Mu ijoro ryo kuri uyu wa 1 Mutarama 2017, Minisitiri w’Amazi n’ibidukikije mu gihugu cy’u Burundi yishwe arashwe mu mujyi wa Bujumbura.
Amakuru atangazwa n’ibitangazamakuru bitandukanye byo muri kiriya gihugu avuga ko uyu Minisitiri Niyonkuru Emmanuel yarashwe n’abantu bataramenyekana ariko umugore wari kumwe nawe akaba yahise atabwa muri yombi ngo akorerweho iperereza.
Urupfu rw’uyu muminisitiri rwemejwe na Perezida Nkurunziza abinyujije ku rubuga rwa Twitter yihanganisha umuryango wa nyakwigendera Emmanuel.
“Le ministre Emmanuel Niyonkuru a été assassiné cette nuit. Condoléances à la famille et à tous les burundais. Ce crime ne restera pas impuni
— Pierre Nkurunziza (@pnkurunziza) January 1, 2017”
Minisitiri Emmanuel yarashwe mu gihe mu minsi yashize abantu barimo n’abo mu gipolisi cy’u Burundi na none bagabye igitero ku muvugizi wa Perezidansi y’u Burundi Willy Nyamitwe Imana igakinga ukuboko ariko umwe mu bari bamurinze akahasiga ubuzima.
Minisitiri Niyonkuru yari mu bwoko bw’Abatutsi akaba yari no mu ishyaka riri ku butegetsi akaba ari nawe ubaye umuminisitiri wa mbere wishwe kuva havuka imvururu muri kiriya gihugu guhera mu mwaka wa 2015.
Minisitiri Niyonkuru Emmanuel
