LATEST NEWS
Itohoza
Rwanda/Burundi : Imirambo yo mu Kiyaga cya Rweru ni uruganda rw’ ibihuha (2)
Publish Date: jeudi 18 septembre 2014
VISITS :2921
By admin

Na Tom Ndahiro

Ku wa 5 Nzeri 2014 ntiwari umunsi usanzwe. Ni umunsi imvura yazindutse igwa kugeza nimugoroba. Nibaza ko ishobora kuba yaraguye amasaha arenga 18.

Mu gitondo cya kare twazindutse tugana ku kiyaga cya Rweru ahabonetse imirambo ku ruhande rw’i Burundi. Saa moya za mugitondo zageze turi ku mupaka w’u Rwanda n’ u Burundi.

Twageze i Muyinga hafi saa 4 za mugitondo, bitewe n’imodoka kutihuta kubera imvura. Hari hanabayemo kuyoba, kuko twageze mu Kirundo tukibeshya umuhanda ku buryo twisanze ahitwa i Nyarunazi na Gisenyi tugana ku mupaka aho twavuye.

Twanyuze iyo nzira kuko yari yo soko y’inkuru kandi igice kinini cy’ikiyaga cya Rweru, kikaba kiri mu Burundi. Ni hafi 70%. Jye na mugenzi wanjye twajyanye, Albert Rudasimburwa, twagiye dusanga umunyamakuru wa mbere wamenye iyo nkuru.

Uwo munyamakuru ni Emmanuel Ndayishimye, uhagarariye Radio BONESHA FM mu ntara ya Muyinga.

Byabaye ngombwa ko dutegereza gato mbere yo gukomeza kuko hari abandi banyamakuru bajyagayo, biba ngombwa ko tubarinda tugafatanya urugendo. Abo banyamakuru bari abo muri Radio/ Television Renaissance y’i Burundi.

Uwatwakiriye, Emmanuel ari nawe wari uzi neza aho tujya, n’uburyo twahagera, twamubajije iby’ibanze ngo tutaba abatangizi. Yatubwiye uburebure bw’urugendo dufite,(kilometero zirenga 100 z’igice kinini ari umuhanda w’igitaka) abayobozi ba Komini Giteranyi tugomba kubanza kubonana, abaturage twabaza, uko turi bwiyambaze barimo abasirikare barwanira mu mazi (marines), bakorera mu kiyaga cya Rweru n’ibindi.

Twaganiriye ku bintu bivugwa cyangwa byavuzwe. Birumvikana ko ibyinshi biba bihumanya umutima kuko biba bibabaje n’ubwo gushakisha ukuri biba aribyo mugambi.

Mubyo twavuze harimo niba Akagera gatembera mu Rweru kuko bidasanzwe ; iby’imirambo yabonetse mu kiyaga (4 yarobwe ikanahambwa na 40 ivugwa ko yabonetse) ; iby’imirambo bavuga ifite ibimenyetso by’uko ikomoka mu Rwanda (ikarita ya mituelle n’imyambaro yanditseho ikinyarwanda).

Twanamenye ibivugwa birimo iby’aho abicwa baba bakomoka. Kubyo Ann Garrison n’imbuga z’abo bahuza bandika hiyongeraho ko mu bishwe harimo murumuna wa Kayumba Nyamwasa ngo w’umusirikare mu rwego rwa Liyetona, ko ari abo mu ngando y’i Mutobo bitandukanya na FDLR, ko ari abanyururu muri gereza zahuye n’inkongi y’umuriro… n’ibindi n’ibindi.

Kubera amateka ya vuba mu Burundi, y’imirambo yagiye irobwa mu migezi n’ibiyaga, twashatse kumenya niba nta y’indi migezi

Imvura ntiyatworoheye, urugendo rurakomeza tugana ku kiyaga cya Rweru. Twabanje kunyura ku mupaka w’u Burundi na Tanzania gushaka impamba, cyane ko ari naho ukatira mbere y’uko ufata urugendo rw’ibirometero hafi 100 kugera ku Rweru.

Kuri komini Giteranyi twahageze mu masaa 7 za kumanywa, turamutsa umuyobozi tuhasanze, tuhamara iminota itarenze icumi turakomeza tugana ku kiyaga imvura ituri ku mutwe.

Twashyikiye muri zone ya Masaka aho twakiriwe n’umuyobozi w’abarobyi, Sadiki Nyandwi. Uyu niwe watugejeje ku basirikare ba marine, abwira abasirikare ko abashyitsi baje. Uko tugenda, ni uko tubigenza ngo tubone kugenda, Nyandwi niwe wabiteguraga.

