Ikipe y’Igihugu y’u Rwanda mu mukino w’intoki wa Volleyball y’Abagabo yageze i Kigali nyuma yo gusoza imikino y’Igikombe cya Afurika cya 2026 cyabereye i Tunis muri Tunisia.
U Rwanda rwasoje iri rushanwa ku mwanya wa gatandatu, aho rwatsinzwe na Misiri amaseti 3-0 mu mukino wo guhatanira umwanya wa gatanu. Misiri yatsinze amaseti 3-0 (25-16, 25-21 na 26-24).
Muri iri rushanwa, Ikipe y’igihugu yatangiye neza atsinda Repubulika ya Centrafrique ndetse na Repubulika Iharanira Demokarasi ya Congo, mbere yo gutsindwa na Cameroun 3-1 mu mukino wa nyuma wo mu itsinda.
Mu mikino yakurikiyeho, u Rwanda rwatsinze Gambia amaseti 3-0 mu mikino wa Kimwe cy’Umunani cy’irangiza ruhita ruhura na Tunisia muri ¼ cy’irangiza. Ikipe y’igihugu ya Tunisia yatsinze u Rwanda 3-0, bituma rujya mu mikino yo guhatanira imyanya ya 5 kugeza ku wa 8.
U Rwanda rwongeye kubona intsinzi mu mukino wo guhatanira imyanya, rwatsinze Nigeria amaseti 3-1, aho Captain Wiclif Dusenge yakoreyemo amanota menshi 26. Iyi ntsinzi yahejeje u Rwanda amahirwe yo guhatanira umwanya wa gatanu, ariko Misiri itsinda uyu mukino ku maseti 3-0.
Kuba u Rwanda rwarangije ku mwanya wa gatandatu bisobanuye ko rwasubiyemo ku mwanya rwari rwabonye mu Gikombe cya Afurika cya 2023 cyabereye muri Misiri.
Iri rushanwa ryegukanywe na Tunisia, itsinze Cameroun ku mukino wa nyuma amaseti 3-0.
U Rwanda rwari rwitabiriye iri rushanwa ku nshuro ya munani kuva rwinjiye bwa mbere mu 1987. Umwanya mwiza rwigeze kugeraho ni uwa gatanu, wabonetse mu 2005.
