Mu mwaka w’2004 Padiri Nahimana Thomas abifashijwemo n’abapadiri bagenzi be b’I Bukavu bamusabiye pasiporo yitegura guhunga. Muri uwo mwaka Nahimana Thomas yavuye mu Rwanda agendeye kuri pasiporo y’igihugu duturanye cya DR Congo irimo visa y’abafaransa.
Padiri Nahimana wa diyoseze ya Cyangugu, ageze i Paris ari declara (déclaré ) nk’impunzi. Bamuha ubuhungiro avuga ko ntamutekano uri mu Rwanda. Ko ariyo mpamvu yagiye gushaka pasiporo y’ikindi gihugu kugirango ahave.
Nguko uko Padiri Nahimana mu buhungiro yihaye inshingano yo kwamamaza urwango n’ingengabitekerezo ya jenoside ku rubuga rwe (leprophete.fr) ari nako yandika ibintu bibi ku Rwanda.Abafaransa babibonye bamuha uburenganzira bwo kuhaba, barareba basanga atarakwiye gukomeza kuba mu Rwanda ndetse mugihe gito bamuha n’ubwenegihugu b’ubufaransa.
Wakeka uti, Nahimana wiyambaje Kinshasa- Bukavu gushakirayo pasiporo ntayandi mahitamo yari afite oya ni amayeri Nahimana we ku giti cye yashatse kwereka “ABAFARANSA” ndetse n’ aba“ESPAGNORE” bamuri inyuma ko mu rwanda ntamutekano uhari, ko abantu bicwa, Abafaransa na Espagne baramwumva kandi birazwi ko nyuma ya pasiporo y’inyekongo kuboneka, abo bashakaga guhungisha Padiri Nahimana nibo bari bafite inshingano ya visa kugirango bazamugire igikoresho igihe kigeze, aricyo cy’ubu ( 2017). gukuraho Kagame.
Hari byinshi umuntu akwiye gukomeza kwibaza kuri Nahimana, Espagne na France biri mu bihugu bikorerwamo cyane propaganda y’impuzamugambi nka CDR yakera Nahimana na bagenzi be babaha amafaranga menshi yiyo Propaganda.
Abamufashije guhunga ni nabo bari inyuma y’ibi byose byo gushakisha inkunga zo kumwamamaza nk’umukandida w’umukuru w’igihugu, babizi neza ko atatsinda, ahubwo ari ugutesha igihugu cy’u Rwanda umutwe gusa ! ninabo bari inyuma y’urubuga rwe leprophete n’ishyaka Ishema ( Parmehutu (Hutu-Power ) yavukiye i Paris.
Mugutegura ibi byose nka journal Kangura, tariki 25 Kamena 2015, leprophete yanditse iti : « Ndabasabye mbakangurira abahutu bose iyo bava bakagera bari mu rwanda ko bakwiye guhaguruka kwigobotora ingoma y’igitugu ntutsi ibaryamira, ibabuza uburenganzira bwanyu ».Ngiyo ideologie ya Parmehutu ( Kayibanda na Gitera) na Kangura.
Hari amakuru avuga ko Nahimana, abazungu uretse Abafaransa, abandi bamwimye imfashanyo ibi ariko ntitwabihamya, abazungu ngo barabibonye iby’amacakubiri ye babona ko najya mu rwanda bizajegeja ubuyobozi buriho bukarekura imfungwa zirimo Victoire Ingabire, Deo Mushayidi ngo Nakizito Mihigo.
Muri misiyo Nahimana yarimo muri Amerika I Texas aho bita Laredo aha Thomas Nahimana yahuye n’abanyarwanda b’impunzi barimo Rusesabagina Paul n’undi muntu Rusesabagina yahemukiye witwa DR Eliel (Nataki) Ntakirutimana nyiri ibitaro « HOPITAL LAREDO » biba aho Texas, uyu nimwene Pasteur Ntakirutimana waguye Arusha muri gereza aho yari afungiye ibyaha bya Jenoside bakaba abanyakibuye. Nahimana kandi yabonanye n’abanzi b’u Rwanda batandukanye. Habaye inama iyo nama yakusanyirijwemo amafaranga atari make yo guha Nahimana ngo ajye mu Rwanda gukuraho ubutegetsi buriho, Nahimana yavuze ko agiye mu Rwanda kumara abahutu ubwoba ngo kandi ari benshi ko ajyanye misiyo yo kubabwira kwitondera umuyobozi batibonamo, butari ubwa mwene wabo.
Imitwe ya Nahimana
Mu matangazo yari yakwirakwije hirya nohino we n’ishyaka rye, ryavugaga ko uyu mupadiri n’abamuherekeje bazagera i Kanombe baturutse i Paris kuwa mbere mu ndege y’ikompanyi y’Abaholandi, KLM, izahagera saa 19:20.
Ibi yari yatangaje byari ikinyoma, ahubwo yinyujije ku kibuga cy’indege cya Zaventem mu Bubiligi, kugirango abantu bamubone, arangije akwirakwiza udufoto twe kuri whatsapp, ari mu ndege kukibuga kitazwi, kugirango abone icyo abwira itangazamakuru. ( Reba agafoto )
Thomas Nahimana ari kukibuga cy’indege kitazwi
Ikibazo cya Thomas ni uko abeshya cyane kandi byaje gutahurwa n’uko indege ya SN ya mu gitondo yagiye itamujyanye.” Naho ubundi rwose nkuko twabitohoje nta rupapuro rwa Leta y’u Rwanda ruri kukibuga cy’indege cya Zaventem mu Bubiligi rubuza Nahimana gutaha.
Hari kandi mwene wabo wa Nahimana yatekeye umutwe amuraza ku kibuga cy’indege cya Kanombe amutegereje, amaso yaheze mu kirere, nawe yabeshye bene wabo benshi ko Nahimana yabujijwe gutaha.
Twaje kumenya kandi ko ari ikinamico Nahimana yakinnye kugirango abone uko akomeza gusaba inkunga, anasobanure (JUSTIFICATION) ibya Cash yakuye muri Amerika n’amafaranga yahawe n’Abafaransa nyuma y’ijambo rya Perezida Kagame yavugiye munama ya biro politiki y’umuryango RPF-Inkotanyi avuga ako atumva impamvu Nahimana yabujijwe kuza, maze Nahimana abyuririraho asaba amafaranga menshi mu bazungu yo gutaha ngo Kagame yabyemeye, ariko mu byukuri ibyo byo gutaha n’imitwe ntagahunda Nahimana afite yo kujya mu Rwanda, kuko aziko yabazwa ibyo yakoze ageze mu Rwanda.
Azakomeza kwitwaza iby’impapuro zinzira n’ibya visa asebye u Rwanda ko rwamujije gutaha, ariko ibi byose ni ukubeshya. Ninde se wamubujije gutaha ko yasabye Visa nk’Umufaransa, naze akubitane na Komisiyo y’Amatora imubaze ukuntu umufaransa ashaka kuyobora abanyarwanda. Kereka niba tukiri mu bukoroni.
Ikindi biragaragara ko Padiri Thomas Nahimana afite imiziro yo kwiyamamariza umwanya w’Umukuru w’Igihug cy’u Rwanda, ingingo ya 99 mu itegeko nshinga igira iti:”Umukandida ku mwanya wa Perezida wa Repubulika agomba kuba afite ubwenegihugu bw’inkomoko nyarwanda, nta bundi bwenegihugu afite; Naho Nahimana wigize umufaransa ushaka kuyobora Abanyarwanda bizamurushya. Reka tubitege amaso.
Burasa jean Gualbert
