Diane Rwigara na nyina Adeline Mukangemanyi bageze mu rukiko rukuru ku Kimihurura ahagana saa moya n’igice kuri uyu wa kane tariki 16, n’ubwo iburanisha ku bujurire bwabo ryari riteganyijwe saa tatu z’iki gitondo.
Ubushize Adeline Mukangemanyi Rwigara ntabwo yaje mu iburanisha kubera uburwayi. Uyu munsi yaje yambaye umwambaro wa roza kimwe n’umukobwa we.
Baje kuburana ubujurire ku ifungwa n’ifungurwa ry’agateganyo bakatiwe mu kwezi gushize.
Mu cyumba cy’iburanisha kugeza saa mbili n’igicehari abantu bagera kuri 30 baje gukurikirana urubanza hamwe n’abaregwa, abunganizi babo, abacungagereza babazanye n’abanyamakuru bacye.
Abunganizi b’abaregwa bombi, Me Gatera Gashabana wa Adeline Mukangemanyi na Me Pierre Celestin Buhuru wunganira Diane bombi barahari.
Diane Rwigara washakaga kuba umukandida mu matora ya Perezida wa Republika akurikiranyweho icyaha cyo gukoresha impapuro mpimbano.
We Anne na nyina Adeline bahuriye ku cyaha bashinjwa cyo guteza imvururu muri rubanda.Nyina Adeline Rwigara we hakiyongeraho icyaha ashinjwa cyo kubiba amacakubiri muri rubanda.
