Umuforomo wakoreraga ku ivuriro rito ryo muri Zone Bumba, muri Komini Bukinanyana, Intara ya Cibitoke mu Burundi, yahamijwe n’urukiko icyaha cyo gusambanya umugore wari utwite.
Ntunzwenimana Laurent, yahanishije igifungo cy’imyaka irindwi ndetse n’ihazabu y’amafaranga y’u Burundi ahwanye na miliyoni, yahamijwe n’urukiko icyaha cyo gusambanya ku gahato umugore wari uri ku nda yenda kubyara.
Urukiko rukuru rwa Cibitoke, rwatangaje ko Laurent yasambanyije umubyeyi, biviramo umwana yari agiye kubyara guhita apfira mu nda.
Umucamanza muri uru rukiko, yatangaje ko Laurent yagabanyirijwe igihano bitewe n’uko atagoye urukiko, agahita yemera icyaha bitagoranye. Ikinyamakuru UBM News, kikaba gitangaza ko umucamanza yaboneyeho gutangaza ko hari abaganga benshi baca mu rihumye bagenzi babo bagasambanya abarwayi.
Abaganga bakaba bamenyeshejwe ko n’undi wese uzafatwa cyangwa se akaregwa n’umurwayi ko yamusambanyije, atazihanganirwa.
