Umukino wo kwishyura mu ijonjora rya gatatu rya CAF Confederation Cup urangiye kuri stade Amahoro, Rayon sports inganyije na Rivers United yo muri Nigeria 0-0 bituma isezererwa muri iri rushanwa kuko yatsinzwe 2-0 mu mukino ubanza.
Iyi kipe yaje mu kibuga izi neza ko nta yandi mahitamo uretse gutsinda uyu mukino hejuru y’ibitego bibiri ku busa, niyo yatangiye isatira cyane mu minota 10 ya mbere ibona uburyo bubiri bwari kubyara igitego harimo aho ku munota wa kane Savio Nshuti Dominique yazamukanye umupira ku ruhande rw’ibumoso gusa ntiyaha umupira Moussa Camara wari uhagaze neza ngo atsinde igitego.
Umutoza Stanley Eguma utigeze wicara mu gice cya kabiri, yakoze impinduka akuramo Aliassou Sanou wari wananiwe yinjiza Lukman Muhammed kugira ngo akomeze kurinda izamu rye. Kuri iyi minota umuntu wari hanze ya Stade Amahoro ntiyari kumenya ko hari umukino uri kuyiberamo kuko abafana bari batuje cyane, icyizere cy’abareyo cyo gukomeza gisa n’icyamaze kuyoyoka.
Umutoza Masoudi yakoze impinduka za nyuma akuramo myugariro Mugabo Gabriel ashyiramo Manishimwe Djabel mu rwego rwo kongerera imbaraga ubusatirizi gusa abasore ba Rivers United bitwara neza nubwo bari bake.
Abafana bo batangiye gusohoka mu kibuga n’umukino utararangira kuko nubwo ikipe yabo yakinaga neza inarusha Rivers United kwiharira umupira, kubona igitego cyari gikenewe byakomeje kugorana.
Inzozi za Rayon Sports zo kwandika amateka yo kuba ikipe ya mbere yo mu Rwanda igeze mu matsinda ya CAF Confederation Cup zarangiriye muri 1/16 ikaba igomba gukomeza urugamba rwo gushaka igikombe cya shampiyona.
Iyi kipe kandi inananiwe kwegukana amadorali ibihumbi 275 arenga miliyoni 200 z’amanyarwanda, yari guhabwa iyo ibasha gusezerera Rivers United.
Ikipe ya Rayon Sports
Ikipe ya Rivers Utd yo muri Nigeria
