Kuri uyu wa Gatandatu tariki ya 20 Mata 2024 nibwo ikipe ya APR FC yegukanye igikombe cya shampiyona y’umwaka w’imikino wa 2023-2024, ni nyuma yo gutsinda Kiyovu SC 1-0.
Ubwo hakinwaga umukino w’umunsi wa 27 wa shampiyona y’u Rwanda, APR FC yatsinze igitego kimwe ku busa cyatsinzwe na Mugisha Gilbert bityo ikipe y’ingabo z’igihugu yuzuza amanota 63.
Mu gihe habura imikino itatu gusa ya shampiyona ngo umwaka w’imikino wa 2023-2024 urangire, APR FC irarusha ikipe ya Kabiri ariyo ya Rayon Sports amanota 12.
Muri iyo mikino 3 isigaye izatanga amanota 9, adashobora kugira icyo amarira ikipe ya Kabiri ku kuba yakura ikipe ya APR FC iyoboye nibyo byatumye itwara igikombe cya Shampiyona.
Gutwara iki gikombe cya Shampiyona kwa APR FC bivuze ko izahagararira u Rwanda mu mikino Nyafurika ihuza amakipe yatwaye shampiyona iwayo azwi nia CAF Champions League.
Ikipe y’ingabo z’igihugu ya APR FC yegukanye Igikombe cya Shampiyona ya 2023/24, bivuze ko itwaye shampiyona ku nshuro ya gatanu yikurikiranya.
Ni Igikombe kandi cya 22 cya Shampiyona yegukanye kuva ishinzwe mu 1993 mu gihe yatangiye gukina Shampiyona y’u Rwanda mu 1995.
Uko indi mikino y’umunsi wa 27 muri shampiyona y’u Rwanda yagenze:
Gasogi United 3-0 Sunrise FC
Marines FC 2-1 Police FC
Bugesera FC 1-3 Rayon Sports
Amagaju FC 0-1 Etoile de l’Est
Kuri iki cyumweru imikino izakomeza:
Etincelles FC vs Muhazi United
Gorilla FC vs Musanze FC
Mukura VSL vs AS Kigali
