Ku mugoroba wo kuri uyu wa gatandatu, tariki ya 7 Kanama 2021 kuri sitade ya Wembley yo mu Bwongereza, ikipe ya Leceister City yatwaye igikombe cya community Shield itsinze ikipe ya Manchester City igitego kimwe ku busa.
Ni igitego iyi kipe yatsinze ku munota wa 89 w’umukino, ni igitego cyatsinzwe kuri Penaliti yatewe neza n’umunya Nijeriya Kelechi Hienacho wigeze no gukinira ikipe ya Manchester city imyaka ibiri hagati ya 2015 na 2017 mbere y’uko ajya muri Leceister City.
Ni umukino wagaragayemo kandi umukinnyi mushya wa Manchester City, Jack Grealish waguzwe avuye muri Aston Villa gusa ntabwo byamukundiye ko afasha iyi kipe y’abanyamujyi kwitwara neza.
Community Shield ni igikombe gitegurwa na shampiyona y’u Bwongereza kigahuza ikipe yatwaye igikombe cya Shampiyona yo muri icyo gihugu ariyo ya Manchester City ndetse n’ikipe yatwaye igikombe cy’igihugu kizwi nka FA Cup ariyo ya Leicester City.
Leceister City yatwaye iki gikombe cya 2021, kibaye icya kabiri itwaye mu mateka yayo, kuko yaherukaga igikombe nk’iki mu mwaka wa 1971.
Kugeza ubu ikipe ya Manchester United niyo ifite ibikombe byinshi bya Community shield, kugeza ubu ifite ibikombe 21.
Nk’uko iki gikombe kibanziriza shampiyona y’u Bwongereza kibaye habura iminsi mike ngo umwaka w’imikino wa 2021-2022 utangire, biteganyijwe ko umukino wa mbere uzaba ku i tariki ya 13 Kanama 2021 ukazahuza ikipe ya Brentford na Arsenal.
