LATEST NEWS
Amakuru
U Rwanda rwakiriye neza Amasezerano ku Mihindagurikire y’Ibihe yemejwe i Paris
Publish Date: mardi 15 décembre 2015
VISITS :556
By Admin

Guverinoma y’u Rwanda yakiriye neza Amasezerano ku mihindagurikire y’ibihe yemerejwe i Paris, amasezerano abaye aya mbere mu mateka ageze ku rwego nk’uru ruhambaye.

Aya masezerano agena uburyo bwo gushyira mu bikorwa ingamba zo gukumira izamuka ry’igipimo mpuzandengo cy’ubushyuhe bw’Isi, kikaguma hasi ya dogere 2 (2°C) ariko intego ikaba y’uko iki gipimo kigera hasi ya dogere 1.5 (1.5°C). Aya ni yo masezerano mpuzamahanga ya mbere mu mateka ibihugu byiyemejemo gushyiraho ingamba zifatika zo kugabanya imyuka yangiza ikirere no gufasha ibihugu bikunze kwibasirwa n’ingaruka z’imihindagurikire y’ibihe guhangana na zo.

Aya mazeserano yemerejwe i Paris n’ibihugu 195 azafasha ishyirwamubikorwa ry’ingamba zo kubaka ahazaza h’Isi ituzuyemo imyuka yangiza ikirere myinshi, idahungabanywa n’ingaruka z’imihindagurikire y’ibihe kandi ifite ahazaza harambye kuri bose.

Amasezerano y’i Paris yemejwe nyuma y’imyaka myinshi y’imishyikirano n’ibyumweru bibiri by’ibiganiro byabereye mu Bufaransa.

Mu nama y’Umuryango w’Abibumbye yabereye i Paris, u Rwanda rwasabye ko hakwemezwa amasezerano akubiyemo ingamba zihamye zizatuma nta gihugu na kimwe gisigara inyuma mu rugamba rwo guhangana n’imihindagurikire y’ibihe no guteza imbere abaturage n’ubukungu mu buryo bubungabunga ibidukikije. Abahagarariye u Rwanda muri iyi nama, barangajwe imbere na Minisitiri w’Umutungo Kamere Dr Vincent Biruta, bahuye kandi n’abafatanyabikorwa ku rwego mpuzamahanga babagezaho ibikorwa u Rwanda rukora mu rwego rwo guhangana n’ingaruka z’imihindagurikire y’ibihe.

Mu byo babagejejeho harimo ibijyanye no gushyiraho Ikigega cy’u Rwanda cyo Kubungabunga Ibidukikije no Guhangana n’Imihindagurikire y’Ibihe. Iki kigega kimaze gukusanya amafaranga agera kuri miliyoni ijana z’amadolari (100,000,000 US $), ashorwa mu mishinga igamije kubungabunga ibidukikije no kubaka ubudahangarwa bw’abaturarwanda ku mihindagurikire y’ibihe.

Umuhango wo gutangiza ku mugaragaro ibi biganiro bizwi nk’Inama ya 21 y’Ibihugu Byemeje Amasezerano y’Umuryango w’Abibumbye ku Mihindagurikire y’Ibihe (COP21), wabereye i Paris kuwa 30 Ugushyingo 2015. Ibi biganiro byabimburiwe n’ inama y’Abakuru b’Ibihugu, aho Abakuru b’Ibihugu na Guverinoma bagera ku 150 batanze ubutumwa bw’ibihugu byabo, bashimangira intego zabo mu gushyigikira amasezerano mashya ku mihindagurikire y’ibihe.

Ubutumwa bw’u Rwanda bwatanzwe na Minisitiri Biruta ku wa 7 Ukuboza 2015, mu nama ikomeye yahuriyemo abahagarariye Guverinoma z’Ibihugu byose byitabiriye COP21, asaba amahanga gushyira imbaraga mu ikoranabuhanga n’ingufu ziva ku masoko adakama mu rwego rwo guhangana n’imihindagurikire y’ibihe no kugera ku bukungu.

