Burundi: Hafashwe umuyobozi wagurishaga intwaro agatsiko k’abarwanyi bavuga Ikinyarwanda

Mu Ntara ya Cibitoke muri Komini Mabayi, mu majyaruguru y’uburengerazuba bw’u Burundi haravugwa itabwa muri yombi ry’umuyobozi bivugwa ko yagurishaga intwaro agatsiko k’abarwanyi kari mu ishyamba rya Kibira.

Uyu muyobozi witwa Messiah Ntunzwenayo n’umushoferi we batawe muri yombi kuwa Gatandatu ushize bafite intwaro. Imbunda 3 zo mu bwoko bwa karachnikov zikaba zarafashwe nk’uko SosMediasBurundi ivuga.

Amakuru agera aha akaba avuga ko uyu muyobozi yaba yagurishaga imbunda agatsiko k’abantu bitwaje ibirwanisho bavuga Ikinyarwanda bashobora kuba bari muri iryo shyamba hatatangajwe iryo ari ryo. Birakekwa ko yaba ari FLN ya Nsabimana Calixte Nsankara na Rusesabagina kuko aribo bavugwa muri iri shyamba ry’ikibira.

Uyu yagize ati :“Twabonye urujya n’uruza rw’abantu bakemangwa muri iki gice,” uyu ni umwe mu bayobozi.

Amakuru kandi akomeza avuga ko uwitwa Wilson Bakara wari umuyobozi w’umudugudu yakuwe ku mirimo ye na guverineri ku Cyumweru. Uyu nawe akaba yashinjwaga gukorana n’agatsiko kitwaje ibirwanisho ngo kaba gacukura amabuye y’agaciro muri iri shyamba ry’igihugu rya Kibira.

Guverineri w’Intara ya Cibitoke akaba yemeje itabwa muri yombi rya Messiah Ntunzwenayo ndetse n’iyirukanwa ku kazi rya Wilson Bakara.