Etincelles FC yabonye amanota 3 imbumbe yayo imbere ya AS Kigali, umukino wa mbere Shaban Houssein Tshabalala atabonyemo igitego, Sunrise FC yo yanyagiye Mukura ibitego 4-2.
Kuri uyu wa mbere tariki ya 10 Gicurasi 2021, hatangiye imikino yo kwishyura mu matsinda ya Shampiyona y’icyiciro cya mbere mu mupira w’amaguru mu Rwanda, imikino yatangiranye impinduka.
Mu itsinda rya C
Police FC yari yakiriye Musanze FC, kuri sitade Amahoro, Iyitsinda ibitego 2-1 bya Ndayishimiye Antoine Dominique ku munota wa 27 na Sibomana Patrick Papy ku munota wa 83 mu gihe Musanze FC yatsindiwe na Niyitegeka Iddrissa ku munota wa 52.
Muri iri tsinda kandi Etincelles itari yakabonye intsinzi, yari yakiriye AS Kigali yari imaze gutsinda imikino yose, AS Kigali yabonye igitego hakiri kare ku munota wa 14 gitsinzwe na Muhadjiri Hakizimana, Etincelles irakishyura ku munota wa 31 gitsinzwe na Niyonkuru Ramadhan hanyuma, Hassan Brahim Djibrine ashyiramo igitego cy’intsinzi ku munota wa 89′.
Umunsi wa kane usize AS Kigali iyoboye n’amanota 9 inganya na Police, mu gihe Musanze na Etincelles zifite amanota 3 kuri 3.
Mu itsinda rya D
I Nyagatare kuri stade Gologotha, Sunrise yakiraga Mukura VS itameze neza muri iyi minsi, iyinyagira ibiteho 4-2 ibitego byatsinzwe na Mudeyi Souleiman ku munota 10 ndetse nuwa 25, Hassan Mubiru atsinda penaliti ku munota wa 23 mbere y’uko Mwizerwa Elisa atsinda icya kane ku munota wa 73, Mukura Vs&L yatsindiwe na Muniru AbdulRahiman ku munota wa 15 na Iradukunda Barthélemy bita Inky watsinze ku munota wa 90.
Muri iri tsinda kandi Espoir yari yakiriye Marines FC i Rusizi itsindirwa mu rugo igitego 1-0 cya Mugenzi Bienvenue ku munota wa 55.
Umunsi wa kane usize Marines na Sunrise zifite amanota 7, Espoir 6 mu gihe Mukura iri ku mwanya wa nyuma n’amanota 2
Kuri uyu munsi imikino irakomeza:
Mu itsinda rya A
APR FC vs Bugesera FC (Huye, saa cyenda)
AS Muhanga vs Gorilla FC (Muhanga, saa cyenda)
Itsinda B
Rayon Sports vs Rutsiro FC (Amahoro, saa cyenda)
Kiyovu Sports vs Gasogi utd (Mumena, saa cyenda)
