Ishyirahamwe ry’Umupira w’Amaguru mu Rwanda (FERWAFA) ryatangaje ibiciro by’amatike ku bafana bifuza guherekeza ikipe y’Igihugu, Amavubi, muri Mali, aho itike yo kugenda no kugaruka mu cyiciro cya Economy Class ari amadolari 700, mu gihe iya Business Class ari amadolari 1.500.
Ibi bije mu gihe Amavubi akomeje imyiteguro y’imikino ibiri azahuramo na Mali mu gushaka itike y’Igikombe cya Afurika cya 2027 (CAN 2027), kizabera muri Tanzania, Uganda na Kenya.
FERWAFA yatangaje ko igiciro gisanzwe cyo kugenda no kugaruka ari amadolari 1.700, ariko hashyizweho ibiciro byihariye ku bafana bazaherekeza ikipe y’Igihugu, itariki ya 5 Ugushyingo 2026 ni yo ntarengwa yo gusaba amatike.
Umukino ubanza uzabera kuri Stade du 26 Mars i Bamako muri Mali, ku wa 13 Ugushyingo 2026, saa tatu z’ijoro ku isaha y’i Kigali. Amakipe yombi azongera guhura ku wa 17 Ugushyingo kuri Stade Amahoro i Kigali.
Constantine yahamagaye abakinnyi 28, Emeran ntiyagaragaramo
Mu gihe imyiteguro ikomeje, umutoza w’Amavubi, Stephen Constantine, yashyize ahagaragara urutonde rw’agateganyo rw’abakinnyi 28 azifashisha muri iyi mikino, rutagaragaraho Noam Emeran, mu gihe myugariro Manzi Thierry yongeye guhamagarwa.
Emeran w’imyaka 24 yari mu bakinnyi Amavubi yakoresheje mu mikino ibiri ibanza yo gushaka itike ya CAN 2027, u Rwanda rwatsinzemo Liberia ibitego 3-1 na Cap-Vert ibitego 2-1.
Manzi Thierry, ukinira Al Golan SC yo muri Iraq, yagarutse mu ikipe y’Igihugu nyuma yo kutagaragara ku rutonde rw’abakinnyi bahamagawe mu mikino ibanza y’amatsinda.
Abakinnyi bahamagawe:
Abanyezamu: Niyongira Patience wa Police FC, Hakizimana Adolphe wa APR FC, Mugisha Yves wa Rayon Sports na Ntwari Fiacre wa Kruger United yo muri Afurika y’Epfo.
Abugarira: Mutsinzi Ange, Niyigena Clément, Kavita Phanuel Mabaya, Nkulikiyimana Nganji Darryl na Manzi Thierry. Ku mpande z’ubwugarizi hahamagawe Imanishimwe Emmanuel, Mickels Jacques Leroy, Niyomugabo Claude, Ganijuru Elie Ishimwe, Uwumukiza Obed, Kwizera Jojea, Byiringiro Jean Gilbert na Mugisha Gilbert.
Mu bakinnyi bo hagati harimo Mugisha Bonheur, Bizimana Djihad, Hamis Hakim, Iradukunda Elie Tatou, Ruboneka Jean Bosco na Muhire Kevin.
Ba rutahizamu bahamagawe ni Nshuti Innocent, Mbonyumwami Taiba, Biramahire Abeddy, Mickels Joy-Lance, Uwiyaremye Fidali na Mickels Joy-Slayd.
Amavubi na Mali bihanganiye kuyobora Itsinda K
U Rwanda na Mali byombi bifite amanota atandatu mu mikino ibiri bimaze gukina, bikaba bose bari ku mwanya wa mbere mu Itsinda K. Mali yatangiye itsinda Cap-Vert ibitego 3-1, itsinda Liberia igitego 1-0.
Abafana bifuza guherekeza Amavubi muri Mali barasabwa gutanga ubusabe bw’amatike bitarenze ku wa 5 Ugushyingo 2026, mu gihe umukino wa mbere uteganyijwe ku wa 13 Ugushyingo.
