Perezida w’Ishyirahamwe ry’Umukino wo gusiganwa ku magare, Aimable Bayingana, yatorewe kuba mu bagize Inama y’Ubutegetsi y’Ishyirahamwe ry’uyu mukino ku mugabane wa Afurika ku nshuro ya Kabiri.
Muri aya matora hatorwa Perezida wa Komite Nyobozi, aho Umunyamisiri, Dr Mohamed Wagih Azzam, ariwe wongeye guhabwa amahirwe naho mu banyamuryango 10 bagize Inama y’ubutegetsi Bayingana yaje ku mwanya wa gatanu n’amanota 27 kuri 31.
Ubwo yari i Luxor mu Misiri aho aya matora yabereye, Bayingana yagaragaje ko kongera gusubizwa mu buyobozi ku mugabane w’Afurika hari icyo bivuze ku Rwanda.
Yagize ati “Nongeye gutorwa kuko no muri manda ishize narimo. Bivuze ko Afurika idufitiye icyizere ko ubunararibonye bwacu n’ibyo tumaze kugeraho mu mukino w’amagare ari icyitegererezo ku bandi.”
Aimable Bayingana asanzwe ari umuyobozi w’Ishyirahamwe ry’umukino w’amagare mu Rwanda umwanya yongeye gutorerwa mu gihe kingana n’imyaka ine, mu matora yabereye ku cyicaro cy’iryo shyirahamwe ku cyumweru tariki ya 26 Mutarama 2014.
Azasoza manda ye nk’umuyobozi wa Ferwacy muri Mutarama 2018 mu gihe muri iyi komite y’umukino w’amagare muri Afurika manda imara imyaka ine bivuze ko azasoza inshingano ze mu 2021.
Aimable Bayingana wa Ferwacy
