Kuva mu cyumweru gishize, mu bigarasha n’abajenisideri haravugwa inkuru yamamaza umuyoboro mushya wa YouTube wa Jenerali BEM Emmanuel Habyarimana, bakunze kwita” Mukaru”.
Byari bimenyererwe ko YouTube Channels nyinsgi ari iz’urubyiruko rwishakira imirimo, dore ko ari hamwe mu hantu umuntu ushishikaye ashobora gukura udufaranga atarengaho ngo yicwe n’inzara.
Biratangaje rero niba n’umuntu uri ku rwego rwa jenerali, wagize imyanya ikomeye mu butegetsi, irimo na Minisitiri w’Ingabo, ashakishiriza ibirayi ku mbuga nkoranyambaga.
Icyakora, hari abasesenguzi basanga ntawe bikwiye gutungura, kuko “jenerali” ukerakera mu mahanga ntaho ataniye n’izindi mpunzi, kuko buri kwezi bose bahurira ku murongo w’abafata imfashanyo, cyangwa bakabunza akebo ngo abagiraneza babanagiremo uduceri tubarenza umunsi.
Ubundi impunzi nko mu bihugu by’Uburayi n’Amerika, usanga zishabika nko mu gukora amasuku, ubuzamu, gukora mu tubari, guterura amakarito mu nganda no muri supermarkets, n’utundi turimo duciriritse ariko dufasha gusunika iminsi.
Iyi mirimo isaba imbaraga, Jenerali BEM Emmanuel Habyarimana we ntiyayibasha kubera n’izabukuru. Aho aba mu Busuwisi, atunzwe no gusebya uRwanda nk’ibindi bigarasha byose bibeshwaho n’ikinyoma, byiyita “abatavuga rumwe n’ubutegetsi bw’u Rwanda”!
Uyu mukambwe rero yararebye asanga udufaranga tw’ubuhunzi ahabwa tudahagije, ngo abashe no kuringanira na kontwari mu runywero, ajye no mu ishimishamubiri, dore ko akiri no mu Rwanda yari yihariye agahigo muri izo ngeso zombi.
Mu myumvire ye isekeje, gushakira amaramuko kuri YouTube Channel ntabifata nk’ibiciriritse ku muntu wo ku rwego rwa Jenerali BEM, ahubwo arumva aciye umuvuno:
– Umuzindaro wa YouTube uzamufasha gukomeza gukoronga, ba nyamwongerabibi barusheho kumufata nk’impirimbanyi ya demokarasi, bityo imfashanyo yiyongere.
– Uko azakaza umurego mu gusebanya kandi, ni nako inyangabirama zizayoboka YouTube Channel ye, abone agafaranga ko kwihina munsi y’igitanda.
Jenerali BEM Emmanuel Habyarimana alias Mukaru, yahoze mu ngabo zatsinzwe, Ex-FAR. Ubushishozi buke bwatumye ingabo yabaga ayoboye zicucumwa aho zacakiraniye hose n’iza FPR-INKOTANYI, bituma Mukaru yitwa icyitso kandi mu by’ukuri ari ubuswa mu kuyobora urugamba.
Aho urugamba rwo guhagarika Jenoside yakorewe Abatutsi rurangiriye, BEM Emmanuel Habyarimana wari ufite ipeti rya Colonel, ni umwe muri benshi binjijwe mu Ngabo z’Igihugu nshya, mu rwego rwo kunga Abanyarwanda. Yazamuwe mu ntera agirwa Jenerali, yewe anahabwa imyanya ikomeye irimo n’uwa Minisitiri w’Ingabo.
Nyakibi rero koko ntirara bushyitsi. Ubunebwe no kwiyandarika, ariko cyane cyane kugira indimi ebyiri, byatumye Jenerali Habyarimana atakarizwa icyizere, nuko ayabangira ingata, aboneza iy’ubuhungiro atyo.
Hari amakuru avuga ko yakomanze mu mitwe y’iterabwoba nka FDLR, kugirango nawe arye ku bisahurano byo muri Kongo, ariko abamutanzemo bakamunenga kwikundira ubuzima bworoshye.
Jenerali urwanira intambara akanashakishiriza amaramuko kuri YouTube rero, ubanza ntaho aduhishe. Uwo muzindaro we se uje kurusha iki ibitabo by’amahomvu yanditse, abazi ukuri bakamuha urw’amenyo?
Amahirwe ya Jenerali Mukaru, igisebo ntikica( le ridicule ne tue pas)!
