Rayon Sports yakiriye inkuru nziza mbere y’umukino wa nyuma w’Igikombe cy’Amahoro 2026 uzayihuza na APR FC ku wa Gatandatu, nyuma y’uko abakinnyi bane bari bafite ibibazo by’imvune basubukuye imyitozo.
Mu myitozo yasubukuwe ku wa Mbere, umuzamu Kwizera Olivier wari umaze iminsi afite ikibazo cy’iryinyo, yongeye kugaragara ari kumwe n’ikipe ndetse ameze neza.
Myugariro Youssou Diagne nawe wari wagize ikibazo cyo gutonekara ndetse na Tshimanga Ramazani wari ufite ikibazo cy’imitsi yo mu kibere, aba bombi bakaba bagarutse mu myitozo ndetse biteguye gufasha Gikundiro muri uyu mukino ukomeye.
Rutahizamu ukomoka mu gihugu cy’I Burundi, Ndikumana Asman wari wagize imvune y’akagombambari (ankle injury) nawe yasubukuye imyitozo, ibi bikaba biha icyizere abakunzi ba Rayon Sports mbere yo guhura na APR FC.
Aba bakinnyi bose ntibari bakinnye umukino uheruka Rayon Sports yanganyijemo igitego kimwe kuri kimwe na Gorilla FC kubera ibibazo by’imvune zitandukanye.
Kugaruka kwabo byitezwe kongerera imbaraga Gikundiro mu rugamba rwo gushaka kwegukana Igikombe cy’Amahoro 2026 gitanga amahirwe yo guhagararira u Rwanda mu mikino y’igikombe cya Afurika ku makipe yatwaye ibikombe iwayo (CAF Confederations Cup).
