LATEST NEWS
URUKUNDO
Kubeshya no kubeshyerana mu misango y’ ubukwe bitangiye gutera ipfunwe abageni n’ abakwe
Publish Date: mardi 15 juillet 2014
VISITS :1788
By admin


"Uwabasabiraga namweje !,Uriya nta kigenda, nta Kinyarwanda nyacyo azi” "Mbega abantu ngo baraseba !!,Ariko se uriya ni ubwa mbere yajya gusabira umuntu, kwinyuramo kuriya ? Mbega abakwe ngo baraseba ? Ariko se iyo bakodesha ba basore basaba neza ? Sha uriya musaza ntazibagirwa ibyo aboneye aha !! Sheri mu gusaba se ntitwabemeje ? Byanteye isoni mbareba urujisho !!! n’andi”.

Aya ni amagambo yumvikana cyane nyuma y’ubukwe yerekana ko uwaje gusabira umusore atabishoboye. Mbese ko imisango y’ubukwe atayizi.

Hari hamwe imiryango yasabanye biyiteranya , igatangira kugirana ubwumvikane buke bitewe n’ibi bikurikira. Kubeshyera umuntu kandi atazi uko yakwisobanura mu bandi bikamurakaza n’abo bazanye.

Gufata umwanya munini bavuga ibibi ku muryango w’umusore bityo bigatera bamwe mu bamuherekeje batangira kubona barengereye. Hakiyongeraho ko ubukwe bw’iki gihe usanga bukorera ku minota bityo ugasanga rimwe na rimwe barakerewe.

Iki cyo gukereza abantu cyo usanga ari cyo imiryango isigaye ipfa cyane. Ugasanga aho bazakorera imisango yo gusaba no gukwa bahakodesheje kandi wenda hari n’abandi bari buhakorere, imodoka bazikodesheje, abavugira inka babakodesheje barajya kuvugira mu bundi bukwe, abakora serivisi ndetse n’amatorero abyina babakodesheje rimwe na rimwe kandi babishyura ku masaha.

Ikindi ugasanga bahawe isaha ntarengwa aho barasezeranira imbere y’Imana, ndetse akenshi ugasanga bahawe n’amasaha ntarengwa y’aho baziyakirira cyangwa aho bazifotoreza, hakiyongeraho ko hari nabatangira kwibaza igihe ubukwe burangirira ngo bitahire kandi batarabutangira, bitewe akenshi n’uko bavuye kure mu ntara cyangwa se bumva ko gushyenga mu misango bibatesha igihe gusa.

Reka mbahe urugero rwabaye mpibereye. Umukobwa baje gusaba, byafashe urugendo runini nk’amasaha 3 n’imodoka.ariko umugeni akaba yari atwite. Bajya mu misango "bati uriya mugabo waje gusaba ni umugome, imodoka ye yanyuzeho ndwaye antera ibyondo,musabye lifuti arikomereza ! nta mugeni wacu twamuha abanze adusabe imbabazi.

Undi ati "uriya musore mwazanye yahoze ari umupagasi iwacu, asiga afashe umwana ku ngufu aracika none ndamubonye nabanze yisobanure,nibitaba ibyo nta mugeni tubaha ! Undi ati "twigeze gushora inka, n’abashumba bawe bashoye maze zigeze ku bibumbiro izanyu zikutse abo basore mwazanye nibo bari barongoye inka zawe, barangije bajya mu mazi barayatoba, bajugunya mo amase maze tubasabye amata batuvuza amabuye, icyo giye twarahakomereye ndetse umwe ahasiga ubuzima.Rero njye rwose sinabaha umugeni ni mushiki wanjye ntawe mubona, nimudasaba imbabazi ngo mwice icyiru cy’ibyo byaha dore ko mutazura umutahira wahaguye !"

Ubwo n’abandi barakomeje, ariko umwe mu basangwa arahaguruka nta jambo ahawe ati "ariko ubwo muragorana mu biki mubeshyerana ? n’ubundi ko umukobwa muramutanga, murashya murushywa ni iki ? Ubundi se mwe ntimuzi ukuri ? nimwitegereze umukobwa !"

