LATEST NEWS
MU RWANDA
Senateri Mucyo yitabye Imana azize urupfu rutunguranye, rwababaje benshi
Publish Date: mardi 4 octobre 2016
VISITS :2785
By Admin

Senateri Mucyo Jean de Dieu wigeze kuyobora Komisiyo y’Igihugu yo kurwanya Jenoside (CNLG) amaze kwitaba Imana muri iki gitondo cyo kuri uyu wa Mbere tariki 3 Ukwakira 2016.

Umwe mu nshuti ze watangaje aya makuru yavuze ko Senateri Mucyo yari yagiye ku kazi mu gitondo cyo kuri uyu wa Mbere, akaza kugwa kuri Escaliers ( Amadarage yinjira muri Senat ) ajyanwa ku bitaro byitiriwe umwami Faycal ari naho yaguye.

Senateri Jean De Dieu Mucyo yari muntu ki ?

Senateri Mucyo yavutse kuwa 07 Ukuboza 1961 i Nyanza mu Ntara y’Amajyepfo, yiga amashuri abanza ahitwa i Save mu 1967, arangiza amashuri yisumbuye mu 1980 ahita abona akazi muri Minisiteri y’Ubutabera.

Yatangiye kwiga muri Kaminuza y’u Rwanda mu 1985 arangiza mu 1990, aza kwiga icyiciro cya Gatatu cya kaminuza (Masters) mu 2012, aho yarangije mu bijyanye no gukumira Jenoside.

Jean de Dieu Mucyo yinjiye mu gisirikare mu 1994 nyuma yo kurokoka Jenoside yakorewe Abatutsi, aho yari yarahunganye n’abandi muri Hotel de Milles Collines.

Mu 1995 yahawe gukurira urwego rw’ubugenzacyaha muri Minisiteri y’Ubutabera, mu 1997-1998 agirwa Umucamanza wa gisirikare (Conseil de guerre) ariko izo nshingano akomeza kuzifatanya zombi.

Muri Gashyantare 1999 yagizwe Minisitiri w’Ubutabera kugeza mu 2003, ari nawo mwaka yavuye mu gisirikare ageze ku ipeti rya Kapiteni.

Kuva mu 2003 kugeza mu 2006, Jean de Dieu Mucyo yagizwe Umushinjacyaha Mukuru wa Repubulika, kuva mu mu 2006 kugeza mu 2007 ayobora Komisiyo yakoze raporo ku ruhare rw’Abafaransa muri Jenoside yakorewe abatutsi, inshingano yasoje agirwa Umunyamabanga Nshingwabikorwa wa Komisiyo y’Igihugu ishinzwe kurwanya Jenoside, CNLG, kugeza mu 2015.

Kuwa 29 Gicurasi 2015 nibwo Komisiyo y’Amatora yemeje ko Mucyo Jean de Dieu ariwe watorewe kuba senateri ahagarariye Intara y’Amajyepfo ku majwi 50.3%, icyo gihe akaba yari agiye kuziba icyuho cyari cyasizwe na Senateri Jean Damascene Bizimana wari wamusimbuye muri CNLG.

Imirimo yakoze

1980-1985 : Minijust ashinzwe imishahara y’abakozi

1991-1994 : UNICEF na DAF muri EMUJECO

1994-2003 : Umusirikare avamo afite ipeti rya Kapiteni

1995-1999 : Diregiteri muri Minijuste, Umucamanza mu rukiko rwa gisirikare

1999-2003 : Minisitiri w’ubutabera n’imikoranire y’inzego

2003-2006 : Umushinjacyaha mukuru wa Repubulika

2006-2007 : Yayoboye Komisiyo ku ruhare rw’Abafaransa muri Jenoside

2008 - 2015 : Umunyamabanga Nshingwabikorwa wa CNLG

Gicurasi 2015- Kuya 3 Ukwakira 2016 : Senateri mu Nteko Ishinga Amategeko y’u Rwanda

Mucyo J.D ( RIP)

