Ubuyobozi bw’ikipe ya Bugesera FC bwanyomoje amakuru y’uko umutoza wayo Mbarushimana Abdoul yahagaritse ku mirimo yo gutoza iyi kipe ikomeje kugorwa no kubona umusaruro w’amanota 3.
Ibi bibaye nyuma yaho kuri uyu wa gatanu tariki ya 24 Ukuboza 2021 hari amakuru avuga ko uyu mutoza yaba yahagaritswe, ariko binyuze ku rubuga rwa Twitter rw’iyi kipe ibarizwa mu karere ka Bugesera mu ntara y’i Burasirazuba bahakanye aya makuru.
Bagize bati”Ubuyobozi bw’ikipe ya Bugesera FC buranyomoza amakuru avugwa ko umutoza Mbarushimana Abdoul yahagaritswe.”
Bahise kandi baboneraho gutangaza ko umusaruro utari mwiza iyi kipe ifite bagiye kureba uko bakosora bakitwara neza, bati “Tuboneyeho kwisegura kubwo umusaruro utari mwiza, tubizeza ko bizakosorwa.”
Mbarushimana Abdoul urimo gutoza Bugesera FC mu mwaka we wa mbere, hamwe n’iyi kipe bamaze gukina imikino 10 bakaba baratsinze imikino 2 banganya 3 batsindwa indi itanu.
Kugeza ubu ku rutonde rw’agategano rwa shampiyona y’u Rwanda iyi kipe iri ku mwanya wa 10 ikaba ifite amanota 9.
