Ku cyumweru tariki 03 Mata 2022, ahitwa Marcq 25-1000 mu mujyi wa Buruseli mu Bubiligi, habaye inama y’urubyiruko rukomoka ku bajenosideri, ubu narwo rukaba rwarayobeye muri FDU-Inkingi, ya mpanga ya FDLR na DALFA-Umurinzi ya Ingabire Victoire.
Iyo nama yibanze ku gukomeza kuroga urwo rubyiruko, rwigishwa ko nta Jenoside yakorewe Abatutsi yabaye, ko ahubwo Abatutsi aribo bishe Abahutu.
Biramenyerewe ko mu gihe Abanyarwanda baba bitegura cyangwa bari mu cyunamo cyo kwibuka inzirakarengane zazize Jenoside yakorewe Abatutsi, abajenosideri n’ababashyigikiye bo bategura imigambi nk’iyi igayitse, igamije kubangamira icyo gikorwa. Ibi ni nabyo byabaye muri iyo nama y’urubyiruko rwayobeye muri FDU-Inkingi, ubwo rwashishikarizwaga kwibuka Yuvenari Habyarimana n’abandi bambari ba “Hutu-Power”, ngo kuko aribo ntwari.
Ikindi cyabereye muri iyo nama, ni ugukomeza gukusanya “ingemu” ya Ingabire Victoire, bo bavuga ko “ababereye ku rugamba”. Iki gikorwa cyo gusaruza amafaranga yo gutunga Ingabire Vicoire bakimazemo igihe, dore ko amakuru avuga ko buri kwezi yohererezwa hagati ya miliyoni 4 n’eshanu ushyize mu mafaranga y’uRwanda. Urutonde rw’abayatanga n’umubare w’ayo buri wese atanga tuzarugeza ku basomyi bacu mu minsi ya vuba cyane.
Ingabire Victoire ahora ayobya uburari abeshya ko yavuye muri FDU-Inkingi atinya kwirengera amabi yayo, nyamara mu mafaranga amutunze amenshi ni imisanzu akusanyirizwa n’ abajenosideri bo muri FDU-Inkingi.
Kuba abajenosideri bategura ibikorwa byo kubangamira icyunamo cyo kwibuka abazize Jenoside yakorewe Abatutsi, nta gitangaje kirimo. Ikibabaje ni aba bana babo baroga, babaraga ibyabananiye. Rubyiruko nimucire birarura!
Niba mukigira agatimananama, mwagombye kumenya ko uyu mushinga ntacyo wagejeje ba so na ba nyoko, mukawuvamo inzira zikigendwa. Nibitaba ibyo amateka azabashyira mu gatebo kamwe n’ababyeyi banyu bahekuye uRwanda, n’ubu bakaba batarunamura icumu.
