Iby’imvune ya rutahizamu Lewandowski yaraye itangajwe ku mugoroba wo kuri uyu wa kabiri ubwo uyu mugabo wagiriye imvune mu ikipe y’igihugu ya Polonye yarimo yitegura gukina umukino wayo n’ikipe y’igihugu y’u Bwongereza bagomba gukina ku mugoroba wo kuri uyu wa gatatu.
Uyu mukinnyi w’imyaka 32 y’amavuko yagiriye ikibazo cy’imvune mu mukino ikipe ye ya Polonye yatsinze ikipe ya Andorra ibitego 3-0, muri uyu mukino uyu rutahizamu akaba yaratsinzemo ibitego bibiri wenyine ndetse anagirira ikibazo cy’imvune muri uwo mukino.
Nyuma yaho abaganga b’ikipe y’igihugu ya Polonye bitaye kuri uyu mukinnyi bakamukorera ikizamini kuri iyo mvune yagize baje gusanga uyu mukinnyi azamara igihe cy’ukwezi ari hanze y’ikibuga binatuma uyu mugabo atazakina umukino wa 1/4 cy’imikino ya UEFA Champions League bazahuramo n’ikipe ya Paris St Germain yo mu gihugu cy’u Bufaransa tariki ya 7 Mata 2021, naho uwo kwishyura wo uzakinwa tariki ya 14 Mata 2021.
Robert Lewandowski wagize ikibazo cy’imvune mu ivi ry’i bumoso agiye gusiba imwe mu mikino ikomeye haba iyo muri shampiyona y’u Budage aho kugeza ubu kuva uyu mwaka w’imikino wa 2020-2021, uyu rutahizamu amaze gutsinda ibitego 42 mu mikino 36 mu marushanwa yose amaze gukinira ikipe ye ya Bayern Munichen.
Mu gushaka itike y’igikombe cy’isi irimo gukinwa ku migabane itandukanye, by’umwihariko ku mugabane w’i Burayi , mu itsinda rya gatanu ikipe y’igihugu ya Polonye imaze gukina imikino ibiri ikaba imaze gusaruramo amanota ane gusa.
