Rangira Adrien yitandukanije na Nsabimana Callixte wiyita Sankara

Ibi bibaye nyuma y’inkuru y’umusomyi wacu wacitse ku icumu rya Jenoside yakorewe Abatutsi, twasohoye ku wa Kane taliki ya 19 Nyakanga 2018, umusomyi wa Rushyashya yiyama Sankara Callixte, avuga ko nta muntu wamutumye kuvugira Abacitse ku Icumu.

Soma iyo nkuru hano: 

Nta Muntu Watumye Sankara Kuvugira Abacitse Ku Icumu-Nasigeho

Kuri uyu wa Gatanu taliki 20 Nyakanga 2018, Rushyashya yagiranye ikiganiro na Rangira Adrien uvugwa muri iyo nkuru, maze ava imuzi Sankara, amuvuga amavu n’amavuko ya Nsabimana Callixte wiyise Sankara dore ko  amuzi neza birambuye.

Mu kiganiro twagiranye Rangira Adrien yitandukanije na Nsabimana Calllixte avuga mu magambo ye ati: “Ntacyo mpfana n’iriya Nterahamwe ikorana n’Ingabo zahekuye igihugu harimo n’umuryango akomokamo wose. Kumva ko ubu yiyemeje kunga ubumwe n’abicanyi mu kurwanya abamurokoye genocide ndetse bakamufasha kuba icyo ari cyo  uyu munsi, birenze ukwemera. Jyewe n’abandi bose bagira aho bahurira na we mu muryango, turamwamaganye twivuye inyuma kandi twitandukanije nawe kumugaragaro kandi BURUNDU.

Rangira yatuganirije ku mateka ya Sankara Callixte

Rangira Adrien yatuganirije ku mavu n’amavuko ya Nsabimana Callixte wiyita ‘Sankara’ atubwira ko se wa Callixte yitwaga Gafirigi Gaspard nyina akitwa Mukandutiye Mediatrice bakaba bari batuye I Gacu mu Karere ka Nyanza.

Se wa Rangira Adrien ni Kalinda Andre naho nyina ni Mukatete Concessa, Rangira avukana n’abana barindwi (7), bane (4) muribo bishwe muri Jenoside harokoka bapfa nyuma ya génocide.

Nsabimana Callixte Sankara, ababyeyi be barapfuye bose, avukana n’abana icyenda (9), hasigaye mushikiwe umwe (1), witwa Murebwayire. Ku byerekeye isano mu muryango, Rangira avuga ko Nyakwigendera Gafirigi ari murumuna wa Nyakwigendera Kalinda

Jenoside irangiye Rangira niwe wakiriye Callixte na mushiki  abashyira mu mashuri bariga kugeza barangije amashuri yisumbuye..  Nsabimana Callixte kuva akiri muto yari umwana ugoye kurera. Nsabimana Callixte yatangiriye amashuri yisumbuye muri Secondaire arihirwa na FARG, muri Group Officiel de Butare (Indatwa), ageze mu mwaka ya kabiri Secondaire yaje kurwana n’abafurere bayoboraga icyo kigo baramwirukana ajya kwiga I Rwamagana ari naho yarangirije.

Agezeyo yarezwe gukurura amacakubiri ya politiki muri Kaminuza ndetse aregwa n’ubuyobozi bwa kaminuza kugira idéologie ya génocide. Ibyo ngo byari bishingiye ku myitwarire ye mu guhatanira ubuyobozi bwa AGEUNR acamo abanyeshuri ibice agamije kubigarurira ngo bazamutorere abayobore Umwuka mubi muri Kaminuza wakuruwe n’iyo myitwarire watumye Recteur wa UNR icyo gihe Bwana Lwakabamba  amwirukana burundu muri Kaminuza avuga ko ubuyobozi bwa université busanga afite ingengabitekerezo ya jenoside n’ivangura rishingiye ku moko bishobora guhungabanya ubumwe n’umutekano w’abanyeshuri muri Kaminuza.

