yo kubohora igihugu, wakoze akazi kanyuranye muri Leta, karimo no gufatanya n’abandi kurinda umutekano w’ umukuru w’igihugu cyangwa uwigeze kugirirwa icyizere agahagararira igihugu mu mahanga, ashobora kwishyira muri “situation” ituma Leta imubonaho, imukekaho, imukurikiranaho gukwiza ibihuha no kuyobya rubanda ? Kw’isi hose nta muntu wagaragaraho iyi myitwarire ngo akiranuke na Leta akorera.

Muri siyansi (science) igenga umwuga wa gisirikare hari ihame ryitwa “creed”, tugenekereje mu Kinyarwanda wabyita nk’igihango. Abantu bose bari mu mwuga wa gisirikare cyangwa izindi nzego z’umutekano ndetse n’izindi nzego “bahana igihango na Leta” cyo kubaha, Umukuru w’Igihugu ari nawe Umugaba w’Ikirenga w’Ingabo n’abandi bagaba, kurinda igihugu no gukurikiza amategeko y’igihugu muri rusange.

Kw’isi yose umuntu ubirenzeho bimugiraho ingaruka zirimo kwirukanwa mu mirimo, igifungo ndetse akenshi ugasanga ibyo bagezeho hamwe n’imiryango yabo bisubiye inyuma kubera kwisanga mu gifungo, mu manza kwishyura abavoka n’ibindi.

Tukiri muri urwo rwego, undi muntu nawe wagize ikibazo cy’imyitwarire kikamuviramo ingaruka zirimo guta igihugu n’akazi, gusiga ibye n’abe akajya mu buhungiro ni Kayumba Nyamwasa.

Ubwa mbere namwumvise avugwaho guta ingabo no gusiga igihugu ubwo intambara y’abacengezi yari ikaze akajya kwiga I Burayi. Nongeye kumwumva avugwaho gahunda yo gukuraho ubutegetsi hakoreshejwe coup d’etat. Nongeye kumva amakuru ye umwaka ushize ubwo yari mu kiganiro kuri televiziyo Africa 360 yo muri Afrika y’Epfo ubwo yagiranaga ikiganiro n’umunyamakuru Kwangu Liwewe. Muri icyo kiganiro Kayumba Nyamwasa yavuze ko FDLR ifite “cause” ko ndetse Leta y’u Rwanda igomba kugirana ibiganiro na FDLR n’ibindi.

Kayumba Nyamwasa, FDLR na Twagiramungu Faustin

Mu by’ukuri byumvikana bite ukuntu waba uri umuyobozi mukuru mu ngabo ukazita mu ntambara, igihugu cyatewe ugasaba kujya mu mahugurwa. Byumvikana bite kuvugwaho umugambi wo gukuraho ubutegetsi ukoresheje coup d’etat ? Ni nde kw’isi Leta ye yakumvaho iyo myitwarire ikabimushimira ? Ni gute se warangwa n’iyo myutwarire ntibigire ingaruka mbi ?

Nyuma ya Genocide yakorwe Abatutsi ababyeyi bacu n’imiryango igashira, Kayumba kuvuga ko FDLR ifite “cause” biratangaje ndetse binerekana ko ubu asangiye ingengabitekerezo n’abajenosideri. Muyandi magambo Kayumba ari mu murongo umwe na FDLR. Niba yumva DLR ifite “cause” ntibitangaje kuba bafitanye imikoranire ituma agomba kurwanywa nk’ umwanzi w’igihugu.

Uwitwa Sebarenzi nawe aza muri uru rwego kuko akimara kugirwa Perezida w’Inteko ishinga amategeko yashatse gukoresha ububasha bwe ngo akureho Leta. Sebarenzi akaba yarashakaga gukoresha uburyo bwitwa “impeachment” , gushinja abagize inama y’abaministiri imikorere mibi, noneho inteko igatora ko abagize guverinoma bavaho.

Ibyo byari gutuma inteko igira ubushobozi bwo kugira uruhare mu gushyiraho indi Guverinoma, Sebarenzi akaba Perezida nkuko amategeko abiteganya, maze bakikiza abo batashakaga barimo uwari Visi Perezida akaba Ministiri w’Ingabo icyo gihe.

Sebarenzi Joseph Kabuye

Byatanga amahoro gute ku muntu uwo ari wese washaka gukuraho Leta kandi nawe ayirimo ? Sebarenzi ibikorwa bye byaje kumugiraho ingaruka avanwa ku mwanya yari ariho, bimuviramo guhunga. Ntekereza ko byari kumufasha iyo yitwara neza, kuko yari gutinda ku mwanya yari ariho, akaguma mu gihugu akaba yanakora n’ibindi bikorwa by’iterambere bikomoka ku mahirwe akazi ke kamuheshaga.

Kuko nibanze ku bayobozi bagize imyanya yo hejuru sinasiga Faustin Twagiramungu. Muri iyi minsi mbona asa nuwa dukanye undi mwuga w’ubu “comedian”. Nawe amakosa y’imyatwarire niyo yamutesheje umugati.