Abo twagombaga kubonana nabo, ari abo mu Burundi n’abo mu Rwanda, Sadiki niwe wabateguraga. Ari abarobyi ari n’abayobozi yarabateguzaga.

Nyuma yo gutegura ubwato tugendamo, abasirikare batwambitse udushati dutuma tutarohama dufata iy’ikiyaga umusirikare umwe afite imbunda. Bombi twamaranye amasaha nk’atatu muri ayo mazi.

Akagera kamena muri Rweru

Mu gihe twari dutegereje ko Koloneri utegeka aho, agira amabwiriza atanga, ikibazo cya mbere cyari ugushaka kumenya igihe ako kaga k’imirambo gutemba mu Rweru katangiriye.

Igisubizo cya mbere cyari uko bwari ubwa mbere Akagera kayoba kakamena amazi mu Rweru. Twamubajije niba no mu 1994 nta mirambo y’Abatutsi yayobeye aho ngo ireke gukomeza iya Ethiopia nkuko ba Mugesera Leon babiteganyije.

Twibutse ko jenoside yakorewe Abatutsi mu 1994, yatangiye ndetse igakomeza mu gihe hari imvura nyinshi cyane ku buryo n’imigezi yuzuye ikamena mu bishanga.

Igisubizo cyari uko bwari ubwa mbere mu mateka Akagera kayoba kagasagurira Rweru. Igitangaje, kagasagurira icyo kiyaga, ari mu mpeshyi ngo “kubera amazi gukama cyane”. Sindabibonera igisobanuro uburyo byashobotse.

Icyo gisubizo twakibajije abarobyi bose bemeza ko ngo bwari ubwa mbere umugezi ururuka mu majyaruguru umena mu Rweru narwo ruhora rusagurira Akagera nkuko twabibonye.

Icyo gisubizo, kimwe n’ibyo mu kiganiro Ivo n’Imvano cyo ku wa 13 Nzeri, byabeshyuje ibyavuzwe na Prof. Peter Erlinder mu kiganiro yagiranye na Ann Garrison kikajya kuri internet ku itariki ya 1 Nzeri 2014. Ikiganiro cyemeza ko ngo mu 1994 imirambo myinshi y’Abatutsi yageze mu Rweru.

Abo bantu uko ari babiri imvugo yabo ni nk’iy’abajenosideri iyo bavuga ku Rwanda. Ibyo bavuga bashingira kuri raporo yakozwe n’uwitwa Mark Prutsalis (yakoraga muri ONG yitwa Refugees International) yo ku wa 17 Gicurasi 1994.

Iyo raporo yari iy’ibintu biba buri munsi (Situation report) ariko higanjemo iby’abahungiraga muri Tanzania. Icyo gihe abahungaga babwiraga abanyamahanga batari bazi ibyo bamwe bitwaga impunzi bari basize bakoze mu Rwanda ko bahunga ubwicanyi.

Muri icyo kiganiro Peter Erlinder avuga kubyo muri Rweru, agera ku mwanzuro ko abantu bagaragaye mu migezi batemba batari Abatutsi ahubwo bari Abahutu bishwe n’inkotanyi.

Iyo raporo ya Mark Prutsalis nta wundi muntu wayihaye agaciro uretse abajenosideri n’ababashyigikiye. Ni raporo usanga ihabwa agaciro n’imbuga nk’iza MDR, Rwamucyo Eugene, Keith Harmon Snow n’abandi nk’abo.

Ibyo bintu kuba byarasubiriye ubu bifite impamvu. N’uburyo byagiye bitegurwa ubona iperereza ryiza rizagera aho rigera ku isoko ifatika.

Imirambo 40

Nari maze iminsi nsomye inkuru mu kinyamakuru cyo mu Rwanda, Imirasire.com (27 Kanama) inkuru ifite umutwe “Sosiyete Sivile mu Burundi irasaba iperereza rikomeye ku mirambo itoragurwa muri Rweru mu gihe abatavuga rumwe n’ ubutegetsi mu Burundi no mu Rwanda baburirwa irengero”.

Iyo nkuru ikaba yaratangiraga ivuga ngo : “Imirambo irenga 40 imaze kugaragara mu kiyaga cya Rweru uhereye mu kwezi kwa 7 (Nyakanga 2014). Nyuma y’uko kuwa mbere w’iki cyumweru abarobyi b’Abarundi babonye imirambo ibiri ihambiriye mu mifuka ireremba mu kiyaga cya Rweru…”

Kuri 29 Kanama, Imirasire.com yagize icyo yandika kuri iyo mirambo, ariko noneho byari : “Abaturage bo ku gasozi ka Cagakori bavuga ko iyo mirambo irenga 45 yabonetse, ariko igakomeza kujyanwa n’umugezi w’Akagera uyiganisha ku rugomero rwa Rusumo mu Ntara y’Akagera muri Tanzania.”

