Ikipe y’igihugu y’u Rwanda y’Abagore, She-Amavubi, yakomereje imyiteguro yayo mu mujyi wa Dire Dawa muri Ethiopia, aho izakinira umukino wo kwishyura na Ethiopia mu gushaka itike y’imikino Olempiki ya Los Angeles 2028.
Urugendo rwa She-Amavubi rwatangiye mu gitondo cyo ku wa Gatandatu tariki ya 10 Ukwakira 2026, ikipe ihaguruka i Kigali yerekeza muri Ethiopia. Nyuma yo kugera muri Addis Ababa, yakomereje urugendo mu ndege igana mu mujyi wa Dire Dawa, iherereye mu burasirazuba bwa Ethiopia.
Ikipe n’abandi bagize delegasiyo bageze muri Dire Dawa amahoro, bacumbitse muri Sharif Hotel.
Mu gitondo cyo kuri iki Cyumweru tariki ya 11 Ukwakira 2026, She-Amavubi yakoze imyitozo ya mbere kuva igeze muri Ethiopia. Iyi myitozo yabereye kuri Dire Dawa International Stadium, iri mu ntera y’ibilometero hafi bitatu uvuye kuri hoteli ikipe icumbitsemo, iyoborwa n’umutoza mukuru Casa Mbungo.
Imyitozo yagenze neza, ikipe ikaba izongera gukora imyitozo kuri iki kibuga ku wa Mbere, tariki ya 12 Ukwakira, mu rwego rwo gukomeza kwitegura umukino uteganyijwe ku wa Kabiri, tariki ya 13 Ukwakira 2026.
Umukino uzabera kuri Dire Dawa International Stadium guhera saa kumi z’umugoroba ku isaha yo muri Ethiopia, ni ukuvuga saa cyenda z’amanywa ku isaha yo mu Rwanda.
Uyu ni umukino wo kwishyura mu rugendo rwo gushaka itike y’imikino Olempiki ya 2028, nyuma y’umukino ubanza wabereye kuri Kigali Pelé Stadium.
Kugeza ubu, amakuru atangwa na delegasiyo agaragaza ko abakinnyi n’abandi bayigize bameze neza, bakaba bakomeje imyiteguro nta kibazo.
