Hashize igihe gito abakobwa bahatanira ikamba rya miss Rwanda 2018 bagiye mu mwiherero i Nyamata.Aba bakobwa usanga bashyirirwaho uburyo bwose bwo kwidagadura ariko ku munsi w’ejo bwo zahinduye imirishyo kuko batabonye uko bidagadurana n’abakunzi babo ku munsi w’abakundana babo ahubwo bawizihiza bonyine.
Ubwo kuri uyu wa Gatatu tariki 14 Gashyantare 2018 hizihizwaga umunsi w’abakundana wa ‘Saint Valentin’ , abakobwa 20 bari mu mwiherero mu Bugesera nabo bizihije uyu munsi mu buryo bwihariye.
Ku munsi w’abakundana , abakundana bongera kubwirana utugambo twiza tw’urukundo, gutanga indabo ndetse n’impano zitandukanye,ndetse batibagiwe n’indabo zitukura, nka kimwe mu bimenyetso biranga uyu munsi.
Hotel Golden Tulip aba bakobwa bari gukoreramo umwiherero yabateguriye ifunguro ryihariye, bariyerekana batambuka kuri tapis itukura (Catwalk at the red carpet) ndetse banaririmba indirimbo zijyanye n’umunsi w’abakundana,ariko ntibemererwa kuba bajya hanze ngo bidagadurane n’inshuti zabo.
Uko ari 20 basangiye umutsima bari bateguriwe na Golden Tulip wo kubifuriza umunsi mukuru w’abakundana wabaye bari mu mwiherero aho bitemewe ko hari undi muntu uhagera.
Biteganyijwe ko aba bakobwa bazahamara ibyumweru 2. Tariki 24 Gashyantare 2018 nibwo hazaba ibirori byo gutora uzaba wahize abandi , bizabera muri Kigali Convention Centre. Uzegukana ikamba azahita anahabwa imodoka Suzuki Baleno ifite agaciro ka Miliyoni 18.
