Mu gitondo cyo kuri uyu wa Kabiri tariki 23 Kanama 2016 nibwo amakuru akwiriye imisozi y’u Rwanda ko Kanyankore Gilbert Yaounde na Eric Nshimiyimana bari bahawe umwanya wo guherecyeza Amavubi bambuwe ubwo bubasha.
Amakuru dukesha Inyarwanda.com avuga ko aba batoza bombi bahamagajwe mu biro by’umunyamabanga uhoraho muri MINISPOC bakabwirwa ko batagitoje u Rwanda ku mukino ruzakina na Ghana tariki ya 3 Nzeli 2016 mu rugamba rwo gushaka itike y’igikombe cya Afurika 2017 kizakinirwa muri Gabon.
Nyuma yo kumenya ibi, twashatse kuvugana n’umuyobozi ushinzwe ibikorwa by’ikipe y’igihugu (Team Manager) atubwira ko twakoresha ubutumwa bugufi (message) ariko ntiyasubiza ikibazo yabajijwe. Kanyankore Gilbert Yaounde wari wagizwe umutoza umutoza mukuru we yemeje aya makuru avuga ko yitabye we na Eric bakabwirwa ko nta burenganzira bafite bwo gutoza Amavubi ariko ntiyashatse kugaragaza icyo bazize.
Eric wambuwe kungiriza mu ikipe y’igihugu
Gusa aba bagabo bakimara gutangazwa nk’abatoza b’Amavubi hari benshi bagaragaje ko bayihawe batabikwiye kuko ngo Kanyankore aribwo yarakigera mu Rwanda ntamakuru yarafite ku Mavubi,naho Eric nubwo yatowe nk’umutoza w’umwaka ariko byagragaye ko uyu mwanya atarawukwiye.
Ntakirutimana Alfred
