Polisi muri Uganda yataye muri yombi abahungu babiri ba Rtd Lt Gen Henry Tumukunde, umaze iminsi ibiri afunzwe akurikiranyweho icyaha cy’ubugambanyi.
Abahungu ba Tumukunde batawe muri yombi ni Philip Tumukunde na Amanya Ndahura Tumukunde, aho bivugwa ko bakuwe iwabo ahitwa Kololo bakajya gufungirwa kuri Station ya Polisi ya Jinja.
Umwe mu bantu utashatse ko amazina ye ajya mu itangazamakuru yabwiye Daily Monitor ko ahagana saa saba z’ijoro aribwo polisi yagiye mu rugo rwabo irabatwara ibajyana kuri station za polisi ebyiri zitandukanye.
Umuvugizi wa Polisi, Fred Enanga, kuri iki Cyumweru yatangaje ko hari umuntu umwe bafunze ukurikiranyweho ibyaha by’ubugambanyi mu gihe abandi bakurikiranyweho ibyaha byo kubangamira igikorwa cyo guta muri yombi.
Ku wa Kane nibwo Gen umukunde yatawe muri yombi n’inzego za gisirikare hamwe n’iza polisi, nyuma y’iminsi atangaje ko agiye kwiyamamariza kuyobora Uganda agasimbura Yoweli Kaguta Museveni umaze imyaka 34 ku butegetsi.