IBITEKEREZO
Amiel Nkuliza

Burasa, nshuti yanjye. Nkunda kukwita inshuti yanjye kuko nzirikana neza ko ntacyo twigeze dupfa kijyanye n'umwuga w'itangazamakuru twari dusangiye, ubwo nari nkiri mu gihugu. Uramutse atari ko ubibona, wanyomoza. Ngusabye rero ko iyi mirongo mvugamo Nyakwigendera Mucyo, wayihitisha, udakuyemo n'akitso, kuko ni témoignage ikomeye, yagombye no kugira icyo yigisha ku bagabo mbwa, baseka imbohe, bashinyagurira uwagiye, uwatuvuyemo ! Kuva Jean de Dieu Mucyo yitabye Imana, nagiye nsoma ibyo abantu benshi bagiye bamuvugaho, ahanini nkumirwa. Ukumirwa kwanjye si ikindi ni uko burya iyo umuntu atakiri kuri iyi si y'abazima, buri wese yagombye kumuvugaho ibyenda gusa n'ibyiza, kuko twakora neza, twakora nabi, iyo tugiye tuba tugiye, nta n'umwe ugaruka. Nta mpamvu rero jyewe njya mbona yo gushinyagurira uwagiye, uwitabye Imana, kuko twese ni yo tugana. Ibi simbivugiye ko nakundaga imikorere ya Mucyo ijana ku ijana. Ni umuntu nka twe twese, yashoboraga gukora ikibi, agakora n'ikiza. Ntawe ukwiye kumuvuga ibibi gusa, kuko sinemeza ko hari umuntu uba mubi ku bintu byose. Icyo gihe aba atakiri umuntu. Nubwo hari ubwo yajyaga abangamira cyane imanza zaciwe, abarekuwe, bagasubizwa mu magereza, ndavuga ubwo yari minisitiri w'ubutabera, ibi si we ni systeme yakoreraga, yabiteraga. Ariko reka mvuge n'ibyiza nzi kuri Nyakwigendera Mucyo, ntakekaga ko yabikora. Ubwo muri gicurasi 1997 nafatwaga ngafungirwa inyandiko yari yasohotse muri Lepartisan nr 44, iyi nr mbere y'uko inyongerwa mu icapiro rya Kilimobenecyo, yarimo publicité nari nahawe na Nyakwigendera Mucyo. Yari publicité yari ijyanye n'imikorere y'urwego rukuru rw'ubugenzacyaha yari abereye umuyobozi mukuru (inspecteur général de la police judiciaire). Njya kumwaka iriya publicité, sinakekaga ko yayimpa kuko ikinyamakuru nakoreraga nticyari gifite umurongo wegamiye kuri Leta nyakwigendera yakoreraga. Byari bimeze nko gutomboza ngo ndebe position ye. Publicité rero yayimpanye umutima mwiza, ndumirwa. Ubwo byari mbere y'uko mfashwe. Ubwo nari maze kwinjira muri gereza, umugore wanjye yaransuye, ndamubwira nti uzajye kureba Mucyo, uti n'ubwo nr 44 y'ikinyamakuru cye yanyongewe mu icapiro, yarimo publicité ya police judiciaire. Uti Amiel urumva wamwishyura ? Ibi na none byari nko gushotorana kuko icyo kinyamakuru ntikigeze kigera hanze ngo gisomwe kugirango n'iyo publicité isomwe mo. Mucyo ntiyazuyaje, yahise aha cheque umugore wanjye (100 000 FRW). Ubwo umugore yongeraga kunsura ku wa gatandatu wari ukurikiyeho, yahise ambwira ko Mucyo yamwishyuye. Nuko ndongera ndumirwa. Nyuma y'ibi naribajije nti ariko buriya Mucyo kunyishyura yabitewe n'iki ? Izi mbaraga yazikuye hehe ko Lepartisan yari azi neza ko yanzwe cyane n'ubutegetsi yakoreraga ? Ni ugushyira mu gaciro se, ni ibiki ? Ibi nabyibajijeho igihe kirekire aho nabaga niryamiye iyo mu ndake.! Ku mutima, narishubije nti burya koko ibibi abantu bavuga ku bandi, bajye babanza babegere, babamenye neza. Naje gusanga nta muntu uba mubi kuri byose, nta n'uba mwiza kuri byose. Umwanzuro wacu twese ni uko dufite inzira imwe tuganamo, kandi ni na yo tuzasorezamo ubuzima bwacu bwo kuri iyi si. Mbivanye ku mutima, nifatanyije mu kababaro n'umuryango wa Nyakwigendera Jean de Dieu Mucyo. Imana imuhe iruhuko ridashira. Amiel Nkuliza, Sweden.

