Perezida Kagame kuri iki Cyumweru yakiriye Gianni Infantino umaze umwaka ayobora ishyirahamwe ry’umupira w’Amaguru ku Isi, FIFA, amusezeranya ubufatanye mu byatuma uyu mukino ukomeza gutera imbere.
Aba bayobozi bombi bahuriye i Gabiro mu Ntara y’Uburasirazuba mu Karere ka Gatsibo ahari kubera umwiherero w’abayobozi bakuru b’u Rwanda ku nshuro ya 14, mbere gato y’uko Perezida wa FIFA asura urwibutso rwa Jenoside yakorewe Abatutsi ku Gisozi.
Umuvugizi wa Ferwafa, Ruboneza Prosper, yavuze ko Perezida Kagame na Perezida wa FIFA bombi baganiriye ku bijyanye n’iterambere ry’umupira mu Rwanda by’umwihariko Infantino yamushimiye umusanzu we mu guteza imbere ruhago.
Aha yagarutse ku marushanwa Perezida Kagame asanzwe atera inkunga arimo nk’iry’amakipe yabaye aya mbere mu bihugu byayo mu Karere ka Afurika y’Iburasirazuba, CECAFA.
Perezida Kagame yamwijeje ko u Rwanda rwiteguye kwakira ibikorwa byose by’Umupira w’amaguru FIFA yashaka ko bibera mu rw’imisozi igihumbi.
Yanamusezeranyije kandi ko leta y’u Rwanda izakomeza gushyigikira igikorwa cyari cyamuzanye mu Rwanda cyo kubaka hotel ya Ferwafa.
Gianni Infantino na Perezida Kagame
Source :Office of the President -Communications Office
