Amasezerano ya Leta ya Repubulika Iharanira Demokarasi ya Congo (RDC) n’ikipe ya FC Barcelona yo muri Esipanye yo kwamamaza igihugu binyuze mu mupira w’amaguru yahagaritswe by’agateganyo, ni nyuma y’amakimbirane yaturutse ku mafaranga ya komisiyo.
Aya masezerano yasinywe muri Nyakanga 2025, aho yari ateganyijwe kumara imyaka ine. Yari agamije guteza imbere isura ya RDC ku rwego mpuzamahanga, binyuze mu bufatanye na FC Barcelona.
Mu byari bigize ayo masezerano harimo ko amakipe ya FC Barcelona azajya akoresha imyambaro y’imyitozo iriho ubutumwa bugira buti “R.D. Congo – Cœur d’Afrique”, bisobanuye “RDC – Umutima wa Afurika.”
Kuri ubu, ubwo butumwa ntibukigaragara ku myambaro y’imyitozo y’amakipe ya Barcelona, mu gihe amasezerano yari akwiye kumara imyaka ine yahagaritswe ataramara umwaka w’imikino umwe.
Nk’uko ibitangazamakuru bitandukanye byabyanditse birimo Mediapart, yatangaje ko intandaro y’ikibazo ari komisiyo y’icumi ku ijana (10%) y’ingano k’agaciro kose k’Amasezerano, ingana na hafi €4.3M, ku masezerano afite agaciro ka hafi €43M.
Ibigo bibiri by’Abafaransa, Ya’ats Sports na Ventilo Sports, byombi byagiye bigira uruhare mu biganiro byerekeranye n’aya masezerano, ariko nyuma havuka kutumvikana ku wagombaga guhabwa iyo komisiyo.
Ya’ats Sports yari yaratangiye ibiganiro na FC Barcelona mbere, mu gihe Ventilo Sports na yo yaje kugira uruhare mu biganiro byahuzaga Barcelona n’ubuyobozi bwa Leta ya Repubulika Iharanira Demokarasi ya Congo (RDC).
Raporo ya Mediapart ivuga ko Barcelona yari isanzwe izi uruhare rwa Ya’ats Sports mu ntangiriro z’umushinga. Icyakora, nyuma y’uko havutse ikibazo kuri komisiyo, ibiganiro byo kuyigabana hagati y’ibigo byombi ntibyatanze umusaruro.
Ibyo byatumye amasezerano ahagarikwa mu gihe amakimbirane akomeje gushakirwa umuti.
Ubufatanye bwa RDC na Barcelona bwari bwatangajwe nk’umushinga ukomeye wo kumenyekanisha igihugu ku ruhando mpuzamahanga, hifashishijwe izina n’ubwamamare bw’ikipe yo muri Espagne.
Ariko kuba amasezerano yari ateganyijwe kumara imyaka ine ahagaritswe mbere y’uko umwaka wa mbere urangira, byateje impaka ku buryo umushinga wari wateguwe n’uko amafaranga yari agenewe abahuza yagombaga gucungwa.
Kugeza ubu, FC Barcelona ntiratangaza ku mugaragaro ibisobanuro birambuye ku ihagarikwa ry’aya masezerano. Mu gihe amakimbirane ku mafaranga ya komisiyo akomeje gukurikiranwa, ubutumwa bwo kwamamaza ntibukigaragara ku myambaro y’imyitozo ya Barcelona.
Abakurikiranira hafi iby’aya masezerano banenga ubuyobozi bw’iki gihugu k’ubwo kudacunga neza umutungo wa rubanda cyane ko ayo mamiliyoni ava mu butunzi bw’igihugu, bakavuga ko bakabaye bashyiraho uburyo bwiza bwo gucungu umutungo w’igihugu.
