Urukiko rwo mu mujyi wa Gulu mu Majyaruguru ya Uganda rwafunguye by’agateganyo umuhanzi mu njyana ya Afropop akaba n’umunyapolitiki, Depite Robert Kyagulanyi (Bobi Wine).
Mu gitondo cyo kuri uyu wa Mbere tariki ya 27 Kanama 2018, Urukiko rwanzuye ko nta byago bihari ko ashobora guhunga igihugu, ndetse ko rushobora kuba rufatiriye urwandiko rwe rw’inzira.
BBC itangaza ko na Depite Kassiano Wadri uheruka gutorerwa uyu mwanya na we yabaye afunguwe by’agateganyo hamwe n’abandi 11.
Bobi Wine ashinjwa ibyaha by’ubugambanyi kubera icyo polisi ya Uganda ivuga ko cyari igitero ku modoka imwe mu zari zigize urukurikirane rw’izitwaye Perezida Yoweri Kaguta Museveni w’iki gihugu.
Abashyigikiye Bobi Wine bavuga ko ari kwibasirwa na leta ya Uganda kubera ukuntu yahindutse unenga bikaze politiki za Museveni kuva yaba Depite mu mwaka ushize wa 2017, kuva icyo gihe mitingi ze zikaba zitabirwa n’imbaga.
