Uwahoze ari umusirikare mu mutwe wa FDLR, witwa Mbale Hafashimana, yagaragaje amabanga akomeye yerekeye CRAP Unit, ishami ryihariye rya FDLR ryashyiriweho gukora ibikorwa by’iterabwoba mu Rwanda no gufasha ingabo za Kongo (FARDC) mu ntambara zo mu burasirazuba bwa RDC.
Mu kiganiro yagiranye na Kigali Today, Hafashimana yavuze ko CRAP Unit ari umutwe w’abasirikare batoranyijwe mu barangije amahugurwa rusange ya FDLR, hanyuma bagakora andi masomo yihariye yitwa commando course. Ababitsindaga ni bo bemererwaga kuba mu CRAP, umutwe ugizwe n’abarwanyi basaga 600.
Nk’uko uyu wahoze ari umusirikare wa FDLR abivuga, CRAP Unit yakoreraga hafi ya Mubambiro, ahari ibirindiro by’ingabo za FARDC na SADC, ngo “zirinde Goma”, ariko mu by’ukuri intego nyayo yari iyo gukora ibikorwa byo guhungabanya umutekano mu Rwanda.
Uyu mutwe wayoborwaga na Col. Ruhinda, wishwe mu buryo bw’amayobera nyuma y’intonganya mu bayobozi ba FDLR. Hafashimana avuga ko “yatezwe grenade mu gitanda cye ikamukomeretsa bikomeye, nyuma akitaba Imana ari kwa muganga i Goma.” Ibi byateje amacakubiri hagati y’amashami ya FDLR, arimo CRAP na FOCA.
Hafashimana yemeza ko CRAP Unit yakoranaga bya hafi n’ingabo za FARDC, ndetse ikagira abahuzabikorwa (liaison officers) i Kinshasa. Umwe muri bo ni Lt. Fidèle Niyonzima, ukomoka i Rugari, ushinzwe kwakira inkunga n’intwaro zituruka mu bayobozi ba FARDC ndetse no mu bantu bo muri diaspora ya FDLR.
Lt. Fidèle ngo yakoraga no mu mutwe wa CMC Nyatura, akaba yarahawe imodoka ya Land Cruiser ifite ibara ry’umweru na Cirimwami, wari Guverineri w’intara ya Kivu y’amajyaruguru. Uyu Niyonzima kandi ni umwe mu bakorana bya hafi na Omega Pacifique, ushinzwe ibikorwa bya gisirikari ndetse agashingwa n’itumanaho n’imari hagati ya FARDC na FDLR.
N’ubwo FDLR, FARDC, na Wazalendo bose bagombaga guhabwa 50.000 FC buri kwezi, Hafashimana avuga ko amafaranga yagombaga guhabwa abarwanyi ba FDLR yajyaga yibwa n’abakomanda ba FARDC. Ibi bigaragaza uburyo FDLR ikomeje kuba igikoresho cya Kinshasa mu nyungu za politiki no mu ntambara irimo kurwanya M23, aho ifashwa mu bikoresho, amikoro n’amakuru y’iperereza.
Mu kwezi kwa Nyakanga 2025, FARDC yasabye FDLR-CRAP koherereza abasore bafite ubumenyi mu by’ikoranabuhanga bajya kwiga gukoresha drones i Kinshasa. Hafashimana yemeza ko abarwanyi 16 batoranyijwe bakoherezwa muri iyo myitozo, mu rwego rwo kongera ubushobozi bwo gukoresha izo ntwaro zifashishwa cyane n’ingabo za Kongo mu ntambara ziri kubera muri Kivu.
Ku cyicaro cya FARDC kiri i Walikale, umuhuza wabo ni Rémy, ushinzwe guhuza ibikorwa bya FARDC na CRAP Unit.
Nyuma y’urupfu rwa Col. Ruhinda, ubuyobozi bwa CRAP Unit bwahawe Col. Guillaume Gasimba, aho Hafashimana yakomeje kumukorera nk’umurinzi we wihariye mbere yo guhungira ku ruhande rwa M23, ubwo intambara yakazwaga muri Masisi no muri Walikale.
Ibyatangajwe na Mbale Hafashimana bigaragaza ishusho isobanutse y’ubufatanye hagati ya FDLR na FARDC, by’umwihariko mu bikorwa bya CRAP Unit, n’uburyo Kinshasa ikomeje gukoresha izi ngabo z’abajenosideri mu nyungu zayo za gisirikare n’iz’ubutasi.