Nkuko yakunze kubyivugira “ngo yakinaga politiki yo mu rwego rwo hejuru mu kirere, iyo politiki ye yamubwirije kwikura ku mwanya wa Minisitiri w’Intebe ndetse ajyana n’ikipe y’abandi baministitiri bivana muri Guverinoma bigira mu bubiligi.

Iyo politiki yo mu rwego rwo hejuru yabwirizaga Twagiramungu ko ngo nava muri Guverinoma ngo abaturage cyane cyane ngo b’abahutu ngo bazava mu gihugu Leta iyobowe na FPR ikazabura abaturage iyobora. Byanyibukije wa mufaransa witwa Paul Barril wagize uruhare muri Genocide mu Rwanda ubwo yavugaga ngo “ FPR ntizigera iyobora ngo kuko abaturage badashobora kuzayitora”.

Hari abandi banyapolitiki nabo bagiye bagira ibibazo bikomoka ku myifatire bakinjira mu makosa akabateza akaga. Iriya myitwarire yagiye iranga bariya bayobozi yagiye ibagiraho ingaruka ariko yashoboraga no kugira ingaruka zikomeye ku gihugu.

Numva ibyabaye ku bandi bikwiye kudufasha kwivugurura, ndetse n’abo byagizeho ingaruka bakwiye kwisuzuma byanashoboka bakisubiraho.

Gukurikiza amategeko ni ngombwa, ariko imyifatire myiza, kubaha, ubuyoboke n’ubudahemuka ku gihugu n’Umugaba wacyo ni iby’agaciro k’indashyikirwa cyane cyane muri politiki y’igihugu cyacu.

"The individual who wants to reach the top in business must appreciate the might and force of habit. He must be quick to break those habits that can break him—and hasten to adopt those practices that will become the habits that help him achieve the success he desires." J. Paul Getty

Yanditswe : Emmanuel , Kanombe, City of Kigali

IBITEKEREZO

TANGA IGITEKEREZO

Kwamamaza
Kwamamaza
Also in this section
Village Urugwiro : Perezida Kagame na Madamu bifurije Abana bato Noheli nziza

Village Urugwiro : Perezida Kagame na Madamu bifurije Abana bato Noheli...

Perezida Kagame yahawe igihembo n’Umuryango w’Abibumbye kubwo kurengera ibidukikije

Perezida Kagame yahawe igihembo n’Umuryango w’Abibumbye kubwo kurengera...

Ubushinjacyaha bw’u Rwanda bwatangiye iperereza ku ruhare rw’Abafaransa 20 muri Jenoside

Ubushinjacyaha bw’u Rwanda bwatangiye iperereza ku ruhare rw’Abafaransa 20...

Dr Sezibera Richard yatorewe gusimbura Senateri Mucyo

Dr Sezibera Richard yatorewe gusimbura Senateri Mucyo

Airbus 330-300, Indege nshya yiswe ‘Umurage’, iraye mu Rwanda

Airbus 330-300, Indege nshya yiswe ‘Umurage’, iraye mu Rwanda

NEW POSTS
Muri RNC : Umwotsi uracyacumbeka hagati ya Kayumba na Rudasingwa

5-12-2016

Muri RNC : Umwotsi uracyacumbeka hagati ya Kayumba na Rudasingwa

Burundi : Ubufaransa inyuma y’ inyeshyamba izwiho no kuvangura amoko, nk’ ikiraro cyo kujegeza Leta y’Urwanda

5-12-2016

Burundi : Ubufaransa inyuma y’ inyeshyamba izwiho no kuvangura amoko, nk’...

Perezida Kagame mu rugendo rw’akazi muri Gabon

4-12-2016

Perezida Kagame mu rugendo rw’akazi muri Gabon

Umuhango wo kwibuka Mucyo Jean de Dieu mu Bubiligi ( AMAFOTO )

2-12-2016

Umuhango wo kwibuka Mucyo Jean de Dieu mu Bubiligi ( AMAFOTO...

Iryavuzwe riratashye : Nahimana yasohoye inyandiko ihakana Jenoside n’abayikoze

30-11-2016

Iryavuzwe riratashye : Nahimana yasohoye inyandiko ihakana Jenoside...

UK : Abanyarwanda barokotse Jenoside babangamiwe n’abayikoze bacyidegembya

30-11-2016

UK : Abanyarwanda barokotse Jenoside babangamiwe n’abayikoze...

Padiri Nahimana arategura imyigaragambyo itemewe kuri Ambasade y’u Rwanda i Buruseli

29-11-2016

Padiri Nahimana arategura imyigaragambyo itemewe kuri Ambasade y’u Rwanda...

Urukiko Ruzemeza Aho Umugogo w’Umwami Kigeli V Uzatabarizwa

28-11-2016

Urukiko Ruzemeza Aho Umugogo w’Umwami Kigeli V Uzatabarizwa