Ngo “kirya abandi, bajya kukirya kikishaririza

Nyuma y’uko i Nairobi havukiye ihuriro rya politiki “Alliance Fleuve Kongo”, Leta ya Kongo yikomye bikomeye igihugu cya Kenya ngo kuko cyatumye uwo muhango uhabera.

Kongo se niyo koko ikwiye kwinubira abacumbikira abarwanya ubutegetsi bwayo, mu gihe isi yose izi neza ko icyo gihugu ari indiri y’abajenosideri ba FDLR?

Uretse ko iyo FDLR inagizwe n’abahekuye u Rwanda, imaze imyaka hafi 30 mu migambi yo guhungabanya umutekano w’uRwanda, ibifashijwemo n’ubutegetsi bwa Kinshasa uko bwagiye busimburana ku ngoma.

Perezida Tshisekedi ntasiba kuvugira ku mugaragaro ko azafasha abashaka guhirika ubuyobozi bwatowe n’Abanyarwannda, bivuze kubafasha kugarura imidugararo mu Rwanda.
Nyuma yo kwikoma u Rwanda arugerekaho ibibazo bye bwite, ataretse Uganda nayo ashinja gufasha M23, Tshisekedi akurikijeho Kenya ngo yahaye icumbi abashaka impinduka nziza mu gihugu cyabo.

Ese mu by’ukuri abategetsi ba Kongo bazi neza umwanzi wabo.

Watsinda intambara ute witiranya abo murwana?