Ntibikiri Ibanga Petero Nkurunziza Akorana Na RNC Ya Kayumba Nyamwasa

Uwavuze ko nshuti yawe  ejo ishobora kuba umwanzi wawe  ngo ntiyabeshye, Uwabonye amafoto ya Petero Nkurunziza asekera Perezida  Paul  Kagame w’u Rwanda  mu myaka ishize, ntawari kwibaza ko  Nkurunziza ,ageze aho  asaba inkuba gukubita u Rwanda.

Iyo nkuba itagira amazi Petero Nkurunziza ariho aratongera ku baturanyi  biwe bahoze ari abavandimwe , abaturanyi basangiye  akabisi n’agahiye  n’ubwo itarakubita ngo yatamure, yatangiye kurabya.

Amakuru ava  mu nzego z’ubutasi za  Petero Nkurunziza, avuga ko  Nkurunziza ubwe , ariho arashakisha  icumu risongoye  cyane, risize ubumara, ryo gusogota ahica igihugu cy’u Rwanda, imyiteguro  ihari niyo gushyira hamwe imitwe ibiri irwanya Leta y’u Rwanda ariyo  FDLR na RNC ya Kayumba Nyamwasa.

Umugaba mukuru w’ingabo z’u Burundi Gen. Prime Niyongabo afatanije na Kayumba Nyamwasa mu bikorwa bya RNC

Ngo aho bigoraniye ni uko FDLR, idafitiye ikizere Kayumba Nyamwasa  nk’umuntu  wakoreye RPF-inkotanyi  igihe kinini akaba yaragize n’uruhare guhirika ubutegetsi bwa Habyarimana , bamwe muri FDLR bakaba bagihangayikishijwe nibyo Kayumba  Nyamwasa  yakoreye muri Congo aho ashinjwa na FDLR kwica impunzi z’abahutu bari bahungiye mu nkambi z’impunzi muri Congo,  kubwa FDLR bakabona ko nta Nyamwasa  nta na Leta y’u Rwanda ngo  bose ari bamwe, n’ubwo kubwiwe Kayumba  Nyamwasa,  yari yemeye ko Petero Nkurunziza yabahuza, bagakora umutwe umwe byaje kuba ikibazo cyo kunga  izo mpande ebyiri,  kugeza ubu bigisa nibyananiranye  ngo ntibyabujije ariko  Petero Nkurunziza  gukomeza  asaba izo mpande zombi kumufata mu mugongo, uruhande rwa Kayumba Nyamwasa  akaba arirwo ruriho ruriyerekana nk’urushoboye ibyo bikorwa by’ubugizi bwa nabi.

Perezida w’u Burundi Petero Nkurunziza

Amakuru  atangazwa n’umunyamakuru wacu uri I Bujumbura avuga ko ku wa gatanu,  tariki ya  29 Kamena 2018, habaye inama mu Burundi, yahuje  intumwa za Petero Nkurunziza n’iza Kayumba Nyamwasa, kugira ngo bumvikane uko ibikorwa byo guhungabanya umutekano w’  u Rwanda  byakorwa , abo kwa Nyamwasa bakaba barasabye ko Petero Nkurunziza ko  abaha IMBONERAKURE zizewe zigera ku 250, zijyanwa mu gihugu cya Congo, guhabwa imyitozo  y’uko bogaba ibitero mu Rwanda bikomeye biruta ibimaze iminsi bikorwa.

Ibimenyetso  dufite, dukura mu baduhaye  aya makuru, bari muri iyi nama y’abo kwa Kayumba Nyamwasa  n’abo kwa Petero Nkurunziza  na FDLR ,yabaye ku musi wa gatanu, bavuganye ikibazo kijyanye n’abanyarwanda bakunze gufatirwa mu Burundi  bakicwa , abo kwa Nyamwasa bakaba batarabyishimiye kuko haba harimo aba maneko babo, ubwo rero iyo babishe, baba babiciye abatanga  amakuru,  nyuma baje kumvikana ko kuva ubu, abarundi bafashe umunyarwanda atari uguhita bamwica, ahubwo bakwiye kubanza gutohoza imvo n’imvano byiwe, bibaye ngobwa bakabaza n’abo kwa Nyamwasa ko bataba bamuzi, Kugira ngo badakomeza kwikora mu nda.

FDLR mu Burundi

Muri iri tohoza ry’umunyamakuru wacu yabashije kubona  andi makuru y’  imyiteguro igaragaza ko hari abantu bakomeje kuva mu gihugu cya  Uganda, bagaca muri Tanzania, binjira mu Burundi, bakajya mu birindiro  by’ Interahamwe  na RNC biri muri CIBITOKE, komine BUKINANYANA, zone ya NDORA, abandi bakava mu gihugu cya Congo  mu maboko  y’uwitwa Nyamusaraba, bakajya muri Komine BUKINANYANA bakakirwa na Gen. Gervais Ndirakobuca bita Ndakugarika, arikumwe n’abandi bakozi bakomeye bo mw’iperereza ry’u Burundi, abo bategetsi bagahita  baha ibikoresho by’ibanze izo ngabo zabo, zigahita zerekeza  aho zishingira ibirindiro mw’ishyamba rya Nyungwe , aho bivugwa ko bazajya bava bagatera mu turere two mu gihugu cy’u Rwanda.

