Kuri uyu wa Kabiri, ikipe y’Igihugu y’u Rwanda Amavubi yatsindiye Zimbabwe igitego 1-0 muri Afurika y’Epfo, ni mu mukino w’umunsi wa munani wo gushaka itike y’Igikombe cy’Isi 2026.
Muri uyu mukino wabereye kuri stade ya Orlando, mu mujyi wa Johannesburg watangiye ku isaha ya saa cyenda zuzuye.
Ni umukino wakinwe, Amavubi asabwa gutsinda ngo yegere imbere ku rutonde rw’Agateganyo rwo mu itsinda C.
Ibi byaje kugenda neza kuko uubwo hari ku munota wa 40 w’umukino nibwo rutahizamu Mugisha Gilbert yaboneye Amavubi igitego rukumbi cyayihaye intsinzi.
Hari ku mupira wari uteretse watewe na Kwizera Jojea, ukagarurwa n’umukinnyi wa Zimbabwe, wasanze Mugisha Gilbert atera ishoti rikomeye ryaruhukiye mu izamu.
Ku ruhande rw’amavubi muri uyu mukino hari habayemo impinduka mu bakinnyi babanjemo harimo impinduka z’abakinnyi batatu.
Muri abo ni Fitina Ombolenga wasimbuwe na Kavita Phanuel, Enzo Harmony wasimbuwe na Muhire Kevin na Nshuti Innocent wasimbuwe na Biramahire Abedi.
Abakinnyi babanje mu kibuga ku ruhande rw’u Rwanda: Ntwari Fiacre, Manzi Thierry, Mutsinzi Ange, Kavita Phanuel, Claude Niyomugabo, Mugisha Bonheur, Djihad Bizimama, Muhire Kevin, Biramahire Abeddy, Kwizera Jojea na Mugisha Gilbert.
U Rwanda rwagize amanota 11 ku mwanya wa gatatu mu Itsinda C ryo gushaka itike y’Igikombe cy’Isi cya 2026, rurushwa amanota atanu na Afurika y’Epfo ya mbere.
Amavubi azakira Bénin mbere yo kwakirwa na Afurika y’Epfo, mu mikino ibiri isoza uru rugendo, yombi izaba mu Ukwakira.
