Sankara Arahigwa Bukware Na RNC ya Kayumba : impamvu ngo ni uko yagurishije Stratégie Za RNC Mu Burundi [ Ibihumbi 20 USD ]

Amakuru Rushyashya ikura ahantu hizewe aravuga ko Nsabimana Calixte Sankara wahoze ari inshuti magara ya Kayumba Nyamwasa  muri  Afrika y’Epfo, ubu ari mu mazi abira, ahigirwa hasi no hejuru na RNC [ Kayumba]  wohereje abicanyi  guhiga Sankara aho yihishe  mu Cibitoki naza Bukinanyana  kubera ko yibye amabanga ya RNC [stratégie z’urugamba] akajya kuzigurisha I Burundi.

Amakuru avuga ko nyirabayazana w’urwango hagati ya Kayumba na Sankara  ari uko Kayumba nta nyungu za Politike yabonaga muri Sankara, ariko yakomeje ku mwiyegereza, amubwira byose  kuko yabonaga urubyiruko rumukunda, Kayumba yamwitaga Bikindi wa RNC kuko yamubonagamo iturufu ikomeye ku rubyiruko, byaje kurangira Sankara amenyanye n’ umukobwa wa Kayumba waruri mu biruhuko kwa se muri Afrika y’epfo kuko batabana, Kayumba ngo yari yasabye umwana ko yaza  gusuhuza  urubyiruko rw’abagize RNC mu nama yarwo yabereye I Cap Town.

Sankara  mu gushyanuka kwe no kwishyira hejuru yahise atangira kureshyareshya umukobwa wa Kayumba munama, kuko yumvaga  kumenyana nawe byaba iturufu yamugeza mu myanya myiza muri RNC. Ibintu byaje gukomera igihe Kayumba yazaga kumenya ko Sankara [Bikindi]  n’iko kazina Kayumba yita Sankara ko amusambanyiriza umwana.

Kayumba akibimenya  ngo yararubiye ararakara cyane ko mu bisanzwe  Kayumba, adakunda abantu babaye mu Rwanda mbere ya Jenoside ya 94 [ baba abahutu baba abatutsi ] ndetse amakuru yizewe  avuga ko yashatse no ku mwica kuko ibintu byose kuri Kayumba ni ukwica.  Sankara akimenya ko Nyamwasa yabimenye  kandi  ko atari bubikire yahiye ubwoba kuko aziko  Kayumba  nta nama n’ imwe yarangira atavuze ijambo “Kwica”. Mu gihe hari gahunda yo kwirukana  burundu Calixte Sankara muri RNC,  Sankara  arabimenya ahita amutanga avuga ko yasezeye muri RNC kubera amafuti ya Kayumba.

Amakuru  Rushyashya yahawe n’umuntu wizewe ,avuga  ko Sankara ashobora kwicwa na RNC, akagwa I Burundi kandi ubu ari guhigwa bukware n’agatsiko  k’abicanyi  kahawe amafaranga na Rujugiro Tribert , Kayumba  yohereje  mu Burundi. Impamvu ngo ni uko Sankara yibye  stratégie  za RNC , yagombaga gukoresha ihungabanya umutekano mu Rwanda iturutse I Burundi na Congo, Sankara akaba  yaragurishije ayo amabanga yose  bamuha  ibihumbi 20 USD  I Burundi,  anizeza u Burundi  gushaka abantu bo gutera u Rwanda, ari nacyo ngo cyatumye  Perezida Nkurunziza, aha FLN  aho gukorera nkuko uwaduhaye aya makuru abihamya.

Kayumba Nyamwasa uhigisha urihindi Calixte Sankara

Amakuru aturuka muri RNC ya Nyamwasa, avuga ko  mugihe Sankara yigambaga igitero muri Nyaruguru, Kayumba ngo yahamagaye Perezida Nkurunziza, aramubaza ati : Ibyo bintu ni ibiki ndikumva ? Undi ati Ese ntimuri kumwe ? Kayumba ati ashwi. Perezida Nkurunziza ati none ko namuhaye byose  nkamuha aho gukorera, nkamuha n’abantu bo kumufasha kuko yavugaga ko muri kumwe biragenda bite ?  Nuko ngo Kayumba abura ayo acira nayo amira kuko ibye byose byari byatanzwe ngo niko kwiyemeza guhigira  Sankara, hasi no hejuru  Kayumba ngo yabwiye abantu be ko  uwo mujura wa FLN, ngo agomba gupfa.  Aya ni amabwiriza ya Kayumba.

Amakuru akaba yemeza ko  Sankara kuri ubu ari kwihishahisha hirya no hino mu Burundi, akaba avugwa mu duce twa Bukinanyana na Cibitoki,  kandi akaba  adashobora gusubira inyuma ngo ajye Tanzania cyangwa Uganda  kuko naho yahasiga agatwe.

RNC ibyo yagombaga gukoresha mu Burundi, byose  Sankara yabineyemo, aritanguranwa avuga ko yafashe Nyungwe , utugambo twinshi  no kwirarira yibeshyera ibyo atakoze bimukozeho.

Iyi migambi [stratégie] ya RNC, Sankara yahaye abarundi niyo  RNC yacungiragaho ni nayo ituma u Burundi bukomeje kwiyenza ku Rwanda kuko bibwira ko bafite amakuru yose yatuma bahungabanya umutekano w’u Rwanda, ntibibwire ko ari ibinyoma by’umutekamutwe  kabuhariwe ,  Nsabimana Calixte alias Sankara  yabapfunyikiye , bikazarangira u Burundi bwisanze mu bibazo budashobora kwizikuramo.