Mbonyinshuti ephrem

Mucyo wavukiye mucyo ,ukurira murungano ,ibikorwa byawe byarangwagwa nogukorera my mucyo ugiye twari tukigukeneye imana ikwakire mubayo

KABANDA

MUCYO wavutse uri MUCYO, ukura uri MUCYO, ukora ku rwego rwo hejuru imirimo itandukanye muri Leta uri MUCYO, wabanaga n'abandi muri sosiyete uri MUCYO, n'ubu Imana yaguhanze ikwishubije ukiri MUCYO. Yego yababaye byo kuva mu buzima bwa hano ajya mu bundi buturenze, abe ntitwamubaye hafi ngo dusezeraneho, ni ikiniga kirenze ku bana be n'umugore, ariko uburyo Imana imuhamagayemo bugaragaza ko imukunda kandi ayisanze ntankomyi. Uruhukire mu mahoro no mu gituza cy'Iyakuremye. Ndabihamije, ubivuguruza ni inyangabirama kandi wibuke ko yabaga kuri iyi Si y'ibikwazo byinshi kuruta kure ibyiza.

Kalisa

Imana yakire uyu mugabo wari umwe mu bantu bacye batigeze bata indangagaciro y'ubunyangamugayo. RIP Mucyo...


TANGA IGITEKEREZO

Kwamamaza
Kwamamaza
Also in this section
Ruswa ishingiye ku gitsina mu Rwanda, ihurizo rikomereye Umuvunyi Mukuru

Ruswa ishingiye ku gitsina mu Rwanda, ihurizo rikomereye Umuvunyi...

Uburyo abakoze ibizamini bya Leta bamenya ibigo bazigaho

Uburyo abakoze ibizamini bya Leta bamenya ibigo bazigaho

Hazitabazwa Ambasade ya Kenya mu guca abazunguzayi b’abamasayi bakorera muduce dutandukanye twa Kigali

Hazitabazwa Ambasade ya Kenya mu guca abazunguzayi b’abamasayi bakorera...

Musanze : Police yaganirije abakora mu rwego rw’ubuvuzi kuri ruswa

Musanze : Police yaganirije abakora mu rwego rw’ubuvuzi kuri...

NEW POSTS
Ibyiza dukesha ikoranabuhanga biruta kure ibibazo rishobora gutera - Perezida Kagame

23-01-2017

Ibyiza dukesha ikoranabuhanga biruta kure ibibazo rishobora gutera -...

Abanyafurika bakeneye kwihutisha ibyo bakora ngo hagerwe ku byo batashoboye kugeraho- Kagame

23-01-2017

Abanyafurika bakeneye kwihutisha ibyo bakora ngo hagerwe ku byo batashoboye...

Guterana amagambo hagati ya Donald Trump n’Inzego z’Ubutasi bizagarukira he ?

18-01-2017

Guterana amagambo hagati ya Donald Trump n’Inzego z’Ubutasi bizagarukira he...

Amateka y’Umunyamakuru Shyaka Kanuma, Uko yinjiye mu Itangazamakuru n’Uko yageze mu Buyanja bwa Bizimungu Pasteur

17-01-2017

Amateka y’Umunyamakuru Shyaka Kanuma, Uko yinjiye mu Itangazamakuru n’Uko...

Amerika : DONALD TRUMP ashobora kugambanirwa n’Inzego z’Iperereza

17-01-2017

Amerika : DONALD TRUMP ashobora kugambanirwa n’Inzego z’Iperereza

Umurundi Nahimana Thomas, ari guteka umutwe muri Amarika

16-01-2017

Umurundi Nahimana Thomas, ari guteka umutwe muri Amarika

Fatima-Portugal : Habaye umuhango wo gusezera kuri Kigeli V, ikimenyetso cy’Ubugambanyi bwa Benzinge na Bushayija

16-01-2017

Fatima-Portugal : Habaye umuhango wo gusezera kuri Kigeli V, ikimenyetso...

Perezida Kagame yitabiriye Inama ya 27 ihuza u Bufaransa n’ Afurika I Bamako.

16-01-2017

Perezida Kagame yitabiriye Inama ya 27 ihuza u Bufaransa n’ Afurika I...