Impuzamashyirahamwe y’umupira w’amaguru muri Afurika CAF yamaze gutangaza ko umukino wo mu ijonjora rya gatatu mu mikino ya Total CAF Confederations Cup uzahuza ikipe y’ingabo z’igihugu ya APR FC na RSB Berkane yo mugihugu cya Morocco uzayoborwa n’abanya Djibouti.
Ni umukino ubanza uzabera kuri Sitade ya Kigali i Nyamirambo kuri iki cyumweru tariki ya 28 Ugushyingo 2021 ukazayoborwa na Liban Abdoulrazack Ahmed nk’umusifuzi wo hagati, mu gihe umusifuzi wa mbere wungirije yitwa Ahmed Djama, umusifuzi wungirije wa kabiri yitwa Rachid Waiss Bouraleh naho umusifuzi wa kane akaba yitwa Mohamed Diraneh Gued.
Uyu mukino ugiye gukinwa nyuma yaho APR FC yasezerewe na Etoile Sportive du Sahel mu ijonjora rya kabiri rya CAF Champions League byatumye ikipe y’ingabo yerekeza muri iki kiciro cya Confederations Cup.
Muri uyu mukino uzakinwa mu byiciro byombi ubanza ndetse n’uwo kwishyura, ikipe izakomeza izahita yerekeza mu matsinda ya Total CAF Confederations Cup 2021-2022.
Ikipe y’ingabo z’igihugu ikaba ikomereje imyitozo i Shyorongi aho isanzwe ibarizwa, ni nyuma yaho iheruka gutsinda ikipe ya Rayon Sports ibitego 2-1 mu mukino wa shampiyona w’umunsi wa Kane.
