Polisi yataye muri yombi umugore ukomoka muri Uganda witwa Jackline Nabagesera Kasha imuziza imyitwarire mibi n’ubusinzi.
Mu itangazo Polisi y’u Rwanda yashyize ku rukuta rwayo rwa Twitter, yavuze ko Kasha yatawe muri yombi kubera imyitwarire mibi n’ubusinzi ndetse ko harafatwa imyanzuro ikwiriye kuri iki kibazo. Itabwa muri yombi by’agateganyo rya Kasha ngo rifitanye isano n’imyitwarire yagaragaje ku Kibuga cy’Indege i Kanombe.
Kasha watawe muri yombi azwi nk’umwe mu mpirimbanyi zivuganira abatinganyi muri Uganda ndetse afite umuryango yashinze bahuriyemo witwa ’Freedom & Roam Uganda’ (FARUG).
Hari amakuru avuga ko yari aje mu Rwanda kugira ngo aze guhura n’Umukinnyi w’ikirangirire wubatse amateka akomeye muri sinema, Morgan Freeman, wageze mu Mujyi wa Kigali kuri uyu wa Gatanu mu ruzinduko atigeze ashaka ko rumenyekana mu binyamakuru.
Umunya-Uganda Jackline Nabagesera Kasha yatawe muri yombi na Polisi i Kanombe
Bivugwa kandi ko Kasha yatawe muri yombi by’agateganyo ejo kuwa Kane tariki ya 11 Gicurasi 2017.
