Kuri uyu wa kane tariki ya 30 Nzeri 2021 hasojwe imikino yo mu matsinda muri Shampiyona y’ikiciro cya kabiri mu bagabo.
Mu itangira ry’iyi mikino yagombaga kwitabirwa n’amakipe 20 yagabanyijwe mu matsinda ane arimo amakipe atanu gusa mbere gato y’uko amarushanwa atangira ikipe ya Gasabo United yamenyesheje ubunyamabanga bukuru bwa FERWAFA ko yikuye mu irushanwa ry’uyu mwaka ibi byatumye mu itsinda A haba amakipe ane aho kuba atanu nko mu yandi matsinda.
Imikino yo guhatanira kujya mu kiciro cya mbere mu mwaka w’imikino wa 2021-2022 igeze muri 1/4 cy’irangiza, ni nyuma yo gusozwa kw’amatsinda yo mu kiciro cya kabiri 2021 bahatanira kuzamuka ngo basimbure AS Muhanga ndetse na Sunrise FC zamanutse mu kiciro cya Kabiri.
Mu makipe 8 yaraye abonye itike yo kujya mu kimwe cya kane harimo amakipe ane afashwa n’uturere, ni Amagaju FC y’i Nyamagabe, Etoile de l’Est yo mu karere ka Ngoma, Gicumbi FC yo mu karere ka Gicumbi ndetse na Kirehe FC yo mu karere ka Kirehe.
Andi makipe yakomeje muri kimwe cya kane, ni Vision FC yo mu mujyi wa Kigali, Vision Jeunesse Nouvelle FC yo mu karere ka Rubavu, Heroes y’i Kigali ndetse na Rugende FC.
Uko amakipe azahura muri 1/4 k’irangiza kuri iki cyumweru tariki 03 Ukwakira 2021:
Amagaju FC vs Vision Jeunesse Nouvelle
Vision FC vs Heroes FC
Gicumbi FC vs Kirehe FC
Etoile de l’Est vs Rugende FC
Amakipe azarenga muri iki kiciro niyo azakomeza muri kimwe cya kabiri k’irangiza ari nacyo kizagena amakipe abiri agomba kuzamuka muri Primus National League 2021-2022.