Nyuma yo kwirukanwa muri Kaminuza, Nsabimana callixte idosiye ye yayigejeje ku nzego zose no mu rwego rw’Umuvunyi ndetse no mu za gisirikare ariko Lwakabamba aramutsembera amwangira gusubira kwiga i Butare gusa amwemerera ko yajya kwiga ahandi akazazana amanota hanyuma Kaminuza y’u Rwanda ikamuha impamyabumenyi nk’uwayizemo nibwo kugana muri ULK.

Yaba Komisiyo y’Uburenganzira bwa muntu, yaba IBUKA n’izindi nzego barahagurutse icyo gihe baravuga bati ‘umwana wacitse ku icumu rya Jenoside’ yirukanwe azira amacakubiri, ngo arazana amacakubiri ashingiye kuri Jenoside? Abantu bose ntibabyumvaga kuko mu buryo bwumvikana, umwana warokotse Jenoside ntiyazana amacakubiri ashingiye kuri Jenoside.

Nguko uko Sankara yagiye kurangiriza amasomo ye muri ULK, ara defanda muri ULK, ajyana amanota kuri kaminuza I Butare bamuha Diplome mu mategeko ya UNR.

Arangije kubona Diplome nibwo yanditse article rutwitsi mu Kinyamakuru cya Gatete Jean Bosco (Umulinzi), asebya ubutegetsi buriho, byari muri 2011. Polisi imushakishije ngo asobanure iyo nyandiko abaca murihumye  aca panya ahungira Nairobi, inzego z’iperereza z’u rwanda zikomeje kumukurikirana arazicika yerekeza Madagascar aho yumvaga umuvandimwe we Rangira yamufasha guhunga. Nyuma y’igihe gito, abifashijwemo n’inzego z’umutekano ‘icyo gihugu, Rangira yurije indege Nsabimana Callixte imugeza i Kanombe, atabwa muri yombi, hakorwa iperereza, aza gusaba imbabazi, arafungurwa nyuma y’iminsi mike (2011/12). Nyuma yaje gucika ajya Africa y’epfo k uburyo butazwi, agezeyo nibow yinjiye muri RNC.

Ku byavuzwe mu nkuru y’umusomyi ko Rangira yahaye akazi Nsabimana Callixte muri restaurant ye Tam Tam,  Rangira avuga ko ataribyo. Ukuri ni uku uyu Nsabimana yatetse umutwe kuri Bwana Habimana Kizito wari umwarimu muri kaminuza i Butare, n’umugore we Uwonkunda Clementine bakodeshaga iyo restaurant bamugira manager wayo kuko iyo famille yari ituye i Butare. Icyaje kuvamo ni uko yabatwaye amafaranga yose yacurujwe mu gihe cy’amezi atatu akayagira impamba yamufashije gutoroka igihugu yerekeza muri Afurika y’Epfo mu gihe polisi  yari itangiye kumushakisha imaze gushyikirizwa ikirego na Bwana Habimana Kizito.

Ajyenda, ngo yasize kandi agwatirije byinshi mu bikoresho by’iyo restaurant biyiviramo guhomba irafunga. Ibyo byose ngo byatumye Nsabimana na Rangira badacana uwaka kugeza uyu munsi

Ku byerekeye  ibyanditswe mu nkuru ya Rushyashya  birebana na FARG, Rangira  avuga ko yeguye mu Nteko ishinga amategeko kugirango hakorwe iperereza ku byamuvuzweho biturutse cyane cyane  kubamurwanyaga mw’ishyaka UDPR bagambiriye kumuhirika ku mwanya w’ubudepite, iperereza ryakozwe n’inzego za leta zasanze ari umwere.

Mu kiganiro twagiranye, Rangira yasoje yongera gushimangira ko ntaho ahurira na Sankara mu bikorwa bye arimo avuga adashidikanya ko bitazagira aho bimugeza uretse kuba igikoresho cya bamwe mu bakomeza gushaka guhungabanya ubusugire bw’u Rwanda.