Nk’uko bimaze  imisi bivugwa mu itangazamakuru  ko  hari uturere tumwe na tumwe  two mu Ntara y’amajyepfo mu Rwanda , tumaze iminsi duterwa n’abantu  bitwaje intwaro bavuye mu Burundi, ubwambere  bateye  mu gace ka Nyabimata  mu Karere ka Nyaruguru , mu ijoro ryo ku wa Kabiri rishyira ku wa Gatatu tariki 20 Kamena 2018, bitwaje intwaro bagabye igitero mu kagari ka Nyabimata mu murenge wa Nyabimata, barasa abantu babiri barapfa bakomeretsa Umuyobozi w’Umurenge, n’abandi benshi banashimuta abandi bantu benshi barimo abanyerondo.  Ibi kandi bikaba byarongeye mu ijoro  ryo ku itariki 1 Nyakanga 2018 mu gihe cya saa 23h30 nibwo  aba bagizi ba nabi bitwaje intwaro bateye mu Umurenge wa Nyabimata, Akagari ka Ruhinga mu mudugudu wa Cyamuzi.

Abatera, ntibishe abantu ahubwo bagenda bibye ibyo kurya n’amatungo y’abaturage  kandi  bakagenda babyikoreje abo baturage baho, bakabarekura ari uko igisirikare cy’u Rwanda gitabaye.

Izo ncuro zose bateye, biruka bahunga basubira  mu Burundi bikoreye n’ ibyo bibye.

Aya makuru  ava mu nzego za maneko za Petero Nkurunziza uyu mu nyamakuru  yabashije kubona  avuga ko kuva aho bitangarijwe n’igipolisi cy’u Rwanda ko abateye mu Rwanda, bagiye bava mu Burundi, kandi bakavuga ikirundi, ikinyarawanda n’igiswahiri gike gike, banava muri ibyo bikorwa by’ubugizi bwanabi  bakinjira mu Burundi, hari amakenga kwa Petero Nkurunziza ko ashobora gutahurwa , niyo mpamvu hari gutegurwa  itangazo rya Leta y’u Burundi , aho bashaka kuzimanganya  ibimenyetso , bakavuga ko ibyo bitero biriho bivugwa mu gihugu cy’u Rwanda mu bice bihana  imbibe n’u Burundi, atari ibitero by’abantu baba bavuye inyuma y’igihugu, ahubwo ari ibitero  bya Leta y’u Rwanda, kugira ngo ibone ibirego irega Leta y’u Burundi.

Umuvugizi wa Minisiteri y’Umutekano mu Burundi,  Ntahiraja Terence avuga ko ibyo u Rwanda rutangaza ko abaruteye ariho baturutse, ari ibinyoma.

Polisi y’u Rwanda yagize iti “Abo bagizi ba nabi bateye baturutse mu gihugu cy’u Burundi banyuze mu ishyamba rya Nyungwe, ari nayo nzira banyuze basubirayo. Ibi bikaba bibaye nta n’ibyumweru bibiri bishize mu karere kamwe habaye igitero nk’iki.

Bibye ibintu by’abaturage birimo amatungo n’ibiribwa, banarasa hejuru bagamije  gutera ubwoba abaturage. Bashimuse bamwe mu baturage babatwaza ibyo bibye, baza kubarekura bamaze kotswa igitutu n’abashinzwe umutekano bahise batabara,…

Ntahiraja Terence avuga ko nta gitero cyagabwe mu Rwanda giturutse mu Burundi, ati “Twebwe mu Burundi bwacu hari amahoro n’umutekano, ntibwigera butera ingorane igihugu bihana imbibi,… ni ukuri n’Imana yo mu ijuru niyo izatubera umuhamya”.

Umunyamakuru wa BBC amubajije niba nta mujura cyangwa undi wese witwaje intwaro waba yaraturutse ku butaka bw’u Burundi akajya mu Rwanda; yabiteye utwatsi.

Ati “ Reka daaaaaaa!!! Ahubwo inkuru nshyashya twababwira ni uko Abarundi birirwa birukanwa bangirwa kuba impunzi,… niyo nkuru nshyashya tuzi, naho ngo aho uburundi bwaba buteza ibibazo, ibyo ni iremekanya, ni ikinyoma cyambaye ubusa”.

Tuzakomeza kubagezaho aya makuru…