Minisitiri w’Umutungo Kamere Dr Vincent Biruta

Nyuma y’iminsi 14 y’ibiganiro bikomeye, Amasezerano y’i Paris yemejwe n’ibihugu 195 ku wa gatandatu tariki 12 Ukuboza 2015. Ku nshuro ya mbere mu mateka, Amasezerano y’i Paris ahuza ibihugu byose mu rugamba rumwe rugamije kubungabunga ikirere, hashingiwe ku nshingano zabyo mu gihe cyashize, icy’ubu n’ikizaza mu kurengera ikirere.

Intego nyamukuru y’aya masezerano areba Isi yose, ni ugukumira izamuka ry’igipimo mpuzandengo cy’ubushyuhe bw’Isi muri iki kinyejana, ku buryo kiguma hasi ya dogere 2 (2°C) ariko intego ikaba y’uko iki gipimo kigera hasi ya dogere 1.5 (1.5°C).Aya masezerano aha agaciro ingamba zikubiye mu igenamigambi ryo guhangana n’imihindagurikire y’ibihe Ibihugu 188 byatanze, zitanga umusingi ukomeye Umuryango Mpuzamahanga ushobora kwifashisha mu kugabanya imyuka yangiza ikirere no guhangana n’ubwiyongere bw’ubushyuhe bw’ isi.

Aya masezerano y’i Paris asaba ibihugu byose kugaragaza ingamba zabyo mu guhangana n’imihindagurikire y’ibihe (zikubiye mu igenamigambi ryiswe “Intended Nationally Determined Contributions”) buri myaka itanu. Hagendewe kuri aya masezerano, ibihugu bizongera buhoro buhoro intego zabyo zo kugabanya imyuka yangiza ikirere no kubaka ubudahangarwa ku ngaruka z’imihindagurikire y’ibihe.

Amasezerano y’i Paris n’imyanzuro yavuye mu Nama y’Umuryango w’Abibumbye ku Mihindagurikire y’Ibihe bireba ibice bikomeye byo guhangana n’imihindagurikire y’ibihe. Muri ibi harimo ingamba zo kugabanya imyuka yangiza ikirere, uburyo busobanutse bwo kunononsora izi ngamba, kongerera ibihugu ubushobozi bwo guhangana n’ingaruka z’imihindagurikire y’ibihe, ndetse no guha ibihugu bikunze kwibasirwa n’ingaruka z’imihindagurikire y’ibihe ubufasha mu bijyanye n’amafaranga na tekinike kugira ngo bibashe kubaka ubukungu bubungabunga ibidukikije kandi budahungabanywa n’imihindagurikire y’ibihe.

Ingamba z’ibihugu biri mu nzira y’amajyambere zo kubaka ahazaza habyo heza kandi hadahungabanywa n’imihindagurikire y’ibihe, dore ko zagutse kandi zifite intumbero nini, zizashyigikirwa n’ukwiyongera kw’inkunga izatangwa n’ibihugu byateye imbere ndetse n’umusanzu uzatangwa n’abandi bazabyifuza. Binyuze muri aya masezerano, ibihugu byiyemeje ko bizashyiraho uburyo busobanutse bugaragaza uko bizatanga ubufasha mu bijyanye n’ikoranabuhanga ndetse n’amafaranga yo guhangana n’imihindagurikire y’ibihe angana na miliyari 100 z’amadolari buri mwaka, guhera mu mwaka wa 2020. Ibihugu kandi byashyizeho indi ntego yo kongera amafaranga atangwa, akarenga miliyari 100 z’amadolari buri mwaka, mbere y’umwaka wa 2025.

Ubutumwa bw’u Rwanda ku bijyanye n’ukwemezwa kw’Amasezerano y’i Paris buragira buti :

“Mu gihe Isi iri kwihutisha ibikorwa bigamije kugabanya imyuka yangiza ikirere, u Rwanda rurasaba ko hashyirwa imbaraga mu bushakashatsi bw’ikoranabuhanga n’ingufu zidahumanya ikirere, bishobora kudufasha gukumira imihindagurikire y’ibihe no guhangana n’ingaruka zayo.Guhangana n’imihindagurikire y’ibihe ntabwo ari uguhitamo hagati y’iterambere no kubungabunga ibidukikije, ahubwo ni ugukora ku buryo iterambere riramba, rikazagera no ku bisekuruza bizaza.”

