Byiringiro Lague ukina mu mpande asatira izamu ari mu biganiro bya nyuma na Durban City FC yo muri Afurika y’Epfo, kugira ngo ayerekezemo nyuma yo gutandukana na Police FC.
Muri Kamena 2026, ni bwo Police FC yasezereye abakinnyi batandukanye yifashishaga mu mwaka ushize w’imikino wa 2025/26, icyo gihe hakaba harimo na Byiringiro wagaragazaga urwego rwiza mu kibuga ariko hanze y’ikibuga bikagorana.
Nyuma y’igihe gito uyu mukinnyi yavuze ko Shampiyona y’u Rwanda yamunaniye kuko atari umukinnyi wo ku rwego rwayo, bityo ari gushaka indi kipe nziza azakinira hanze y’u Rwanda.
Nyuma yo kuganira n’amakipe atandukanye, yemeranyije na Durban City FC yo mu Cyiciro cya Mbere muri Afurika y’Epfo, ko yayisinyira amasezerano y’imyaka ibiri azatangira gukurikizwa kuva mu mwaka w’imikino wa 2026/27.
Durban City FC iheruka kwemeza umutoza mushya, Khalil Ben Youssef, yasinyishije n’abandi bakinnyi bashya umunani. Abo ni Gaston Sirino, Junior Papier, Kabelo Mofokeng, Lifa Makua, Siya Msomi, John Mokone, Tylo Sanger na Seth Green.
Byiringiro Lague yamaze gukatishirizwa itike y’indege izamujyana muri Afurika y’Epfo, ndetse biteganyijwe ko azahaguruka mu Rwanda ku itariki ya 7 Kanama 2026.
Uyu mukinnyi wanyuze muri Vision FC, Isonga FC na Intare FC mbere yo kuzamurwa mu ikipe nkuru ya APR FC, yakiniye andi makipe arimo Sandvikens IF yo mu Cyiciro cya Kabiri muri Suède.
