Imbuga nkoranyambaga z’abatavuga z’ ibigarasha, zongeye kugaragaza uburyo zimwe mu mbaraga zazo zizimara mu guhindura no kugoreka amakuru ajyanye n’ibibera mu Rwanda. Kuri iyi nshuro, izo mbuga zerekeje amaso ku mushinga w’ishoramari wa Pasteur Bizimungu, wahoze ari Perezida wa Repubulika y’u Rwanda, uri kubaka hoteli y’inyenyeri enye ku nkengero z’Ikiyaga cya Kivu.
Amashusho y’iyi hoteli amaze gukwirakwira ku mbuga nkoranyambaga, ariko aho kuyifata nk’ikimenyetso cy’iterambere n’ishoramari ry’Umunyarwanda, bamwe mu bakoresha izo mbuga bayagize urwitwazo rwo kongera gukwirakwiza ubutumwa bugamije guharabika u Rwanda. Ibi byongeye kugaragaza uburyo ibikorwa bisanzwe by’Abanyarwanda bishobora gufatwa, bigahindurwa inkuru za politiki, hagamijwe kubihuza n’ibitekerezo by’abanenga u Rwanda badashingiye ku kuri kugaragara.
Mu gihe ishoramari rya Bizimungu rikomeje gutera imbere, bamwe mu biyita ko batavuga rumwe n’ubutegetsi bw’u Rwanda bari barubatse inkuru ivuga ko uyu wahoze ari Perezida adafite ubwisanzure, ko ngo afungiye mu gihugu cye kandi ko adashobora gukora ibyo yifuza. Nyamara, kuba umuntu atari mu buzima bwa politiki nk’uko byahoze, ntibivuze ko adashobora kugira ibikorwa bye bwite, gukora ubucuruzi cyangwa gushora imari mu gihugu cye.
Pasteur Bizimungu ni Umunyarwanda ufite uburenganzira bwo gukora ishoramari nk’ubw’abandi baturage bose. Azwiho kugira ibikorwa by’ubucuruzi birimo amazu y’ubucuruzi mu Mujyi wa Kigali, mu gihe kuri ubu ari no gushyira imbaraga mu mushinga wo kubaka hoteli y’inyenyeri enye ku nkengero z’Ikiyaga cya Kivu. Ibi ni ibikorwa bigaragaza uruhare rw’abikorera mu guteza imbere urwego rw’ubukerarugendo, kwakira abashyitsi no kongera amahirwe y’ubukungu.
Kuba umushinga wa hoteli ya Bizimungu warabaye ingingo ivugwa cyane ku mbuga nkoranyambaga z’abatavuga rumwe n’u Rwanda, birerekana uburyo zimwe muri izo mbuga zifata ibikorwa by’abantu ku giti cyabo zikabihindura intwaro za politiki. Aho kwibanda ku gaciro k’ishoramari, amahirwe y’akazi rishobora gutanga, n’uruhare rwaryo mu guteza imbere ubukerarugendo, bamwe bahisemo kurikoresha mu gukomeza inkuru zimaze igihe bakwirakwiza zigaragaza u Rwanda nk’igihugu kitagira ubwisanzure.
Icyakora, amashusho y’inyubako iri kuzamurwa agaragaza umushinga w’ishoramari ufatika, utandukanye n’inkuru z’ibihuha zagiye zikwirakwizwa kuri Bizimungu. Umuntu ushobora gushora imari, kubaka amazu y’ubucuruzi no gutegura ibikorwa by’ubukerarugendo aba agaragaza ko afite umwanya wo kwikorera no kwiteza imbere.
U Rwanda rwashyize imbere gahunda yo guteza imbere abikorera, gukurura ishoramari no kubaka ubukungu bushingiye ku ruhare rw’abaturage. Muri urwo rwego, ibikorwa by’umushoramari uwo ari we wese, yaba yarigeze kugira inshingano za politiki cyangwa atarigeze azigira, bikwiye kureberwa mu gaciro bifite mu iterambere ry’igihugu.
Ishoramari rya Pasteur Bizimungu rinagaragaza ko ibikorwa by’ubucuruzi bidakwiye guhindurwa intambara za politiki. Kuba yarigeze kuba Umukuru w’Igihugu ntibimubuza kuba umushoramari, nk’uko n’undi Munyarwanda wese afite uburenganzira bwo guhitamo umwuga cyangwa ibikorwa by’ubukungu ashaka kwinjiramo.
U Rwanda rw’uyu munsi rwubakiye ku mahame yo kurwanya amacakubiri, guteza imbere ubumwe bw’Abanyarwanda no guha buri wese amahirwe yo kugira uruhare mu iterambere ry’igihugu. Icy’ingenzi ni uko buri wese akora mu buryo bwubahiriza amategeko, akagira uruhare mu kubaka igihugu no guteza imbere imibereho ye n’iy’abandi.
Nta mpamvu rero yatuma hoteli ya Bizimungu ifatwa nk’ikintu kidasanzwe kubera gusa ko ari umushinga w’uwigeze kuyobora u Rwanda. Ahubwo, ikwiye kureberwa mu rwego rw’ubushoramari n’iterambere ry’ubukerarugendo.
Ku rundi ruhande, Bizimungu nta mpamvu afite yo kwisobanura ku mbuga nkoranyambaga z’abamunenga kubera gusa ko yahisemo gushora imari mu gihugu cye. Umushoramari ntakeneye kwemeza abamunenga ko afite uburenganzira bwo gukora ubucuruzi, igihe cyose ibikorwa bye bikurikiza amategeko.
Mu gihe bamwe bakomeje gukoresha imbuga nkoranyambaga mu kubaka inkuru za politiki, ibikorwa bifatika by’ishoramari ni byo bizatanga igisubizo kirambye. Hoteli ya Pasteur Bizimungu ni umushinga w’ubucuruzi, kandi igaragaza ko no mu bantu bahoze mu nzego zo hejuru z’ubuyobozi harimo abahitamo gukomeza kugira uruhare mu bukungu bw’igihugu cyabo.
