Ingabo za Repubulika Iharanira Demukarasi ya Congo zatangaje ko zishe Afrika Gaspard wari ukomeye muri FDLR, Gen Maj Pacifique Ntawunguka uzwi nka Omega usanzwe ari umuyobozi w’uyu mutwe urwaya ubutegetsi bw’u Rwanda aracika.
Aya makuru yemejwe na Maj. Ndjike Kaiko Guillaume, komanda wa operasiyo Sukola 2 iri gukorerwa mu Ntara ya Kivu y’Amajyaruguru nk’uko Interview.CD yabitangaje gusa gucika kwa Gen. Omega kuri kuvugirwa ku mbuga nkoranyambaga.
Afrika Gaspard yiciwe mu gace ka Runga, Tongo muri teritwari ya Rutshuru kuri uyu wa 4 Ukuboza. Ni mu gitero ingabo zahagabye.
Afrika Gaspard yishwe nyuma ya Asifiwe Manudi Nshimiyimana wari wungirije umuyobozi wa ’special force’ ya FDLR yitwa CRAP uherutse gufatirwa i Goma.
Ibitero kuri FDLR n’indi mitwe yitwaje intwaro birakomeje mu burasirazuba bwa Congo/Kinshasa. Amakuru aheruka muri Kivu y’Amagepfo avuga ko abarwanyi basaga 300 bamaze kurambika intwaro, abandi basaga 100 n’imiryango yabo barafashwe.
Imitwe irwanya ubutegetsi bw’u Rwanda ntabwo yorohewe n’ingabo za Congo mu ntara za Kivu zombi. Iyi mitwe ni FDLR, CNRD, FLN, RUD Urunana na RNC ya Kayumba Nyamwasa.
FDLR yiciwe Gen. Mudacumura muri Nzeri, yafatiwe kandi abarimo Ignace Nkaka wamenyekanye nka La Forge Fils Bazeye ndetse na Lt. Col. Nsekanabo Jean Pierre wamenyekanye nka Abega; aba bo bamaze gushyikirizwa u Rwanda. Abarwanyi ba CNRD na FDLR bamaze iminsi bafatirwa muri teritwari ya Kalehe.
FLN iherutse kwicirwa Col. Muhawenimana Theogene (Festus) wicanwe n’abandi barwanyi bagera kuri 80. RUD Urunana yo yiciwe Gen. Musabyimana Juvenal wari uzwi nka Afurika Jean Michel tariki ya 9 Ugushyingo. RNC yo yafatiwe Rtd. Maj. Habib Mudathiru na we wamaze kugezwa mu Rwanda.