N’ubwo uyu musaza yasaga nk’uwagasomye,iki kibazo cye nagihaye agaciro bitewe n’umwanya bamaze bavuga ibibi gusa ku muryango w’umusore ndetse bigera n’aho usabwa n’ umusangiza w’amagambo basabye abasangwa ko bashaka ibintu byiza bavuga kuri uwo muryango usaba, ariko biranga ufashe ijambo wese, yahitaga avuga ibibi.

Byahise binyibutsa ubukwe nigeze gutaha abageni ari abayoboke b’itorero ry’abadiventisiti b’umunsi wa 7, maze mu isengesho ribanziriza imihango umusaza asenga agira ati ".....Mana turagusaba ngo ubu bukwe burangwe n’ukuri bya bindi byo kubeshya no guhimbahimba ko umugeni adahari turabyamaganye mu izina rya Yesu. Mana Ijambo ryawe ribe ariryo riganza,....."

Icyo gihe ubukwe ntibwatinze kuko igisubizo cyari "Yego na Oya" bati twaje gusaba umugeni witwa......,muramuduha ? Igisubizo "yego, arahari nimudukwere,ubundi tumubahe,hano twemera Imana ntabwo tujya kuvuga ngo yagiye ku ishuri, tubeshya cyangwa ngo tubazanire agakecuru. Rwose arahari.".

Izi ngero zombi n’izindi ntabona aho nzandika zishobora kutwigisha. Ese imisango ni ngombwa kandi iharabika ndetse bishobora no kugira ingaruka mu mibanire y’imiryango ? Ese imisango ibaye ikabangamira imigendekere y’ubukwe,aho hari icyo yaba ikimaze ? Ese niba ba nyirikuyikorerwa aribo itera ipfunwe,isoni n’ikimwaro aho akamaro kayo ntikagenda gakendera ?

Kwitiranya uzi ikinyarwanda gikakaye mu misango mbona ko ari nayo ntandaro y’ibyateye byo kujya gukodesha ugusabira,utazi n’amazina ya so,aya nyoko cyangwa n’ayawe bikamusaba kuyandika ku gapapuro yajya ku kuvuga akabanza gusoma, ibi byari "kirazira."

Kuko uwasabiraga umugeni yagombaga kuba ari uwo mu muryango avukamo,agahita aba umugishwanama kuko kera uwagusabiye ntiyakubaga kure kugeza urushinze rugakomera.

Kuba rero mu bukwe,dukodesha abakwe, tugakodesha imyambaro y’ubukwe, aho dusabira, aho twifotoreza, abavuga amazina y’inka, urusengero rwo gusezeraniramo, tugakodesha abazaduherekeza, imodoka n’ibindi,

Ibi ni ibyerekana ko hari byinshi ku muco ujyanye n’ubukwe byamaze kuba amateka.

Mbona ari nayo mpamvu abakiri bato basigaye babona imisango nta mwanya uhambaye bayiha, ndetse n’amatorero ya Gikristo amwe n’amwe asigaye ayigendera kure.kuko usanga bisa no guterana ubuse.

Kera, ubuse bwateranwaga n’abasore, nta musaza wateranaga n’undi ubuse.Iyo byabagaho byitwaga ishyano. wasanga rero abantu baritiranyije imisango no guterana ubuse.kuko imisango habagamo gusanganizwa impundu,hakabamo kumwenyura, no gushayaya kw’ababyinnyi,ibyivugo n’ibisigo byerekana ko uwo nyamwari asigiye agahinda abamwibarutse n’abavandimwe be n’ibindi.

Ibi ni nabyo byatumaga umukobwa ufatwa n’ikiniga, haca umwanya agaturika akarira yibutse ko agiye kurara iwo abandi.

Naho ubuse kwari uguhangana mu gusererezanya ibintu bibi akenshi bitabayeho maze warakara bakakwita "igifura." icyo gihe uwarakaye yatahanaga umujinya n’uwamurakaje akagenda yigamba ngo namugaraguye pe !’ bijya gusa rero nay a magambo twatangiriye avugwa nyuma y’ubukwe nk’aho imisango wagirano bayihinduye ubuse.

