Uganda: Abaherutse guhohotera utavuga rumwe n’ubutegetsi bagejejwe mu rukiko rwa gisirikare

Abagabo batanu baherutse kugaragara bata muri yombi umwe mu batavuga rumwe n’ubutegetsi ariko mu buryo bwa kinyamanswa kuri uyu wa Gatandatu bagejejwe imbere y’urukiko rwa gisirikare muri Uganda.

Abo bagabo kuri ubu bari muri gereza ya gisirikare, kuwa kane ushize, itariki 18 Ukwakira, bafashwe amashusho bakubitisha ibibuno by’imbunda uwitwa Yusuf Kawooya, mbere yo kumwinjiza mu modoka ya Hiace itwara abagenzi yahise imurengana.

Umuvugizi wungirije w’igisirikare, Lt. Deo Akiiki ku mugoroba wo kuri uyu wa Gatandatu akaba yagaragaje amafoto yo mu rukiko anasohora itangazo ryemeza ko abo bagabo batawe muri yombi bagashyikirizwa urukiko.

Uyu muvugizi w’igisirikare yavuze ko umwe mu bakekwa ari Cpl Daniel Ssenkungu, na bagenzi be bakurikiranweho imyitwarire mibi. Uyu akaba yaboneyeho no gusaba imbabazi mu izina ry’igisirikare cya Uganda, UPDF.

Iyi nkuru dukesha Chimpreports ivuga ko itabwa muri yombi ry’aba ryatumye Abagande benshi bari bagaragaje uburakari, kubera umuco wo kudahana ibyaha bikorwa n’abashinzwe umutekano, biruhutsa.

Minisitiri w’ikoranabuhanga Frank Tumwebaze wari wamaganye iki gikorwa cyakorewe Kawooya ku ikubitiro yashimye  ubuyobozi bwa UPDF kuba bwafashe ababikoze bagashyikirizwa urukiko. Yavuze ko yizeye ko aba ari abafatanya n’umwanzi bagamije guhindanya isura ya NRM no guha icyuho poropaganda z’abatavuga rumwe n’ubutegetsi.