Kuri uwo munsi, urubuga Inyenyerinews rwamamaza ibitekerezo bya FDLR rwatangaje inkuru ivuga ngo “Burundi : Nta gushyingura imirambo yatoraguwe ituruka mu Kagera i Rwanda”.

Nabo bakavuga ngo “Abaturage bo ku gasozi ka Cagakori bavuga ko iyo mirambo irenga 45 yabonetse, ariko igakomeza kujyanwa n’umugezi w’Akagera uyiganisha ku rugomero rwa Rusumo mu Ntara y’Akagera muri Tanzania.”

Bwarakeye, ku wa 30 Kanama umunyamerikakazi Ann Garrison avuga ko mu Rwanda hari jenoside ya kabiri ikorerwa Abahutu bucece.

Iyo nkuru yari ifite umutwe yise : “Second genocide in Rwanda ? Slow, Silent and Systematic ?”. Muri iyo nkuru, umwanditsi akerekana ko umubare wa 40 yawukuye mu kinyamakuru Voice of Burundi (Ijwi ry’u Burundi) ariko muby’ukuri ari kuli blog yitwa Iwacu.

Ku wa 25 Kanama iyo blog yasohoye inkuru bise “Rwanda, Burundi : des cadavres dans le lac Rweru …” ho abanyamakuru babo Edouard Madirisha na Abbas Mbazumutima batangira inkuru bavuga ngo “Plus de 40 cadavres flottant sur le lac Rweru en commune Giteranyi ont été aperçus et dénombrés depuis le mois de juillet par les pêcheurs, comme le confirment l’administration et la police locales. Cette semaine, ces pêcheurs accompagnés par une unité de la marine, ont vu deux cadavres sur l’embouchure de la Kagera.”

Ucishirije bavuga ko ngo ukurikije amakuru bakesha abarobyi bo mu Rweru imirambo irenga 40 yabonetse ireremba mu kiyaga cya Rweru kiri muri komini ya Giteranyi guhera muri Nyakanga 2014.

Tubajije Emmanuel ibijyanye n’uwo mubare munini cyane w’abantu babonetse mu kiyaga ariko ntibivugwe, yatubwiye ko uko wagezweho atabizi ko turi bubibaze aho tujya.

Twabajije abantu batandukanye kandi batandukanye aho ku kiyaga. Ari Abarundi ari n’Abanyarwanda. Umubare 40 usaga wavuye he ? Nta gisubizo twabonye. Umubare ufatika ni uw’abantu 4 bahambye ku mwaro wa Dagaza ho twanahuriye n’umuyobozi waho.

Twanabwiwe ko hari umwe umurobyi yakuruye akamujyana mu ruzi. Twabajije n’abarobyi mu Rwanda, batubwira ko babonye abantu muri ayo mazi ariko tubura utubwira umubare wa 40 urenga.

Twakomereje iperereza mu gace ko mu Bugesera, ahari ikiraro gihurutse gusenyuka cya Gashora, ku cyambu cya Rugunga kiri mu Bugesera na Kicukiro ho batubwira ko nta bantu bigeze babona batemba muri iyi minsi ya vuba.

Aba mbere banditse iyi nkuru bavugaga imirambo 40 mu kiyaga cya Rweru i Burundi. Igihe byatangiriye bikaba bitavugwaho rumwe.

Tuzakomeza kubibagezaho ejo.