Niba mwitegereza rero mukareba ibibera mu bukwe bumwe na bumwe twabyita "ubuse" kuko niyo abageni bamaze kubana nabo barabivugana ngo twarabemeje mu bukwe rimwe bikabamo inzika. Numva ko imisango yo gusaba no gukwa itahindurwa nko guterana ubuse.ahubwo harebwa ibidakwiye ndetse hakarebwa icyo imisango bivuze ubundi tukagaruka ku muco nyakuri.

Ntabwo umukwe n’umusangwa basabana barakaranye ngo ubukwe bushushanye ibyishimo. Imisango y’ubukwe si ugukoresha ikinyarwanda cya kera ,abatashye ubukwe batumva. Imisango si uguharabika abakwe bawe.Imisango si uguserereza.

Imisango si ugushyamirana mu biganiro. Imisango ni umuco wo guhana umwanya hagati y’abakuru b’imiryango yombi. Bakubahana, bagasangira ijambo kandi abateraniye aho bakanezezwa n’ibiganiro byuzuye umunezero abasaza bombi bagiranye.

Inkuru y’ Izuba-Rirashe

IBITEKEREZO
Imenagitero moses

Tuzahure tuganire 0788379061

iwacu

Nibyo bajyabavuga ukuri

RJ

Mureba kure niko bisigaye bimeze kabisa !


TANGA IGITEKEREZO

Kwamamaza
Kwamamaza
Also in this section
Bombori bombori mu rukundo nyakuri kubera facebook , twitter na Whatsapp

Bombori bombori mu rukundo nyakuri kubera facebook , twitter na...

Wamenya ute ko umukobwa agukunda byukuri ?

Wamenya ute ko umukobwa agukunda byukuri ?

Amakosa wakora agatuma ugwa ku ishyiga

Amakosa wakora agatuma ugwa ku ishyiga

Wari uziko Ijambo “Mbabarira” rishobora kubaka urukundo mu gihe umubano wanyu wajemo agatotsi ?

Wari uziko Ijambo “Mbabarira” rishobora kubaka urukundo mu gihe umubano wanyu...

Ubutumwa bugenewe abakobwa bateganya gushaka

Ubutumwa bugenewe abakobwa bateganya gushaka

NEW POSTS
Hanze y’igihugu haracyari indashima nyuma y’imyaka 23 Leta y’ubumwe bw’abanyarwanda igiyeho

25-07-2017

Hanze y’igihugu haracyari indashima nyuma y’imyaka 23 Leta y’ubumwe...

Lt Gen Karenzi Karake na Maj. Gen Jack Nziza mu basirikare bakuru basezerewe

21-07-2017

Lt Gen Karenzi Karake na Maj. Gen Jack Nziza mu basirikare bakuru...

Menya abakandida bahatanira kuyobora u Rwanda

14-07-2017

Menya abakandida bahatanira kuyobora u Rwanda

Abaturage Kaniga ngo’ RPF - Inkotanyi ’ iri hafi guhindura aho batuye paradizo

14-07-2017

Abaturage Kaniga ngo’ RPF - Inkotanyi ’ iri hafi guhindura aho batuye...

Ukuntu Perezida wa Green Party yanga abamuvuga ibyo adashaka atowe yavamo umunyagitugu

12-07-2017

Ukuntu Perezida wa Green Party yanga abamuvuga ibyo adashaka atowe yavamo...

Ubukungu bw’u Rwanda bwiyongereye ku kigero cya 1.7% mu gihembwe cya mbere cya 2017

10-07-2017

Ubukungu bw’u Rwanda bwiyongereye ku kigero cya 1.7% mu gihembwe cya mbere...

Hamuritswe igitabo cyiswe ’’amakayi y’urwibutso’’ kivuga ku nzira y’umusaraba Abatutsi banyuzemo

10-07-2017

Hamuritswe igitabo cyiswe ’’amakayi y’urwibutso’’ kivuga ku nzira y’umusaraba...