Nk’uko byemejwe, Amasezerano y’i Paris agiye gushyirwa ku Cyicaro cy’Umuryango w’Abibumbye giherereye i New York ; ashyirweho umukono n’ibihugu mu gihe cy’umwaka uhereye kuwa 22 Mata 2016 kugeza kuwa 21 Mata 2017.

Umunyamabanga Mukuru w’Umuryango w’Abibumbye azatumiza inama yo ku rwego rwo hejuru ku wa 22 Mata 2016, igamije gutangiza igikorwa cyo gushyira umukono kuri aya masezerano.

Aya masezerano azatangira gushyirwa mu bikorwa nyuma y’uko ibihugu 55 bibarwaho nibura 55% y’imyuka yangiza ikirere yose bimaze gutanga inyandiko zigaragaza ko byayemeje burundu kandi zigena ishyirwamubikorwa ryayo muri ibyo bihugu. Nyuma yo gushyira umukono kuri aya masezerano y’i Paris, intambwe u Rwanda ruzakurikizaho ni iyo gutegura itegeko ryemeza burundu aya masezerano kandi rigena ishyirwamubikorwa ryayo.

ENR

IBITEKEREZO

TANGA IGITEKEREZO

Kwamamaza
Kwamamaza
Also in this section
Nyarugenge : Polisi yafashe agatsiko k’abajura bibye mudasobwa muri GS Nzove

Nyarugenge : Polisi yafashe agatsiko k’abajura bibye mudasobwa muri GS...

Nyagatare : Abaturage basabwe kugira uruhare mu kubungabunga umutekano

Nyagatare : Abaturage basabwe kugira uruhare mu kubungabunga...

Seyoboka yagejejwe imbere y’urukiko rwa Gisirikare, urubanza rurasubikwa kubera Avoka

Seyoboka yagejejwe imbere y’urukiko rwa Gisirikare, urubanza rurasubikwa...

Kagame yihanganishije Abanyacuba nyuma yo kubura umukambwe Fidel Castro

Kagame yihanganishije Abanyacuba nyuma yo kubura umukambwe Fidel...

Nyaruguru:Umusaza w’imyaka 70 yiciwe iwe n’abantu bataramenyekana

Nyaruguru:Umusaza w’imyaka 70 yiciwe iwe n’abantu bataramenyekana

NEW POSTS
Urukiko u Rwanda rwambuye ububasha rwumvise ubujurire bwa Ingabire Victoire

27-03-2017

Urukiko u Rwanda rwambuye ububasha rwumvise ubujurire bwa Ingabire...

Tribert Rujugiro mu manza z’uburiganya mu gihugu cya Uganda

27-03-2017

Tribert Rujugiro mu manza z’uburiganya mu gihugu cya Uganda

Uwamahoro Violette yagejejwe imbere y’Urukiko

27-03-2017

Uwamahoro Violette yagejejwe imbere y’Urukiko

Jeannette Kagame yatangije ihuriro rizafasha Abanyarwandakazi b’Abacuruzi kumenyekana ku Isoko mpuzamahanga

27-03-2017

Jeannette Kagame yatangije ihuriro rizafasha Abanyarwandakazi b’Abacuruzi...

Padiri Nahimana abangamiwe n’imbabazi Papa Francis yasabye ku ruhare Kiliziya Gatolika yagize muri Genocide

26-03-2017

Padiri Nahimana abangamiwe n’imbabazi Papa Francis yasabye ku ruhare...

Padiri Thomas Nahimana yiyambaje Rurema nyuma y’Akaga gakomeye arimo

20-03-2017

Padiri Thomas Nahimana yiyambaje Rurema nyuma y’Akaga gakomeye...

Afurika y’Epfo : Umunyarwanda yishwe atwikiwe mu nzu azira umugore w’abandi

18-03-2017

Afurika y’Epfo : Umunyarwanda yishwe atwikiwe mu nzu azira umugore...

RNC –NEW : Rudasingwa Theogene yiyemeje kwiyegereza no gushakira imibereho mu butinganyi

17-03-2017

RNC –NEW : Rudasingwa Theogene yiyemeje kwiyegereza no gushakira imibereho...