Indege y’umuherwe wa Leicester City, Vichai Srivaddhanaprabha, yasandariye hafi ya stade y’iyi kipe. Byemejwe ko uyu mugabo w’umunya-Thailand ari mu bantu batanu basize ubuzima muri iyi mpanuka.
Kuri uyu wa Gatandatu tariki 27 Ukwakira 2018, Leicester City yanganyije na West Ham United 1-1 mu mukino w’umunsi wa 10 wa shampiyona y’u Bwongereza.
Nyuma y’isaha imwe uyu mukino urangiye habaye impanuka y’indege y’umuherwe wa Leicester City, Vichai Srivaddhanaprabha, hanze ya King Power Stadium ariko hashira amasaha 27 ntawe uramenya niba uyu muherwe ari mu bayiguyemo.
Mu ijoro ryo kuri iki Cyumweru nibwo iyi kipe ibinyujije ku mbuga nkoranyambaga zayo yemeje ko ibabajwe no kuba Vichai Srivaddhanaprabha ari mu bantu batanu bapfiriye muri iyi ndege yahiye.
Iti “Tubabajwe cyane no kwemeza ko umuyobozi wacu Vichai Srivaddhanaprabha ari mu bantu babuze ubuzima mu ijoro ryo ku wa Gatandatu ubwo indege yamuvanaga kuri stade, we n’abandi bantu bane yakoraga impanuka hanze ya King Power Stadium. Mu bantu batanu bari muri iyi ndege ntawarokotse.”
Nyuma yo kwemeza ibi, yi kipe yegukanye igikombe cya shampiyona mu 2015 yanakomeje ivuga ko imikino yagombaga kuyihuza na Southampton mu gikombe cy’igihugu mu bakuru na Feyenoord R otterdam muri UEFA Champions League y’abana ku wa Gatatu tariki 31 Ukwakira 2018 yasubitswe kuko abakinnyi bashenguwe n’urupfu rw’umuyobozi wabo.
Srivaddhanaprabha yaguze iyi kipe miliyoni 57 z’amadolari ya Amerika mu 2010 iri mu cyiciro cya kabiri nyuma y’imyaka ine izamuka mu cya mbere, ihageze itungurana yegukana igikombe cya shampiyona y’u Bwongereza ya 2014-15.
Yari umuherwe wa 388 ku rutonde rw’abafite ifaranga rukorwa na Forbes Magazine. Umutungo we ubarirwa muri miliyari 4.9 z’amadolari ya Amerika.