http://umuvugizi.wordpress.com/2014/09/16/00955788/

IBITEKEREZO
Birmingham

1. Abanyarwanda bamwe baba Birmingham NGO baba bagiye gushinga umuryango wabo ushyigikiye kandi uzajya ukorana na amashyaka arwanya Ubutegetsi bwo mu Rwanda. Inkuru ziri gukwirakwira hose mu muryango mugari wa abanyarwanda batuye mu Bwongereza mu karere kitwa West Midland ari naho hari umuryango munini wa abanyarwanda bahatuye witwa West Midland Rwandese Community Association,haravugwa ko hari abanyarwanda bamwe batuye mu gice cya Birmingham bishyize hamwe NGO bashaka gushinga umuryango wabo bakiyomora kuwo Bari basanzwe mo kubera ko bashinja ubuyobozi bwawo NGO kuba bushyira umuryango mu bikorwa byo gushyigikira no kwitabira ibikorwa by'ubutegetsi bwu Rwanda byose bitegurwa na Embassy yaho mu Bwongereza. Hagati aho ariko ikimaze kumenyekana nuko abo banyarwanda NGO baba bariyemeje kuzakorana na abarwanya Ubutegetsi mu Rwanda,abari kwi isonga akaba ari RNC ya Kayumba Nyamwasa,iyobowe na Jonathan MUSONERA mu Bwongereza dore ko bivugwa ko yaba amaze kugirana amanama menshi na Erik Gashema na Peter Nahayo Bari kwi isonga mu ishingwa ryuwo muryango. Biravugwa kandi ko bafatanyije na abagabo bagera kuri 5 batuye aho Birmingham bahoze mu ngabo za Habyarimana FAR Bari mwi ishyaka Ishema rya Padiri Thomas Nahimana. Abanyarwanda batuye muri West Midland bo bavuga ko nta gitanganza babinamo kuba abo Bagabo baba bagiye gukorana na amashyaka arwanya Ubutegetsi mu Rwanda NGO kuko nu ubundi aho Bari hose mu bubari barangwa no gusebya no guhirimbanira kwerekana ko Ubutegetsi mu Rwanda NGO butegekesha igitugu,NGO mu Rwanda nta burenganzira bw'ikiremwa muntu buhari,nta muntu uvuga icyo atekereza,NGO u Rwanda ni nki ikirunga kiri hafi kuruka ndetse bataretse no gusebya umukuru wi igihugu no kumwangisha abantu. Biracyaza tuzagumya tubakurikirane Amakuru ajyanye ni ishingwa ryu yu muryango,gusa twashakaga kuburira abanyarwanda batuye muri Birmingham kwirinda kugwa mu mutego waba banyamatiku bashaka gukurura umwiryane mu banyarwanda batuye muri West Midland.


TANGA IGITEKEREZO

Kwamamaza
Kwamamaza
Also in this section
Dr Gerard Gahima yandagaje bamwe mu bashaka gupfobya no guhakana Jenoside yakorewe abatutsi mu 1994

Dr Gerard Gahima yandagaje bamwe mu bashaka gupfobya no guhakana Jenoside...

Trump yise Koreya ya Ruguru abicanyi nyuma y’urupfu rw’umunyeshuri w’umunyamerika yafunze

Trump yise Koreya ya Ruguru abicanyi nyuma y’urupfu rw’umunyeshuri...

’ Jenoside ’Jeneral Bosco Ntaganda yabonye mu Rwanda ngo niyo yatumye ajya gutabara muri Congo

’ Jenoside ’Jeneral Bosco Ntaganda yabonye mu Rwanda ngo niyo yatumye ajya...

Rujugiro Ayabatwa Tribert yahawe amahirwe yanyuma

Rujugiro Ayabatwa Tribert yahawe amahirwe yanyuma

Trump arashinjwa kwakira amafaranga binyuranyije n’Itegeko Nshinga rya Amerika

Trump arashinjwa kwakira amafaranga binyuranyije n’Itegeko Nshinga rya...

NEW POSTS
Diane Rwigara yaretse NEC ko afite ’ Ubwenegihugu bw’Ububiligi ’ ngo akaba yifuza kuyobora u Rwanda

22-06-2017

Diane Rwigara yaretse NEC ko afite ’ Ubwenegihugu bw’Ububiligi ’ ngo akaba...

Kagame yagaragaje ko yagakwiye kuba ahereza undi ubuyobozi ariko FPR yamusabye ko bakomezanya

21-06-2017

Kagame yagaragaje ko yagakwiye kuba ahereza undi ubuyobozi ariko FPR...

Amabanga y’Ubuto bwa Kagame [ Secrets de Jeunesse ]

20-06-2017

Amabanga y’Ubuto bwa Kagame [ Secrets de Jeunesse ]

Uko Perezida Kagame yasubije umukobwa w’ Umunya Mali wibaza niba yabona Ubunyarwanda

12-06-2017

Uko Perezida Kagame yasubije umukobwa w’ Umunya Mali wibaza niba yabona...

RWANDA DAY : Perezida Kagame yabwiye abanyarwanda ko muri raporo zitandukanye u Rwanda rukomeje kuza ku isonga

12-06-2017

RWANDA DAY : Perezida Kagame yabwiye abanyarwanda ko muri raporo...

Bruxelles : Imyiteguro ya Rwanda Day irarimbanije [ AMAFOTO ]

12-06-2017

Bruxelles : Imyiteguro ya Rwanda Day irarimbanije [ AMAFOTO...

Bruxelles : Abarundi benshi n’ Abacongomani batawe muri yombi bazira gutera amabuye abanyarwanda baje kwakira Perezida Kagame

12-06-2017

Bruxelles : Abarundi benshi n’ Abacongomani batawe muri yombi bazira gutera...

Hari impamvu muri PL na PSD koko bagombaga guhitamo Kagame

9-06-2017

Hari impamvu muri PL na PSD koko bagombaga guhitamo Kagame