Banki ya Kigali PLC yabaye Banki ya mbere yo mu zikorera ku butaka bw’u Rwanda, yagaragaye ku rutonde rwa banki 100 zihagaze neza muri Afurika.
Urutonde rwa Banki 100 za mbere rukorwa harebwa imari shingiro yazo, ubwizigame zifite, urwunguko zibona n’imigabane ifitwemo n’abandi bantu.
Ubushakashatsi bukorwa hahujwe amakuru arimo ava mu gitabo kibikwamo amakuru y’amabanki n’ibindi bikorwa by’ishoramari, Banker’s Almanac cyashyizweho mu 1845.
Mu gukora urwo rutonde imari y’amabanki yabazwe ihinduwe mu madolari ya Amerika hagendewe ku buryo idolari ryavunjaga ku wa 31 Ukuboza 2018.
Muri rusange Banki zo muri Afurika y’Epfo ziracyayoboye kuri urwo rutonde kuko eshatu za mbere ari izo muri icyo gihugu.
Banki ya mbere yitwa Standard Bank Group ifite imari shingiro ya miliyoni $11,865 ikurikirwa na Absa Bank na FirstRand.
Izo muri Afurika y’Amajyaruguru zirimo Attijariwafa Bank yo muri Maroc ifite imari shingiro ya $ 3,688 na Banki y’Igihugu ya Misiri ifite $ 3,408 nizo zikurikiraho.
Banki ya Kigali yageze kuri uru rutonde ku nshuro ya mbere, inakora amateka yo kuba iya mbere irugezeho mu zikorera mu Rwanda. Iri ku mwanya w’ijana n’imari shingiro ya miliyoni $ 189.
Ikurikira Barclays Bank of Ghana ya 99 nayo ijemo bwa mbere ifite imari shingiro ya miliyoni $ 194, na Standard Bank Mozambique ya 98 yo muri Mozambique yari iya 92 mu 2018.
Ikinyamakuru African Business cyanditse ko “Muri uyu mwaka u Rwanda rutera imbere rwabashije kugaragara ku rutonde rw’ijana nyuma y’imari shingiro ya miliyoni $ 189. Mu mwaka ushize banki yari ifite make muri izo 100 za mbere yari ifite imari shingiro ya miliyoni $ 175 naho mu 2017 yari miliyoni $ 130.”
Icyo kinyamakuru cyagaragaje ko habayeho kugereranya uko ifaranga ryihagazeho imbere y’idolari rya Amerika, iryo muri Afurika y’Epfo bita ‘rand’ ryihagazeho, ipawundi ryo mu Misiri, naira ryo muri Nigeria, idenari ryo muri Maroc n’ishilingi rya Kenya.
Amabanki yateye imbere ngo yagiye agerageza gukoresha ikoranabuhanga no kwegera abashoramari bato n’abaciriritse.
Banki ya Kigali imaze imyaka 53 itanga serivisi zihindura ubuzima bw’Abanyarwanda binyuze muri serivisi z’imari. Niyo banki ya kabiri yageze ku isoko ry’u Rwanda ku wa 22 Ukuboza 1966, itangira imirimo yayo muri Gashyantare 1967.
Mu 2018, Banki ya Kigali yakiriye abakiliya bato barenga 290,000 n’ibigo 24,000; yaguye abayihagarariye (agents) ho abagera kuri 1,427. Ihererekanya ryabaye ringana na miliyoni ebyiri rifite agaciro ka miliyoni 103.6 Frw.
Muri uwo mwaka yungutse miliyoni $30.7, ni ukuvuga agera kuri miliyari 27.4 Frw bingana n’inyongera ya 17.2% ugereranyije n’uwa 2017.
Iyi banki ifite amashami 79, ibyuma bitanga amafaranga bizwi nka ‘ATM’ 95 n’utwuma 1,611 twishyurirwaho twa POS dushobora kwakira amakarita mpuzamahanga ya VISA na MasterCard.
Umutungo mbumbe wa BK Group Plc, ikigo kibumbiye hamwe Banki ya Kigali, BK General Insurance, BK Capital na BK TecHouse ungana na miliyari zisaga 893.2 Frw.
Src: IGIHE
