Ubwo hakinwaga umukino wa Kane wa Betpawa Playoffs 2024, ikipe ya Patriots BBC yatsinze APR BBC bituma amakipe yombi anganya imikino 2 kuri 2, muri irindwi bagomba gukina.
Ni imikino irimo gukinwa mu rwego rwo guhatanira igikombe cya shampiyona y’u Rwanda mu mwaka wa 2024 ndetse akaba ari nawe uzahagarira u Rwanda mu mikino na BAL 2025.
Muri uyu mukino watangiye amakipe yombi acungana cyane kugeza ubwo Agace ka mbere karangiye amakipe yombi anganya amanota 14-14.
Igice cya Mbere cy’umukino wa nyuma wa kane mu ya Kamarampaka muri Shampiyona ya Basketball, cyarangiye Patriots iyoboye n’amanota 24 kuri 20 ya APR.
Agace ka gatatu karangiye Patriots BBC ikomeje kuyobora umukino n’amanota 48 kuri 40 ya APR.
Muri rusange, Umukino warangiye Patriots yatsinze APR BBC amanota 61-49 bityo amakipe yombi anganya intsinzi ebyiri.
Stephaun Branch wa Patriots ni we watsinze amanota menshi (16), akora ’rebounds’ 14 ndetse anatanga imipira itanu yavuyemo amanota kuri bagenzi be.
Umukino wa gatanu uteganyijwe ku wa Gatanu, tariki 20 Nzeri 2024 muri BK Arena guhera saa tatu, ni mugihe uyu mukino uzabanzirizwa n’uwo guhatanira umwanya wa Gatatu uzahuza REG BBC na Kepler BBC.
Uyu mukino wa Kane wa Playoffs wabanjirijwe n’indi yakinwe ya Rwanda Cup yarangiye ikipe ya APR BBC igeze ku mukino wa nyuma izakinamo na REG WBBC.
Ikipe ya REG WBBC itsinze IPRC HUYE WBBC amanota 96-64. REG WBBC ihita ibona itike yo kwerekeza ku mukino wa nyuma.
APR WBBC yo yatsinze ikipe ya Kepler WBBC mu mukino utari woroshye amanota 59-57 ku kinyuranyo cy’amanota abiri gusa nayo ibona itike yo gukina umukino wa nyuma.
